Suprać praciŭnika akumulatarnaha zavoda ŭ Breście błohiera Alaksandra Kabanava adnavili kryminalnuju spravu. U lipieni spravu zakryli, bo 4 miesiacy nie mahli znajści skład złačynstva, piša Radyjo Svaboda.
Sioleta ŭ sakaviku suprać Kabanava zaviali kryminalnuju spravu za prysvajeńnie hrošaj tavarystva ŭłaśnikaŭ žytła. Jak skazaŭ Kabanaŭ, bolš jak 2 hady tamu jon 4 miesiacy ŭznačalvaŭ takoje tavarystva ŭ svaim domie. Za heta atrymlivaŭ zarobak 120 rubloŭ na miesiac — pa 2 rubli z kvatery. Zajavu ab prysvajeńni Kabanavym hrošaj sioleta napisaŭ jaho susied, dziejny praparščyk milicyi.
Kabanaŭ viadomy aśviatleńniem akcyj pratestu suprać budaŭnictva akumulatarnaha zavoda, jakija prachodziać štoniadzielu ŭžo bolej za hod.
Raniej Alaksandar Łukašenka 18 kastryčnika skrytykavaŭ praciŭnikaŭ budaŭnictva akumulatarnaha zavodu, jakija vyłučalisia kandydatami ŭ deputaty Pałaty pradstaŭnikoŭ.
