16-ja sutki idzie akcyja pratestu «Maładoha frontu»

16-ja sutki praciahvajecca estafetnaja haładoŭka aktyvistaŭ niezarehistravanaj arhanizacyi «Małady front». Na siońniašni dzień haładajuć 23 čałavieki. Jany arandavali kvateru ŭ Miensku, kab trymacca razam. Haładoŭku apazycyjanery abviaścili 29 traŭnia.

Napačatku ŭ akcyi ŭdzielničali bolš za čatyry dziasiatki čałaviek. Potym niepaŭnaletnija spynili haładoŭku na prośbu kiraŭnictva arhanizacyi. Jašče niekalki čałaviek vyjšli z haładoŭki z pryčyny stanu zdaroŭja. Ale da akcyi dałučylisia novyja ŭdzielniki.

Haładoŭniki, u asnoŭnym siabry niezarehistravanaj arhanizacyi «Małady frot», patrabujuć spynić kryminalnyja spravy suprać aktyvistaŭ svajoj arhanizacyi, vyklučeńni z navučalnych ustanovaŭ za ŭdzieł u apazycyjnych akcyjach, pieraśled viernikaŭ-chryścijanaŭ, a taksama vyzvalić usich palitviaźniaŭ.

Udzielniki akcyi pratestu arandavali pryvatnuju kvateru, dzie buduć trymacca razam. Pakul tam znachodzicca kala dziasiatka čałaviek. Apazycyjanery planujuć, što ciaham sutak ich kolkaść uzraście ŭdvaja. Sustaršynia niezarehistravanaj arhanizacyi «Małady front» Źmicier Daškievič haładaje 13-ja sutki. Jon dałučyŭsia da akcyi, jak tolki vyjšaŭ na volu paśla adbyćcia aryštu ŭ turmie na Akreścina. Źmicier maje prablemy sa zdaroŭjem, ale nie pakidaje akcyi.

(Daškievič: ) «Aktyvisty jašče padjaždžajuć siudy sa ŭsio Biełarusi. My planujem, što ŭ adnoj kvatery buduć znachodzicca kala 15 čałaviek i pravodzić akcyju razam. Astatnija zajmajucca svaimi spravami – tam, dzie žyvuć. Pakul jany ŭ stanie fizyčna ruchacca, buduć haładać, a potym buduć, napeŭna, vychodzić z haładoŭki, bo nie va ŭsich atrymlivajecca pryjechać u Miensk. Dla nas samaje hałoŭnaje – uźniać prablemy ŭ hramadztvie: represii suprać moładzi, palitźniavolenyja, zakryćcio chryścijanskich cerkvaŭ».

Artur Fińkievič, jaki zajmajecca arhanizacyjnymi pytańniami, niepakoicca za svajho siabra. Havoryć Artur Fińkievič:

(Fińkievič: ) «Siońnia stan zdaroŭja Źmitra Daškieviča pahoršyŭsia. Jon zachvareŭ, u jaho padvysiłasia temperatura. Ale jon nie źbirajecca spyniacca na hetym. Jon nia spynicca ni pierad čym. Heta mužny, addany, ščyry čałaviek, jak i tyja ludzi, jakija ciapier znachodziacca pobač ź im, patrabujučy spynić pieraśled maładafrontaŭcaŭ i kryminalnuju spravu suprać «Maładoha frontu».

U mienskaj kvatery siarod haładoŭnikaŭ Aleś Papłyka. Jon haładaje vośmyja sutki. Chłopiec pryjechaŭ z Mahilova, kab być razam ź inšymi ŭdzielnikami akcyi.

(Papłyka: ) «Inšych metadaŭ niama – jak jašče vykazać svajo staŭleńnie da taho, što adbyvajecca ŭ krainie? My budziem haładać stolki, kolki patrebna, kab dabicca svaich patrabavańniaŭ… Jeści nia chočacca. Narmalova siabie adčuvaju. Hałava tolki krychu balić… A tak, usio narmalova. Budziem trymacca».

Aficyjnyja ŭłady dahetul nie dali adkazu na zvaroty apazycyjaneraŭ. Pavodle zakanadaŭstva, zajavu, nakiravanuju ŭ prakuraturu z patrabavańniem spynić kryminalnyja spravy suprać maładafrontaŭcaŭ, mohuć dałučyć da kryminalnaj spravy. U inšym vypadku adkaz musiać dać zajaŭnikam ciaham miesiaca. Ad pačatku haładoŭki niekalkich udzielnikaŭ akcyi vyklikali da śledčych, kab tyja dali tłumačeńni ŭ kryminalnaj spravie suprać maładafrontaŭcaŭ.

Radyjo Svaboda

• 0
• 0
• 0
• 0
• 0
• 0
• 0
• 0