Davać abiacańni i ich nie vykonvać — heta zvykłaja prajava palityčnaha stylu Łukašenki. Piša ŭ svaim błohu na sajcie radyjo Svaboda Valer Karbalevič
U žniŭni minułaha hodu paśla Kaŭkaskaj vajny kiraŭnik Biełarusi, raskrytykavany rasiejskimi medyjami za neŭtralnuju pazycyju, pajechaŭ u Sočy na pieramovy ź Miadźviedzievym, kab apraŭdacca. I tam byŭ vymušany sustrecca z prezydentami Paŭdniovaj Asetyi i Abchazii, jakich ščyra zapeŭniŭ u svajoj padtrymcy.
Ale kali paŭstała pytańnie pra pryznańnie ŭśled za Rasiejaj niezaležnaści Paŭdniovaj Asetyi i Abchazii, to Łukašenka pačaŭ chitravać.U pasłańni Miadźviedzievu jon paabiacaŭ pryznać hetyja respubliki, ale tolki razam z čalcami arhanizacyi ADKB. Adnak samit ADKB skončyŭsia dla Rasiei pravałam. 8 vieraśnia na presavaj kanferencyi dla rasiejskich žurnalistaŭ Łukašenka zajaviŭ, što hetaje pytańnie budzie razhledžana novym biełaruskim parlamentam, jaki na toj čas jašče nia byŭ abrany. I voś čarhovaje abiacańnie kiraŭniku Paŭdniovaj Asetyi, jakoje biełaruski lider daŭ padčas traŭrnych cyrymonij, kali chavali patryjarcha Alaksija II.
Davać abiacańni i ich nie vykonvać — heta zvykłaja prajava palityčnaha stylu Łukašenki. Čamu ŭ dadzienym vypadku kiraŭnik Biełarusi nie śpiašajecca pryznavać hetyja novaŭtvareńni?
Pa‑pieršaje, kab nie sapsavać dyjaloh z Zachadam, jaki aktyŭna praciahvajecca i ŭžo daŭ praktyčny plon (prypynieńnie vizavych sankcyj, kredyt MVF).
Pa‑druhoje, Łukašenka racyjanalna razvažyŭ, što kali dla Rasiei hetaje pytańnie važnaje, to niachaj jana za heta zapłacić. Pryznańnie niezaležnaści Paŭdniovaj Asetyi i Abchazii stała pradmietam palityčnaha torhu. Musić, kiraŭnik Biełarusi paličyŭ, što Maskva prapanuje za hety tavar nizkuju canu, tamu pryznańnie pakul i nie adbyłosia.
Pa‑treciaje, pryznańnie niezaležnaści Paŭdniovaj Asetyi i Abchazii źjaviłasia b peŭnym maralnym i palityčnym prynižeńniem Łukašenki. Bo ŭ hetym pytańni Rasieja apynułasia ŭ mižnarodnaj izalacyi. Samaabvieščanyja dziaržavy pryznała tolki Nikarahua, heta admovilisia zrabić navat najbližejšyja sajuźniki Rasiei pa ADKB. U takoj sytuacyi pryznańnie Mienskam niezaležnaści Paŭdniovaj Asetyi i Abchazii budzie vyhladać u vačach mižnarodnaj supolnaści jak pakaźnik niesamastojnaści Biełarusi, nibyta zamacavańnie statusu rasiejskaha satelita.
A Łukašenka ž pretenduje na rolu palityka mižnarodnaha maštabu.Heta paćviardžajecca šmatlikimi faktami. Tak, apošnim časam jon šmat razoŭ paŭtaraŭ, što ŭ čas kryzisu biełaruskaja ekanamičnaja madel pryznanaja va ŭsim śviecie. Nie vypadkova biełaruskija dziaržaŭnyja medyi nie paviedamili pra sustreču Łukašenki ź liderami Paŭdniovaj Asetyi i Abchazii na pachavańni patryjarcha.
Pa‑čaćviertaje, Łukašenka razumieje, što pryznańniem sprava nie abmiažujecca. Paŭdniovaja Asetyja i Abchazija buduć pliščycca z padačy Maskvy ŭ sajuznuju dziaržavu Biełarusi i Rasiei. A heta pieratvaraje vialikuju ideju abjadnańnia słavianskich narodaŭ u niejki fars, parodyju. Adna sprava — stvarać sajuznuju dziaržavu z Rasiejaj, pretendavać na roŭny status ź joj, zasiadać razam z Pucinym i Miadźviedzievym, hanarova być staršyniom vyšejšaha dziaržsavieta sajuznaj dziaržavy. I voś u hetaj kampanii źjaŭlajucca dźvie vidavočnyja maskoŭskija maryjanetki, kiraŭniki drabniutkich utvareńniaŭ.
Nasielnictva Paŭdniovaj Asetyi pa kolkaści roŭnaje liku žycharoŭ Škłoŭskaha rajonu. Dla Łukašenki heta prynižeńnie ŭ kvadracie.Akramia taho, u lubym pytańni hetyja maryjanetačnyja respubliki buduć adnaznačna padtrymlivać Rasieju, Biełaruś budzie zaŭsiody ŭ mienšaści.
Navošta ŭsio heta treba Łukašenku? Ale ž tak jon skazać nia moža, bo mocna zaležyć ad padtrymki Rasiei.
Tamu Łukašenka hulaje. Jon hulec pa svajoj palityčnaj pryrodzie, pryčym azartny. Tamu ŭsim abiacaje.Zachadu abiacaje demakratyzacyju, MVF — rynkavyja reformy, Ukrainie — padtrymku prajektu Eŭraazijackaha naftatranspartnaha kalidoru. Rasiei Łukašenka abiacaje, što tanki na Maskvu praź Biełaruś nia projduć, Paŭdniovaj Asetyi i Abchazii — chutkaje pryznańnie ich niezaležnaści. I kožnym razam raźličvaje, što ad vykanańnia hetych abiacańniaŭ udasca niejak adkrucicca.
Jašče adna zvykłaja maniera Łukašenki — pradavać adzin tavar adnamu i tamu ž pakupniku šmat razoŭ. Voś Rasiei jon užo amal paŭtara dziasiatki hadoŭ pradaje intehracyju i atrymlivaje za heta niebłahija dyvidendy. Apošnim časam pačaŭ pradavać Zachadu demakratyčnyja i rynkavyja reformy ŭ Biełarusi, i, zdajecca, hetaha tavaru chopić na šmat hadoŭ. A kaštoŭnaść takoha tavaru, jak pryznańnie (albo niepryznańnie) niezaležnaści Paŭdniovaj Asetyi i Abchazii, palahaje ŭ tym, što jaho možna pradavać adnačasova i Rasiei, i Zachadu.
Dyk usio ž taki — ci pryznaje Biełaruś niezaležnaść Paŭdniovaj Asetyi i Abchazii, ci nie?
Dumaju, adkazu na hetaje pytańnie ciapier nia viedaje i sam Łukašenka. Usio budzie zaležać ad palityčnaj kańjunktury.Spačatku treba dačakacca ad EZ poŭnaj admieny vizavych sankcyj, potym źjeździć u Prahu na samit dziaržaŭ‑udzielnic prahramy «Ŭschodniaje partnerstva». I voś paśla hetaha, kali Rasieja źnizić ceny na haz u druhim paŭhodździ, usio ž vydzielić kredyt u 100 młrd. rasiejskich rubloŭ, jaki ŭ jaje prasili, to možna budzie i pryznać.
13 studzienia, naviedvajučy UP «Biełkamunmaš», Łukašenka na pytańnie pra niečakanuju devalvacyju adkazaŭ, što jon namiakaŭ pra jaje ŭ svaim pieradnavahodnim interviju, «kali chtości ŭmieje mianie słuchać». Apošnija słovy vielmi pryncypovyja. Łukašenku treba ŭmieć słuchać — i nie razumieć litaralna.
Ciapier čytajuć
«Astravok Paŭnočnaj Karei». Baranavickaja škoła vykaciła śpis patrabavańniaŭ da vyhladu vučniaŭ54
«Astravok Paŭnočnaj Karei». Baranavickaja škoła vykaciła śpis patrabavańniaŭ da vyhladu vučniaŭ
Mistyčnaje koła Vilni: Kalinoŭski byŭ pachavany ź miedaljonam śviatyni, kala jakoj vyras hatyčny pałac doktara z-pad Oršy. Ciapier pareštki Kalinoŭskaha pierapachavali ŭ mahilni taho ž doktara1717
Kamientary