Baranoviča, jaki adbivaŭ anarchistaŭ ad milicyi, pieraviali na paŭtara hoda ŭ turmu
U papraŭčaj kałonii №1 h. Navapołacka 12 lutaha zavieršyłasia sudovaje raźbiralnictva ŭ adnosinach da Śviatasłava Baranoviča, asudžanaha za bojku ŭ tralejbusie ź milicyjantami. Na sudovym raźbiralnictvie, jakoje było raspačataje jašče piać miesiacaŭ tamu, razhladałasia pytańnie ab źmienie režymu adbyćcia pakarańnia na turemny, paviedamlaje spring96.org
Rašeńnie suda było ahučana tolki 15 lutaha. Zhodna z pastanovaj suda horada Navapołacka Śviatasłaŭ Baranovič «na astatniuju častku termina adbyćcia pakarańnia 1 hod i 7 miesiacaŭ i 20 dzion pieravodzicca na turemny režym».
Sudździa Navapołacka F. Janiuk, jakaja vynosiła rašeńnie ab źmienie režymu, spasyłałasia na 12 dyscyplinarnych spahnańniaŭ tolki za kastryčnik 2018 h. Hetyja pakarańni Śviatasłavaŭ abskardžvaŭ u sudzie horada Navapołacka i Viciebskim abłasnym sudzie, ale biezvynikova.
Zastajecca adkrytym pytańnie, kali Śviatasłaŭ Baranovič budzie pieraviedzieny na turemny režym, bo znachodziačysia ŭ štrafnym izalatary (ŠIZA) jon praciahvaŭ atrymlivać pakarańni za drennuju pryborku, nieachajny źniešni vyhlad i inšyja. Na siońnia jon maje nieadbytyja sutki ŠIZA i PKT. Nieviadoma, dzie jon ich budzie adbyvać u navapołackaj kałonii ci ŭžo turmie.
Jaho siastra Natalla raspaviała, što joj viadoma pra stan brata:
«Śviatasłaŭ znachodzicca ŭ ciažkim maralnym stanie. Mahčyma, heta źviazvanaje z tym, što Śviatasłaŭ praciahły čas znachodzicca ŭ ŠIZA, nie maje znosinaŭ sa źniešnim śvietam i pastajanna atrymlivaje roznaha kštałtu dyscyplinarnyja pakarańni. Ad advakata viadoma, što jon mocna schudnieŭ, zhubiŭ kala 10 kiłahramaŭ vahi…»
Sa słovaŭ siastry Natalli, z momantu, kali pačaŭsia sudovy praces (piać miesiacaŭ tamu), Śviatasłaŭ ni razu nie patrapiŭ u atrad. Na niejki čas byŭ adpraŭleny u pamiaškańni kamiernaha typu (PKT), astatni čas pravioŭ u ŠIZA. U štrafny izalatar zabaroniena brać ułasnyja rečy, navat knihi. U izalatar nielha atrymlivać listy, pieradačy i karystacca hrašyma na rachunku. Pry takim režymie jon izalavany ad inšych źniavolenych. U izalatary łožak adkidajecca ad ściany tolki na noč, a na dzień viartajecca da ściany. U hety čas nielha spać i lažać na joj.
Padčas adbyvańnia pakarańnia Śviatasłaŭ Baranovič na padstavie niejkaj «apieratyŭnaj infarmacyi» byŭ pastaŭleny administracyjaj kałonii na roznyja ŭliki. Na ŭlik jak «asoba, schilnaja da zachopu zakładnikaŭ i chulihanskich prajavaŭ» jon byŭ pastaŭleny praz čatyry dni paśla taho jak patrapiŭ u kałoniju. Z-za drenna pryšytaj birki, jakuju pavinny nasić tyja, chto staić na takim uliku, jon pieršy raz byŭ źmieščany ŭ ŠIZA.
Kamientary