Vajenna-pavietranyja siły Izrailu nanieśli sieryju ŭdaraŭ pa infrastruktury ruchu Chamas u siektary Haza. Pavodle miascovych miedykaŭ, zahinuli sama mała 225 čałaviek, u tym liku navički-palicyjanty, što prymali prysiahu. Kanflikt moža pieraraści ŭ novuju maštabnuju vajnu.
Paraniena bolš za 300 čałaviek.
Izrailskija vajskoŭcy zajaŭlajuć, što ličba achviaraŭ značna zavyšanyja.
Izrailskaja avijacyja biła pieradusim pa kazarmach palicyi ruchu CHAMAS, lidery jakoha pryniali rašeńnie nie padaŭžać zamireńnia. Za apošni tydzień bajeviki vypuścili pa terytoryi Izraila dziasiatki rakiet.
Pavodle vidavočcaŭ, naloty praciahnulisia i paśla nastupleńnia ciemry.
«U Izraila nie było vybaru»
Pradstaŭniki izrailskaha kamandavańnia zajavili, što apieracyja budzie doŭžycca stolki, kolki zapatrabujecca, a pry nieabchodnaści – navat budzie pašyrana.
Ministr abarony Izraila Ehud Barak zajaviŭ, što apieracyja «nie budzie lohkaj i nie budzie chutkabiežnaj».
Jak pieradaje Rejter, vajskoŭcy papiaredzili mera Aškiełona – horada, da jakoha dalatajuć niekiravalnyja rakiety CHAMAS – što apieracyja moža praciahnucca bolš za tydzień.
Ministr zamiežnych spraŭ Izraila Cypi Liŭni zajaviła, što ŭ jaje krainy nie było vybaru.
«My robim toje, što musili rabić, kab abaranić svaich hramadzian», – zajaviła ministr zamiežnych spraŭ i hałoŭny pretendent na pasadu premjer-ministra.
U Hazie
Pavodle izrailskaj haziety Haaretz, u nalotach na Hazu ŭdzielničali kala 60 samalotaŭ VPS Izraila.
 |
Kiraŭnik Paleścinskaj aŭtanomii Machmud Abas – jaki pradstaŭlaje ruch FATCH, što paśla sutyknieńniaŭ z CHAMAS u 2007 h. straciŭ kantrol nad siektaram Haza – asudziŭ avijaŭdary pa Hazie i druhich haradach i zaklikaŭ baki zachoŭvać spakoj i mir.
Jak pieradaje karespandent Bi-bi-si ŭ Hazie ŭ siektary ŭ najbližejšy čas u balnicach nie zastaniecca svabodnych miescaŭ, a miedyki zaklikajuć ludziej zdavać kroŭ.
Jehipiet adkryŭ miažu ź siektaram Haza, kab akazvać dapamohu niekatorym paciarpiełym.
Najbolšaja kolkaść achviaraŭ – u horadzie Haza, dzie bazujucca klučavyja siłavyja viedamstvy ruchu CHAMAS.
Pradstaŭniki hrupoŭki zajavili, što źniščanyja ŭsie budynki, dzie raźmiaščalisia siły biaśpieki. Siarod zabitych – kiraŭnik palicyi Hazy Tafik Džabier.
Pradstaŭnik palicyi CHAMAS raskazaŭ, što adna z rakiet trapiła ŭ palicejski pastarunak, dzie navički prymali prysiahu.
Na kadrach, źniatych u dvary hałoŭnaha palicejskaha ŭpraŭleńnia i pakazanych arabskim telekanałam «Al-Džazira», vidać bolš za dziasiatak cieł u čornaj uniformie.
Mižnarodnaja reakcyja
Hienieralny sakratar AAN Pan Hi Mun zaklikaŭ da nieadkładnaha spynieńnia hvałtu. Kiraŭnik AAN asudziŭ jak praźmiernaje ŭžyćcio siły izrailskimi vajskoŭcami, tak i rakietnyja abstreły izrailskich punktaŭ paleścinskimi bajevikami.
Da spynieńnia hvałtu zaklikali Jeŭrasajuz i Rasija.
ZŠA uskłali vinu za eskałacyju hvałtu na Blizkim Uschodzie na Chamas.
«Złučanyja Štaty asudžajuć niaspynnyja rakietnyja abstreły terytoryi Izraila i ličać ruch CHAMAS adkaznym za parušeńnie pieramirja i vybuch hvałtu ŭ Hazie», - zajaviła dziaržsaktar ZŠA Kandaliza Rajs paśla sustrečy z prezidentam Bušam.
U toj ža čas ZŠA zaklikali Izrail paźbiahać achviar siarod cyvilnaha nasielnictva.
Adekvatny adkaz
Pradstaŭniki CHAMAS dy inšych hrupovak zajavili pra mabilizacyju svaich sił, hatovych adkazać na bambardiroŭku z boku Izraila.
«CHAMAS praciahnie supraciŭ da apošniaj kropli kryvi», - zajaviŭ pradstaŭnik ruchu Favzi Barchum.
Bajeviki ŭžo vypuścili pa izrailskich haradach niekalki rakiet «Kassam». Pavodle miedykaŭ horadu Nietyvot, heta praviało da achviaraŭ siarod mirnaha nasielnictva: adzin čałaviek zahinuŭ i dvoje paranienyja.
***
Siektar Haza - maleńki paleścinski ankłaŭ na paŭdniovym zachadzie Izraila płoščaj 360 kv km, nasielnictva 1,4 młn čałaviek, ščylnaść nasielnictva takaja ž, jak prykładam, u Bierlinie.
Naradžalnaść adna z samych vysokich u śviecie.
