Ilustracyjny zdymak. Fota Siarhieja Hudzilina.
26 maja ŭ Krupskim rajonie ciažka paranili jehiera. Inśpiektar achovy žyviolnaha i raślinnaha śvietu sustreŭ u lesie kala vioski Vialikija Žabieryčy mužčynu sa strelbaj.
«Na prośbu pradjavić dakumienty na zbroju mužčyna zrabiŭ adzin streł z palaŭničaj strelby ŭ hałavu jehiera i ŭciok u nieviadomym kirunku», — paviedamlaŭ Śledčy kamitet.
Inśpiektar vyžyŭ, ale trapiŭ u reanimacyju ŭ ciažkim stanie.
Pa infarmacyi telehram-kanała Nexta, toj, chto stralaŭ u jehiera, paśpieŭ ździejśnić suicyd.
Heta paćviardžajuć i miascovyja žychary: cieła ŭradženca Žabieryčaŭ Uładzimira Hvaździova znajšli na viaskovych mohiłkach.
Padrabiaznaści raspavioŭ «Našaj Nivie» staršynia Chaciuchoŭskaha sielsavieta Viktar Kostrykaŭ.
Hvaździovu było trochi bolš za 60 hadoŭ. Jon žanaty, maje darosłaha syna. Razam z žonkaj žyŭ u susiednim ahraharadku Łošnica. Pracavaŭ to tut, to tam, jeździŭ «šabašyć» u Rasiju. Kažuć, z ałkaholem prablem nie mieŭ.
Sam Hvaździoŭ rodam ź Vialikich Žabieryč. Tut žyli jaho baćki, jakija daŭno pamierli. Hvaździoŭ pryhladaŭ za chataj, jakaja zastałasia paśla baćkoŭ, chadziŭ na rybu, na palavańnie. Letam šmat času baviŭ u Žabieryčach, pakul žonka zastavałasia ŭ Łošnicy.
Na dumku miascovych, Hvaździoŭ brakańjeryŭ. Uskosna heta paćviardžajecca i tym, što ŭ ladoŭni ŭ jaho znajšli miasa dzikaha kaźlaniaci.
Čym skončyłasia hetaje brakańjerstva, užo viadoma.
26 maja paśla taho, jak u jehiera stralali, milicyja zatrymała mužčynu, jakoha padazravali ŭ sprobie zabojstva. Ale paźniej stała zrazumieła, što heta nie jon.
Milicyjanty pajšli pa padvorkach Vialikich Žabieryč apytvać miascovych. I ŭ adnoj z chat raptam znajšli raskidanyja rečy, instrumienty — ale haspadara nie było. Pryčym chata stajała z adčynienymi dźviaryma. Heta i była baćkoŭskaja chata Hvaździova.
Siłavikoŭ situacyja naściarožyła. Praviali vobšuk, u chacie znajšli brakańjerski nabor: patrony, porach, elektravudu, miasa dzikaj žyvioły.
Hvaździova pačali šukać. Pračasali les, ačapili terytoryju: dumali, što ci to chavajecca ŭ lesie, ci to źbieh. Ale cieła Hvaździova znajšli na mohiłkach. Jon pryjšoŭ na mahiłu baćkoŭ i streliŭ u siabie.
Mužčyna zastreliŭsia z toj ža strelby, ź jakoj byŭ paranieny inśpiektar.
