Bymedia.net
U efiry dziaržaŭnaha telekanała «Biełaruś-1» vydańnie «Ježiednievnik» i jaho hałoŭnaha redaktara abvinavacili ŭ publikacyi zamoŭnych artykułaŭ i «žurnalisckim kilerstvie», piša Radyjo Svaboda.
BT pakazała VIDEA sa schavanaj kamiery, jak redaktar Ej.by Siarhiej Sacuk atrymaŭ kanviert ad biznesmiena
Telekanał pakazaŭ videa, źniataje schavanaj kamieraj u ofisie «adnaho viadomaha biznesoŭca» u studzieni 2019 hoda, na jakim Siarhiej Sacuk sustrakajecca z pradstaŭnicaj biznesoŭca Viktara Miadźviedskaha (jon ciapier adzin z padazravanych u spravie ab uchileńni ad padatkaŭ). Apošni nibyta prapanoŭvaŭ Sacuku 3000 dalaraŭ i infarmacyju dla rasśledavańnia dziejnaści inšaj kampanii Macopharma i prodažy miedycynskich tavaraŭ pa zavyšanych cenach.
BT śćviardžaje, što Sacuk za 5000 dalaraŭ (pieršaja častka hrošaj, 2000 dalaraŭ, była pieradadzienaja ŭ listapadzie 2018 hodu) padrychtavaŭ i apublikavaŭ artykuł «Korrupcija Minzdrava: kak v Biełarusi zarabatyvajut na krovi». Telekanał zaklikaje «acanić dziejnaść žurnalista z kryminalna-pracesualnaha boku».
Siarhiej Sacuk raskazaŭ Svabodzie, što sapraŭdy atrymlivaŭ hrošy ad Miadźviedskaha, ale bačyć situacyju inačaj.
Jon raskazaŭ, što abviaščaŭ zbor hrošaj na žurnalisckija rasśledavańni, jak rabili i inšyja niedziaržaŭnyja ŚMI. Usie hrošy, pierakanany jon, atrymanyja zakonna, ź ich buduć spłočanyja padatki. Pra heta jon raskazvaŭ i na staronkach «Ježiednievnika» — častkova pra heta zhadali i na BT. Pavodle Sacuka, prastaŭnica Miadźviedskaha dała jamu hrošy nie na publikacyju zamoŭnaha artykuła, a na praviadzieńnie rasśledavańniaŭ, i dała materyjały, jakija mieła. Samo rasśledavańnie pravodziŭ jon i polskija kalehi.
Skardzicca na siužet BT abo sudzicca z telekanałam Sacuk prynamsi pakul nie źbirajecca.
