Jak viadoma, paŭabaronca barysaŭskaha BATE i moładzievaj zbornaj Biełarusi Michaił Sivakoŭ zaklučyŭ kantrakt z kłubam italjanskaj sieryi "A" "Kaljary". Tranśfier različany na čatyry hady. U novym kłubie biełaruski futbalist budzie vystupać pad 16-m numaram. 21-hadovy Michaił staŭ piatym biełarusam, jaki pasprabuje prajavić siabie ŭ Italii. Da jaho heta zrabili lehiendarny Siarhiej Alejnikaŭ (u 1989 hodzie), a taksama Siarhiej Hurenka, Vital Kutuzaŭ i Vital Rahožkin. Siońnia Michaił adkazvaje na našy pytanni:
— Nakolki heta prapanova była niečakanaj ci była maralnaja hatoŭnaść pakinuć Biełaruś?
— Ja nie rychtavaŭsia, ale žadańnie pasprabavać svaje siły ŭ jeŭrapiejskim čempijanacie prysutničała zaŭsiody. Źjaviŭsia varyjant z "Kaljary", i ja nie škaduju, što jaho vybraŭ, choć byŭ jašče varyjant z ukrainskim "Dniaprom", bolš vyjhryšny ŭ finansavym płanie. Italjanski čempijanat — adzin z najmacniejšych, i ja miarkuju, što ŭsio dla mianie tam składziecca dobra. Ja aptymistyčna nastrojeny.
— I za miesca ŭ asnovie paspračajeciesia...
— Naturalna, ja tak prosta nie sastuplu, chacia i tak prosta mnie jaho nichto nie sastupić. Ja razumieju, što daviadziecca šmat pracavać, spatrebicca niejki pieryjad na adaptacyju, ale ja hatovy da hetaha.
— Dzie budziecie žyć u Italii?
— Pieršy čas budu žyć u pradstaŭnika kłuba, jaki pavinien pakazać mnie, jak dabiracca da bazy, jakaja znachodzicca za horadam, dapamahčy asvojtacca. Kali ja adčuju, što hatovy žyć adzin, pierajedu na kvateru, jakuju adšukaŭ mnie kłub.
— Z kim budziecie zajmacca italjanskaj?
— Mnie znajšli pierakładčyka, heta budzie mužčyna. Rastłumačyli, čamu: kali treba budzie zajsci ŭ raspranalniu i štości pierakłasci, dziaŭčyna heta zrabić nie zmoža. Ź pierakładčykam pakul nie paznajomiŭsia — kali adjazdžaŭ z Italii, jaho jašče nie znajšli, zaraz mnie paviedamili, što taki čałaviek jość i hatovy prystupić da zaniatkaŭ.
— Razmoŭnik nabyli?
— Tak, i jašče ceły rukzak litaratury
— Adčuli, z kim u novaj kamandzie možna pasiabravać?
— Ja mahu razmaŭlać pa-anhlijsku, praŭda, niamnohija italjancy viedajuć hetu movu. U kamandzie jość brazilec i arhienciniec, jakija taksama viedajuć anhlijskuju. Z imi i budu kantaktavać u najbližejšy čas...
U niadzielu «Kaljary» hulaje suprać «Miłana».
