«Novy čas»: Z aktyvami ŭłaśnikaŭ «Pajedziem pajadzim» źviazanyja mutnyja spravy
Vynikam novaha rasśledavańnia Dzianisa Ivašyna, apublikavanaha ŭ «Novym časie» stała infarmacyja pra toje, što z aktyvami ŭłaśnikaŭ restaracyjna-zabaŭlalnaha kompleksu «Pojediem pojedim» (kolišni «Bulbaš'-chołł») źviazanyja parušeńni zakanadaŭstva, likvidacyjnyja pracesy, i navat śledčyja dziejańni ŭ miežach kryminalnych spravaŭ. A kampanija maci partniora ŭłaśnika «Pojediem pojedim» zarehistravanaja pa tym ža adrasie, što i kampanija, jakaja stajała za najbujniejšaj finansavaj afioraj našaha času.
Ukraina
Začepkaj dla novaha rasśledavańnia stałasia najaŭnaja infarmacyja pra kryminalnuju spravu, raspačatuju śledčymi orhanami Ukrainy ŭ dačynieńni da ŭžo likvidavanaj kampanii TAA «SK B.T.S.» — supolnaha aktyvu Leanida Zajdesa i Barysa Surysa. Pra ŭkrainskija aktyvy ŭłaśnikaŭ «Pojediem pojedim» — polska-ŭkrainski chołdynh TAA «MAH-2000» i kampaniju TAA «SK B.T.S.» — zhadvali jašče ŭ samym pieršym rasśledavańni. Dola Zajdesa i Surysa ŭ kampanii «MAH-2000» składaje 70%, stolki ž jany supolna mieli i ŭ likvidavanaj «SK B.T.S.».
Pradpryjemstva «SK B.T.S.» źjaŭlałasia adnym z samych pieršych supolnych aktyvaŭ Zajdesa—Surysa i było zarehistravanaje ŭ 1994 hodzie ŭ Kijevie. Kampanija zajmałasia budaŭnictvam i hruzapieravozkami, a taksama dziejničała na rynku kaštoŭnych papier, u vyniku čaho pryciahvałasia da adkaznaści praz ździejśnienyja pravaparušeńni. Niahledziačy na toje, što kampanija likvidavanaja, jana dasiul maje padatkovuju zapazyčanaść. Kali ŭ traŭni 2018 hoda suma zapazyčanaści była 51000 hryŭniaŭ, to stanam na 20.08.2019 ahulnaja zapazyčanaść pierad miascovym biudžetam składaje ŭžo amal 2,17 miljona hryŭniaŭ (bolš za 86 tysiač dołaraŭ).
U krasaviku 2018 hoda, za niekalki miesiacaŭ da likvidacyi «SK B.T.S.», dva razy źmianiałasia arhanizacyjna-pravavaja forma kampanii — spačatku jana była rearhanizavanaja ŭ pryvatnaje akcyjaniernaje tavarystva, adnak užo praz dva tydni joj viarnuli pieršapačatkovuju formu. Vyznačana, što kampanija SK B.T.S.» była likvidavanaja šlacham dałučeńnia da druhoj kijeŭskaj kampanii Zajdesa—Surysa «MAH-2000» u červieni 2018 hoda, jakaja źjaŭlajecca zaraz jaje pravanastupnicaj.
Kampanija «MAH-2000» była zarehistravanaja ŭ 2000 hodzie ŭ Kijevie. Jana zajmajecca vytvorčaściu navahodnich i kaladnych tavaraŭ, maje zavod u Słucku. Charakterna, što suprać hetaha druhoha ŭkrainskaha aktyvu Zajdesa—Surysa była raspačataja kryminalnaja sprava praz prykmiety kryminalnaha pravaparušeńnia, praduhledžanaha častkaj 5 artykuła 191 KK Ukrainy (prysabiečvańnie, rastrata majomaści abo zavałodańnie joju šlacham złoŭžyvańnia słužbovym stanoviščam). Śledstva padazravała słužbovych asobaŭ TAA «MAH-2000» u raskradańni ŭ 2015 hodzie biudžetnych hrošaj na sumu bolš za paŭmiljona hryŭniaŭ (na toj čas amal 19 500 dołaraŭ). Stanam na siońnia my nie majem aficyjna paćvierdžanaj infarmacyi adnosna spynieńnia hetaj spravy.
Stali viadomyja asablivaści novaj kryminalnaj spravy, raspačataj užo ŭ dačynieńni likvidavanaj «SK B.T.S.». Hałoŭnaje ŭpraŭleńnie Dziaržaŭnaj fiskalnaj słužby (DFS) pa Kijevie pravodzić dasudovaje rasśledavańnie pavodle prykmietaŭ ździajśnieńnia kryminalnaha złačynstva, praduhledžanaha častkaj 1 artykuła 212 KK Ukrainy. Z chadajnictva staršaha śledčaha HU DFS pa Kijevu Ihara Sukača Piačerskamu rajonnamu sudu pra nadańnie časovaha dazvołu na dostup da rečaŭ i dakumientaŭ kampanii vynikaje, što słužbovyja asoby TAA «SK B.T.S.» u pieryjad z 2015 pa 2018 hady praz užyvańnie niasłušnaj staŭki źmienšyli spłatu arendy za ziamielnuju dzialanku na ahulnuju sumu amal 1,7 miljona hryŭniaŭ (zvyš za 66 tysiač dołaraŭ), to-bok uchililisia ad spłaty padatkaŭ, praduhledžanych zakanadaŭstvam. Heta spryčyniłasia da faktyčnaha niepastupleńnia ŭ biudžet finansavych srodkaŭ u značnym pamiery.
Zhodna z rašeńniem suda, staršamu śledčamu, padpałkoŭniku padatkovaj milicyi Iharu Sukaču, a taksama 13 čalcam jaho śledčaj hrupy nadadzieny časovy dostup da aryhinałaŭ dakumientaŭ kampanijaŭ TAA «SK B.T.S.» i «MAH-2000».
Z materyjałaŭ śledstva vynikaje, što ŭ śniežni 2000 hoda TAA «SK B.T.S.» uchvaliła z Kijeŭskaj haradskoj radaj damovu na prava časovaha doŭhatryvałaha karystańnia ziamloju terminam na 24 hady dla ekspłuatacyi dy absłuhoŭvańnia składskich budynkaŭ, jakija taksama mieła prava zdavać u subarendu. Arendavanaja ziamielnaja dzialanka z ahulnaj płoščaj 1,1118 ha znachodzicca na vuł. Radystaŭ, 73 u Dziaśnianskim rajonie Kijeva, tam ža znachodzicca i TAA «MAH-2000».
Heta terytoryja ŭvachodzić u viadomuju va Ukrainie miascovaść Bykaŭnia, u jakoj znachodziacca «Bykaŭnianskija mahiły» — najbolšaje va Ukrainie miesca pachavańnia achviaraŭ stalinskich represijaŭ 1937—1941 hadoŭ i polskich aficeraŭ z tak zvanaha «katynskaha śpisu». U 1930-ja hady ŭ hetaj miascovaści, jak i ŭ Kurapatach pad Minskam, byŭ stvorany śpiecabjekt NKUS. Pavodle roznych acenak navukoŭcaŭ, u «Bykaŭnianskich mahiłach» kolkaść pachavanych moža siahać ad 30 da 100 tysiač i navat bolš asobaŭ, zakatavanych savieckim režymam.
U miežach dasudovaha rasśledavańnia vyznačana, što z 2008 hoda pa kaniec krasavika 2018-ha «SK B.T.S.» zdavała ŭ arendu ŭłasnyja składskija pamiaškańni kampanii TAA «Deviłon». My vyrašyli spraŭdzić i znajści ŭsiu najaŭnuju infarmacyju pra hetuju kampaniju, jakaja zaraz fihuruje ŭ materyjałach novaj kryminalnaj spravy i moža być niejkim čynam źviazanaja z ułaśnikami «Pojediem pojedim».
TAA «Deviłon» (ukr. TOV «Dieviłon») zarejestravanaje ŭ śniežni 1998 hoda ŭ Kijevie. Asnoŭnym vidam dziejnaści źjaŭlajecca nieśpiecyjalizavany aptovy handal. Adnaasobny ŭłaśnik kampanii — Bierazoŭskaja Alena Anatoleŭna.
Pra Alenu Bierazoŭskuju viadoma, što jana naradziłasia ŭ 1965 hodzie, skončyła siaredniuju škołu №7 u Słucku i Minski dziaržaŭny piedahahičny instytut imia A.M.Horkaha.
Cikava, što, zhodna z paznačanymi ŭ adkrytym dostupie rehistracyjnymi dadzienymi, bienieficyjaraŭ kampanijaŭ TAA «MAH-2000» i TAA «Deviłon» Leanid Zajdes i Alena Bierazoŭskaja majuć identyčny adras pražyvańnia ŭ Minsku.
Biełaruś
Z dapamohaj adkrytych krynicaŭ infarmacyi vyznačana, što kijeŭskaja kampanija «Deviłon» uvachodzić u Hrupu kampanijaŭ «Dieviłon», samaje pieršaje pradpryjemstva jakoj było adkrytaje na terytoryi Biełarusi ŭ 1994 hodzie. Hrupa maje svaje aktyvy ŭ bujnych haradach Rasii, Ukrainy i ŭ Biełarusi. Śpiecyjalizujecca pieradusim na aptovym handli dziciačymi cackami, kancylarskimi tavarami i navahodnim asartymientam.
Pavodle infarmacyi, nadadzienaj Ministerstvam justycyi Biełarusi, TAA «Dzieviłon» zarehistravana 7 krasavika 1994 hoda administracyjaj Leninskaha rajona Minska. Asnoŭnym vidam dziejnaści źjaŭlajecca taksama nieśpiecyjalizavany aptovy handal tavarami. Napačatku kampanija impartavała ŭ Biełaruś parfumu i dekaratyŭnuju kaśmietyku izrailskaj vytvorčaści, adnak zatym pieraaryjentavałasia na impart z Rasii i Kitaja pančochava-škarpetnych vyrabaŭ, dziciačych cacak i kancylarskich tavaraŭ.
Uvachod u minski ofis kampanii TAA «Dzieviłon» (pr. Pieramožcaŭ, 7a, of.56b, BC «Rojał Płaza»).U siaredzinie nulavych hadoŭ Leanid Zajdes zajmaŭ u minskim pradstaŭnictvie «Dzieviłon» pasadu namieśnika dyrektara, a Alena Bierazoŭskaja vykonvała funkcyi mieniedžara. U skład ułaśnikaŭ pradpryjemstva Bierazoŭskaja była ŭviedzienaja jašče ŭ 2001 hodzie, a z krasavika 2017 hoda jana maje status adnaasobnaha ŭłaśnika kampanii.
U 2015 hodzie Bresckaja abłasnaja inśpiekcyja Dziaržstandartu vyjaviła niebiaśpiečnuju pradukcyju — školnyja rancy kitajskaj vytvorčaści, jakija realizoŭvalisia ŭ adnym z handlovych siecivaŭ i imparcioram jakich u Biełaruś źjaŭlałasia kampanija TAA «Dzieviłon». U vyniku pravierki było vyznačana, što hetaja pradukcyja nie adpaviadała patrabavańniam techničnaha rehłamientu «Pra biaśpieku pradukcyi, pryznačanaj dla dziaciej i padletkaŭ». Aproč hetaha, u vyniku łabaratornych daśledavańniaŭ na padstavie ździajśnieńnia dziaržaŭnaha sanitarnaha nahladu za abaračeńniem cacak, i ŭ 2015, i ŭ 2016 hadach było vyznačana, što niekatoryja partyi pradukcyi, impartavanaj kampanijaj u Biełaruś z Kitaja, nie adpaviadajuć sanitarna-epidemijałahičnym i hihijeničnym patrabavańniam, a taksama pakaźnikam biaśpieki dla dziaciej. U vyniku vyjaŭlenych parušeńniaŭ namieśnik ministra achovy zdaroŭja — hałoŭny dziaržaŭny sanitarny lekar RB zabaraniŭ abaračeńnie na terytoryi Biełarusi partyi niebiaśpiečnaj dla dziaciej pradukcyi i abaviazaŭ kampaniju vyniać jaje z abarotu (1, 2, 3).
Cikava, što na praciahu amal 13 hadoŭ razam z Alenaj Bierazoŭskaj saŭłaśnikam kampanii TAA «Dzieviłon» da 2014 hoda byŭ Vital Leanidavič Marchasin. Jon źjaŭlaŭsia asnoŭnym zasnavalnikam TAA «Antasam», nad słužbovymi asobami jakoj u 2014 hodzie pačaŭsia sudovy praces za kryminalnyja złačynstvy, ździejśnienyja, pavodle vynikaŭ śledstva, padčas budaŭnictva ŭ Minsku žyllovaha kompleksu «Samaćviety».
Fihuranty kryminalnaj spravy abvinavačvalisia ŭ kradziažy hrašovych srodkaŭ udzielnikaŭ dolevaha budaŭnictva, jakoje pieratvaryłasia ŭ daŭhabud. Pavodle infarmacyi pres-słužby KDB, u abvinavačanych byli vyjaŭlenyja 18 kiłahramaŭ zołata ŭ źlitkach NB RB, abjekty nieruchomaści, transpartnyja srodki i vialikija sumy najaŭnych i bieznajaŭnych hrašovych srodkaŭ. Admietna, što razhlad kryminalnaj spravy tady asabista anansavaŭ Alaksandr Łukašenka, jaki raskryŭ dadatkovuju infarmacyju, što akurat u zołata pieravodzilisia skradzienyja ŭ dolnikaŭ hrošy. Adnak paśla peŭnaha času trymańnia pad vartaj Vital Marchasin byŭ vyzvaleny i praciahvaŭ budaŭnictva žyllovaha kompleksu. Sama ž kampanija «Antasam» z 16 lipienia 2019 hoda znachodzicca ŭ pracesie likvidacyi, ekanamičnym sudom Minska ź lipienia 2019 hoda raspačataja pracedura bankructva.
U krasaviku 2017 hoda praz rearhanizacyju ŭ formie vyłučeńnia z TAA «Dzieviłon» była stvoranaja novaja jurydyčnaja asoba — TAA «Dzieviłon M», jakaja jurydyčna znachodzicca ŭ miastečku Mačuliščy pad Minskam. Kiraŭnikom i adzinym zasnavalnikam kampanii źjaŭlajecca Pavieł Marchasin, syn Vitala Marchasina.
U 2011 hodzie TAA «Dzieviłon» udzielničała ŭ dolevym budaŭnictvie administracyjna-składskoha kompleksu ŭ Mačuliščach z ahulnaj płoščaj bolš za try tysiačy kvadratnych mietraŭ. Hety vializny hmach fihuruje zaraz u rehistracyjnych dadzienych kampanijaŭ, jakija tam jurydyčna znachodziacca, u jakaści «Administracyjnaha budynku «Dzieviłon».
Rasija
Budaŭnictva hetaha kompleksu prypadaje na załatyja časiny Hrupy kampanijaŭ «Dzieviłon», aktyŭnaje raźvićcio jakoj pačałosia sa stvareńnia napačatku 2000-ch u Rasii cełaha sieciva handlovych apierataraŭ, ź jakim na praciahu apošnich piaci hadoŭ adbylisia vielmi dramatyčnyja padziei.
Usie vyjaŭlenyja kampanii Hrupy «Dzieviłon» na terytoryi RF kantralavała TAA «Reniesans», jakoje mieła da 95% dolaŭ u kožnaj ź ich, i z hetaj pryčyny jaje ŭmoŭna možna nazyvać chołdynhavaj kampanijaj.
«Novy čas»: U budaŭnictvie «Pajedziem, pajadzim» prysutničaje rasijski śled
Barys Surys źjaŭlajecca hienieralnym dyrektaram kampanii «Reniesans». Mienavita joj naležyć bolšaja častka firmy STAA «KvartałMZS», praź jakuju jana kantraluje STAA «BiełRestInviest». Z hetaj apošniaj kampanijaj da 2106 hoda ŭkładzienaja damova arendy, pavodle jakoj jana płacić usiaho amal 117 dołaraŭ na miesiac za 1,2 ha ziamli, dzie zbudavany i pakul jašče funkcyjanuje restaracyjna-zabaŭlalny kompleks «Pojediem pojedim».
Pieršymi dvuma pradstaŭnictvami ŭ Rasii, padkantrolnymi TAA «Reniesans» Surysa, stalisia TAA «Dieviłon» i «Dieviłon M», stvoranyja ŭ 2002 hodzie ŭ Sankt-Pieciarburhu. Adnak ź leta 2019 hoda abiedźvie hetyja kampanii znachodziacca ŭ stadyi likvidacyi.
Pavodle dadzienych Fiederalnaj słužby dziaržaŭnaj statystyki RF (pa-rusku — Rasstat), vynikam haspadarčaj dziejnaści «Dieviłon M» za 2017 hod stalisia straty pamieram u bolš za 25 miljonaŭ, a kredytorskaja zapazyčanaść siahnuła značeńnia zvyš za adzin miljard rasijskich rubloŭ. U mai 2003 hoda ŭ Jekaciarynburhu była zarehistravanaja treciaja kampanija hrupy, TAA «Dieviłon-Urał», jakaja za apošni hod svajoj dziejnaści pierad likvidacyjaj taksama mieła finansavyja straty. U 2004 hodzie chołdynh adčyniŭ dźvie svaje novyja kampanii ŭ Samary i Rastovie-na-Donie — TAA «Dieviłon-Vołha» i «Dieviłon-Juh» adpaviedna, — pa 5% dolaŭ jakich kantralavała niepasredna Alena Bierazoŭskaja. Apošniaja kampanija hrupy — TAA «Dieviłon-Nieva» — była stvoranaja, jak i pieršyja dźvie, u paŭnočnaj stalicy Rasii ŭ traŭni 2006 hoda. Praź dziesiać hadoŭ, u červieni 2016-ha, da jaje dałučyli jekaciarynburhskuju i rastoŭskuju kampanii. Aproč hetaha Hrupa kampanijaŭ «Dieviłon» taksama mieła svaje pradstaŭnictvy ŭ Novasibirsku i Ufie. Pakazalna, što kampanija «Rieniessans» Surysa vyjšła sa składu zasnavalnikaŭ usich kampanijaŭ, što znachodziacca zaraz u stadyi likvidacyi. Z apošniaj — TAA «Dieviłon-Nieva» — «Rieniessans» vyjšaŭ u žniŭni 2019-ha.
Ad kaliści bujnoha i razhalinavanaha rasijskaha sieciva kampanijaŭ «Dieviłon» praktyčna ničoha nie zastałosia. Što ž stałasia pryčynaj dla takoha chutkaha padzieńnia?
19 sakavika 2019 hoda Arbitražny sud Sankt-Pieciarburha i Leninhradskaj vobłaści ŭchvaliŭ rašeńnie pra zadavalnieńnie pazovu TAA «Dieviłon» da kampanii Danbay Export LP ź Vialikabrytanii nakont patrabavańnia spahnać z apošniaj bolš za 1,45 miljona (!) dołaraŭ doŭhu. Stałasia heta praź miesiac paśla vychadu TAA «Rieniessans» sa składu ŭłaśnikaŭ TAA «Dieviłon» i za niekalki tydniaŭ da pryniaćcia rašeńnia pra likvidacyju hetaj kampanii. Z materyjałaŭ sudovaha pracesu viadoma, što, pavodle ŭchvalenaha hetymi kampanijami 4 červienia 2015 hoda kantraktu, kampanija «Dieviłon» apłaciła avans Danbay Export LP za pastaŭku joju partyi tavaru, jaki, adnak, byŭ pastaŭleny ŭ mienšym abjomie. Admietna, što papiarednie abiedźvie kampanii vyznačyli padsudnaść u miežach damovy Arbitražnaha suda Sankt-Pieciarburha, a taksama zahadzia ŭzhadnili vykarystańnie pravavoj sistemy RF.
Vialikabrytanija i Siejšelskija vyspy
Usie hetyja akaličnaści nam padalisia vielmi padazronymi, i my vyrašyli pravieryć kampaniju Danbay Export LP. U vyniku byli ździŭlenyja, kali z aficyjnych dadzienych dziaržaŭnaj rehistracyi daviedalisia, što kampanija była stvoranaja 12 traŭnia 2015 hoda — za try tydni pierad padpisańniem kantraktu na sumu ź siamiznačnymi ličbami ŭ dołarach ZŠA!
Zhodna ź infarmacyjaj Rehistracyjnaj Pałaty (Companies House) Vialikabrytanii, Danbay Export LP jurydyčna znachodzicca ŭ stalicy Šatłandyi Edynburhu ŭ domie na Royston Mains Street, 18. U hetym ža domie, zvyčajnym trochpaviarchovym žyłym budynku ŭ Piłtanie — adnym z samych biednych rajonaŭ Edynburhu, — zarehistravanyja bolš za try sotni inšych kampanijaŭ.
Arhanizacyjna-pravavaja forma kampanii adpaviadaje tavarystvu z abmiežavanaj adkaznaściu (LP — limited partnership). Ułaśnikami kampanii na momant jaje stvareńnia byli inšyja jurydyčnyja asoby — Brixton Ventures ltd i Trafford United ltd, jakija, u svaju čarhu, zarehistravanyja na Siejšelskich vyspach.
Cikava, što dyrektarami hetych kampanijaŭ i ŭłaśnikami źjaŭlajucca hramadzianie Litvy, jakija pražyvajuć u paznačanym vyšej piłtanskim ścipłym žyłym domie, — Remihijus Mikałaŭskas (Remigijus Mikalauskas) i Viktoryja Zirnelicie (Viktorija Zirnelyte). U ich kvatery na pieršym paviersie hetaha domu zarehistravana niekalki socień firmaŭ!
Mikałaŭskas i Zirnelicie źjaŭlajucca svojeasablivymi ahientami — pradstaŭnikami karparatyŭnych pasłuh pa stvareńni kampanijaŭ. Dosyć časta vynik padobnaj dziejnaści — stvareńnie padstaŭnych kampanijaŭ, jakija ŭ rečaisnaści isnujuć tolki na papiery i vykarystoŭvajucca dla tranśfieru srodkaŭ albo aktyvaŭ biez faktyčnaj najaŭnaści jakich-kolviek supracoŭnikaŭ albo viadzieńnia paŭnavartasnaha biźniesu. Zbolšaha, padobnyja pasłuhi nadajuć u nievialikich dziaržavach, jakija pieratvarylisia na tak zvanyja «padatkovyja havani» albo afšory, što nadajuć svaim rezidentam padatkovyja lhoty i nie patrabujuć finansavaj spravazdačy. Pieradusim, heta — Bahamskija, Kajmanavyja, Maršałavy i ŭžo zhadanyja Siejšelskija vyspy, a taksama niekatoryja dziaržavy-vyspy Karybskaha basiejnu i Akieanii, centralnaamierykanskija Bieliz, Panama i šmat inšych. U bolšaści krainaŭ cyvilizavanaha śvietu pradstaŭniki dziełavych kołaŭ i finansava-kredytnych ustanovaŭ unikajuć adnosin z afšornymi kampanijami, jakija vielmi časta vykarystoŭvajucca dla admyvańnia hrošaj.
Pavodle patrabavańniaŭ zakanadaŭstva, uchvalenaha ŭ Abjadnanym Karaleŭstvie, brytanskija kampanii pačali z krasavika 2016 hoda raskryvać infarmacyju pra svaich kancavych bienieficyjaraŭ. Vialikabrytanija stała adnoj ź pieršych krainaŭ, jakaja zaćvierdziła hetyja patrabavańni na zakanadaŭčym uzroŭni. Heta całkam adpaviadaje realizacyi hłabalnaj dziaržaŭnaj prahramy padvyšeńnia prazrystaści kampanijaŭ.
Zhodna z novym zakonam, kampanija Danbay Export LP vymušanaja była taksama raskryć svajho bienieficyjara albo asobu z vyznačalnym kantrolem, pavodle terminałohii Vialikabrytanii. Hetaj asobaj akazałasia hramadzianka Izraila Alina (Ała) Surys, maci Barysa Surysa.
Alina Surys
Jana źjaŭlajecca ŭłaśnicaj 24,5% TAA «Biełnovateks hrup», jakomu praz daččynuju kampaniju TAA «Amiźbieł» naležyć restaracyjna-zabaŭlalny kompleks «Pojediem pojedim».
Zaznačanyja vyšej siejšelskija kampanii Brixton Ventures ltd i Trafford United ltd majuć dačynieńnie da stvareńnia jašče adnoj kampanii — Fortuna United LP, zarehistravanaj z tym ža edynburhskim adrasam, jaki maje Danbay Export LP Aliny Surys.
Małdova i «afiora tysiačahodździa»
Fortuna United LP źviazanaja z adnoj z samych hučnych finansavych afioraŭ apošniaha času — źniknieńnia ŭ 2014 hodzie z bankaŭskaj sistemy Małdovy zvyš za 1 miljard (!) dołaraŭ. Z dakładu, padrychtavanaha ńju-jorkskaj detektyŭnaj ahiencyjaj Kroll i zroblenaha na zamovu centralnaha banku Małdovy, vynikaje, što Fortuna United LP vystupiła harantam pa piaci bujnych kredytach na ahulnuju sumu 13,7 miljarda lejaŭ (pryblizna 1 miljard USD).
U dakładzie padrabiazna raskrytaja dosyć składanaja machlarskaja schiema vyviadzieńnia z małdaŭskich bankaŭ finansavych srodkaŭ, ekvivalentnych vośmaj častcy VUP Małdovy, jakaja całkam moža stać asnovaj detektyvu pra finansavyja machinacyi (dakład dastupny ŭ spasyłkach: 1, 2). Strata hrošaj stała padstavaj da ekanamičnaha i palityčnaha chaosu ŭ krainie, vyklikała abiasceńvańnie nacyjanalnaj valuty leja i padzieńnie ŭzroŭniu žyćcia. Vynikam byli akcyi pratestu suprać karupcyi, adstaŭka ŭradu i realizacyja dziaržaŭnaj prahramy ratavańnia bankaŭskaj sistemy Małdovy.
Nazva piłtanskaj kampanii Fortuna United LP šmat dla jakich małdavan z hetaha času pačaŭ asacyjavacca vyklučna z adčajem, bolem i hnievam. Ci źviazanaja ź joj kampanija Danbay Export tolki supolnymi zasnavalnikami — afšornymi kampanijami ź Siejšełaŭ, — ci jana taksama zadziejničanaja ŭ schiemie rabavańnia bankaŭskaj sistemy Małdovy — pytańnie pakul zastajecca adkrytym.
Cikavaj asablivaściu tut jość toje, što ŭ vyniku pačatku pracesu likvidacyi i rearhanizacyi ŭ krasaviku 2019 hoda picierskaj kampanii TAA «Dieviłon», u žniŭni 2019 hoda ź jaje była vyłučanaja novaja jurydyčnaja asoba — kampanija TAA «Fortuna», jakaja i stała jaje pravapierajemnikam. Vielmi dziŭnaje supadzieńnie, kali, viadoma ž, heta jano i jość.
Ciapier čytajuć
Vyjšaŭ na svabodu biełarus, jakoha ŭ svoj čas prysudzili da pažyćciovaha źniavoleńnia. Heta pieršy viadomy taki vypadak9
Kamientary