Jašče adna viersija Minabarony: tanki prateściać jakaść daroh
Ci daviadziecca pierakładvać asfalt na mienskich vulicach paśla paradu 3 lipienia? Što robicca, kab nie paškodzić pakryćcio daroh? Svaboda spytała ŭ Ministerstvie abarony.
U Ministerstvie abarony ličać, što, «jak praviła, vialikaj škody daroham nie nanosicca». Tam spasyłajucca na mierkavańni inžyneraŭ-darožnikaŭ. Pavodle ich, u tankaŭ (u tym liku madernizavanych T-72B3, jakija majuć šyrejšuju pavierchniu husienicy) i ŭ luboj husieničnaj techniki ŭdzielnaja vaha na hrunt značna nižejšaja, čym u ciažkaj kołavaj techniki.
«Kali niedzie i parušana pakryćcio, to havorka idzie pra parušeńnie technalohij vytvorčaści asfaltu i samoha pakryćcia. Tamu heta svojeasablivy test na jakaść. Darečy, kali letaś va Ŭruččy pakłali novuju darohu, adbyłosia testavańnie z dapamohaj kalony, nivodnaj navat pałoski nie było. Za vyklučeńniem mienavita stykoŭki sa staroj darohaj, niedzie kala metra, što pakazała, što parušana technalohija», — skazaŭ karespandentu Svabody presavy sakratar Ministerstva abarony Ŭładzimier Makaraŭ.
Čytajcie taksama: «Tam horka». Minabarony patłumačyła, čamu tanki raskatvajuć novy asfalt na praśpiektach biez humovych nakładak
Letaś na praspekcie Niezaležnaści ŭ Miensku praź niekalki chvilin paśla viartańnia vajskovaj techniki z paradu darožnyja słužby pačali ramantavać asfalt.
U 2017 hodzie deputatka Hanna Kanapackaja nakiroŭvała zapyt adnosna taho, kab vynieści vajskovyja parady za miežy Miensku.
Ministar abarony Biełarusi Andrej Raŭkoŭ adkazaŭ, što pieranos vajskovaha paradu za miežy Miensku pryviadzie da rostu vydatkaŭ na jaho padrychtoŭku.
Tady ž petycyi hramadzianaŭ nakont praviadzieńnia ŭ centry Miensku vajskovych paradaŭ i pieraniasieńnia ich za miežy stalicy byli nakiravanyja ŭ administracyju Alaksandra Łukašenki i ŭ Ministerstva abarony.
Raniej kiroŭcy skardzilisia, što paśla paradaŭ adčuvalna psujecca pakryćcio daroh.
«Paśla tankaŭ — jak pa pralnaj došcy»
Pavodle Makarava, sioleta kolkaść husieničnaj techniki źmienšana ŭdvaja. Kali raniej u paradzie brali ŭdzieł da 9 uzoraŭ husieničnaj techniki, to ciapier tolki 4.
Vyvučałasia i pytańnie vykarystańnia asfaltna-chadavych bašmakoŭ na sučasnych tankach.
«Ale jany nie nabyvalisia z toj prostaj pryčyny, što kali technika sychodzić ź miesca praviadzieńnia paradu i kab technika nia stała, joj treba dalej na peŭnych učastkach raźvić chutkaść da 40 kilametraŭ u hadzinu. Ale pry takoj chutkaści asfaltna-chadavyja bašmaki prosta źlatajuć, ich vykarystańnie niebiaśpiečnaje».
U Ministerstvie abarony supakojvajuć, što škody asfaltu nia budzie.
«Uličvajučy, što cisk, jaki robiać na darožnaje pakryćcio husieničnyja mašyny, značna mienšy, čym toj, jaki robiać kołavyja vialikahruzy, možna być absalutna spakojnymi, što škody nia budzie», — skazaŭ Uładzimier Makaraŭ.
Ci mahčyma padvozić husieničnuju techniku da miesca paradu, kab skaracić jaje šlach pa asfalcie? Pavodle Makarava, na paradzie budzie demanstravacca ciahač vahoj da 60 ton z ustanoŭlenym na jaho tankam T-72.
«Dyk voś udzielnaja vaha hetaha ciahača bolšaja, čym samoha tanka. Tearetyčna ŭsiu techniku možna pastavić na hetyja ciahačy, pryvieźci, razhruzić, pahruzić, zaniaŭšy prastoru i pavialičyŭšy ŭ niekalki razoŭ čas na razhortvańnie. Ale ludziam heta nie spadabajecca, kali ŭ niekalki razoŭ pavialičycca čas na vysoŭvańnie kalony i ŭsiaho astatniaha».
Ciapier čytajuć
Na pamiatnaj banknocie da hadaviny Pieramohi źmiaścili nieisnujučuju biełaruskuju słavutaść3
Kamientary