U sakaviku 1933 hoda biełaruski mastak Jazep Drazdovič pa zaprašeńni akruhovaj upravy Tavarystva Biełaruskaj Škoły pryjazdžaje ź Vilni ŭ Biełastok, dzie stvaraje dekaracyi dla śpiektaklaŭ, jakija ładzić dramatyčnaja siekcyja TBŠ, što apisaŭ u dziońniku. Im byli namalavanyja dvuchbakovyja pałotny: «Biełaruskaja vioska z vulicaj», «Krajavid», «Pušča» i «Zamčyšča» piša «Radyjo Racyja».
U 1936 hodzie karciny byli pieradadzieny biełaruskamu aktyvistu Kanstancinu Sidaroviču i pralažali bolš za 30 hadoŭ na haryščy jaho pryvatnaha doma. Paźniej uładalnikam dekaracyj stała Hałoŭnaje praŭleńnie Biełaruskaha hramadska-kulturnaha tavarystva ŭ Biełastoku. U 60-70-ch hadach jany časami vykarystoŭvalisia BHKT padčas kulturnickich mierapryjemstvaŭ.
U 2002 hodzie historyk Alena Hłahoŭskaja sa studentami biełastockaha ŭniviersiteta vystavili pałotny na vystavie, što prachodziła ŭ Muziei imia Alfonsa Karnaha. Vystava była prymierkavana da arhanizavanaha joj sieminara, jaki pryśviačaŭsia biełaruskaj kultury ŭ mižvajennaj Polščy. Paśla jany viarnulisia ŭ BHKT, dzie dalej zachoŭvalisia na paddaššy tavarystva bolš za 10 hadoŭ.
U 2015-m Hałoŭnaje praŭleńnie Biełaruskaha hramadska-kulturnaha tavarystva pieradało dekaracyi Padlašskamu muzieju ŭ Biełastoku. Płanavałasia, što ich adrestaŭrujuć i vystaviać u muziei.
Padčas pieradačy Dyrektar Padlašskaha muzieja, historyk Andžej Lachoŭski paćvierdziŭ, što pałotny nadzvyčaj važnyja dla kultury biełaruskaj mienšaści, a taksama dla historyi Biełastoka. Materyjalnych śviedčańniaŭ pra žyćcio biełaruskaj supolnaści ŭ mižvajennaha pieryjad zachavałasia niašmat. Dobra zadakumientavana kulturnaje žyćcio polskaj supolnaści, habrejskaj, niamieckaj krychu mienš, a biełaruskaj amal niama. Heta važny elemient u šmatkulturnaj mazaicy rehijona.
My vyrašyli źviarnucca ŭ Padlašski muziej, kab daviedacca, dzie zaraz znachodziacca pracy Drazdoviča, jak vyhladaje sprava z restaŭracyjaj i ci buduć jany vystaŭleny. «Pałotny buduć restaŭravanyja, choć my aceńvajem ich stan jak dobry, — adkazali ŭ muziei. — Kali atrymajem srodki, to ŭ 2020 pałotny buduć zakansiervavany i vystaŭleny».
Kamientary