«Ja źbirajusia iści na vybary, adnak, kali ŭbaču bolš hodnuju za siabie kandydaturu, to hatovy ŭstupić darohu», — skazaŭ A.Milinkievič.
U sieradu, kantaktujučy z pradstaŭnikami presy, lider Ruchu za Svabodu Alaksandr Milinkievič padzialiŭsia svaimi płanami adnosna ŭdziełu ŭ nastupnych prezidenckich vybarach.
«Času zastałosia niamnoha. Ja dumaju, što navat mieniej za dva hady. Ułada ŭsio ž pojdzie na daterminovaje praviadzieńnie vybaraŭ. Ja byŭ i zastajusia prychilnikam varyjantu adzinaha kandydata ad apazicyi, ale, na žal, heta amal niemahčyma. Pierakanany, što navat z ADS buduć ludzi, jakija buduć vystupać na prarasijskich pazicyjach. Ja nie mahu nazvać kankretnyja proźviščy, ale hetyja ludzi paabiacać chutkaje pryznańnie niezaležnaści Abchazii i Asiecii. Paabiacajuć usio svajo žyćcio budavać sajuz i Rasija, pa‑sapraŭdnamu, nie tak, jak Łukašenka.
Najchutčej, što na vybary my vyjdziem ź niejkim trochkutnikam kandydataŭ: pradstaŭnik namienkłatury, heta budzie ci Łukašenka, ci niechta jašče (a čamu b i nie?), prarasijski i prajeŭrapiejski, prabiełaruski kandydat. Ja źbirajusia iści na vybary, adnak, kali ŭbaču bolš hodnuju za siabie kandydaturu, to hatovy ŭstupić darohu», — skazaŭ A.Milinkievič.
Dyk ci nie čas užo zaraz pačynać novuju prezidenckuju kampaniju?
«Ščyra skažu, mnie zdajecca, što my robim niamała. Usie hetyja pajezdki pa rehijonach, navat kali na sustreču źbirajecca pa dvaccać čałaviek, jany nie pustyja. Jany majuć dosyć vialiki rozhałas u tych haradach, kudy my pryjazdžajem. Naša bližejšaja zadača zrabicca bolš zrazumiełymi i patrebnymi ludziam. Nie jechać da ich ź niejkaj prahramaj, a cikavicca ichnymi prablemami. Šukać šlachi, jak im možna dapamahčy», — skazaŭ lider Ruchu za Svabodu.
Jahony namieśnik Viktar Karniajenka dadaŭ: «My robim usio nastolki, nakolki dazvalajuć nam našy resursy. Heta ciažkoje pytańnie».
Karniajenka taksama zaznačyŭ, što pytańnie nakont adzinaha kandydata nieadnarazova błakavałasia niekatorymi liderami ADS na pasiadžeńniach. «Rašeńnie nakont taho, ci my budziem dziejničać samastojna, ci šukać kampramisu ź inšymi partniorami, jašče nie vyrašanaje», — kaža V.Karniajenka.
Ciapier čytajuć
Akademiju KDB budujuć prosta na Załatahorskich mohiłkach. Ź ziamli dastajuć pareštki minčukoŭ, jakich tut chavali sotni hadoŭ22
Kamientary