U efiry «Alfa-radyjo» aficyjnaja pradstaŭnica Śledčaha kamiteta Julija Hančarova paviedamiła, što Vadzim M., dziesiacikłaśnik staŭbcoŭskaj škoły №2, častkova pryznaŭ vinu. Nahadajem, chłopca vinavaciać u zabojstvie dvaich čałaviek i pakušeńni na zabojstva jašče dvaich.
«Naša Niva» źviazałasia z maci Vadzima, kab udakładnić, u čym mienavita chłopiec pryznaje vinu. Ale žančyna paviedamiła, što šmat detalaŭ nie viedaje: maŭlaŭ, jana z synam nie bačycca, nie dajuć. Da Vadzima puskajuć tolki jaho baćku.
Nahadajem, 11 lutaha Vadzim pryjšoŭ u škołu z nažom. Jon zabiŭ nastaŭnicu historyi Marynu Parchimovič, paraniŭ dvuch vučniaŭ, jakija sprabavali abaranić žančynu. Paśla Vadzim vyjšaŭ z kabinieta, zajšoŭ u susiedni pakoj, dzie byli adzinaccacikłaśniki, padyšoŭ da Alaksandra Ramanava i ŭdaryŭ taho nažom u šyju. Ramanaŭ pamior na miescy. Vadzim źbieh, praz paru hadzin jaho zatrymali.
Pa słovach maci, Vadzim kazaŭ baćku, što nie pamiataje, jak zabiŭ 11-kłaśnika Sašu Ramanava.
«Vadzim kazaŭ, što nie chacieŭ zabivać taho adzinaccacikłaśnika. Syn nie pamiataje, jak pajšoŭ u toj pakoj i čamu ŭdaryŭ Ramanava nažom. Kaža, i sam nie viedaje, jak i čamu tak zdaryłasia», — kaža maci Vadzima.
Ale pra zabojstva nastaŭnicy Vadzim vykazvaŭsia adnaznačna, raskazała žančyna. Nastaŭnicu Vadzim zabiŭ śviadoma, patłumačyŭ hetym, što jana jaho «dastała ŭ škole».
Pakul što śledčyja dziejańni pa spravie praciahvajucca.
***
Paźniej z «Našaj Nivaj» źviazaŭsia baćka Vadzima. Mužčyna paviedamiŭ, što słovy jaho žonki interpretavali niapravilna: maŭlaŭ, Vadzim kaža, što jaho «dastali ŭ škole», a nie kankretna pra nastaŭnicu.