Na praciahu minułych sutak u Viciebsku byli zatrymanyja 15 čałaviek, ź ich 13 – heta maładyja ludzi, udzielniki navastvoranaha ruchu «Bunt», a jašče dvoje – maci palityka Paŭła Sieviarynca Taciana i fotakarespandent hazety «Vitiebskij kuŕjer» Siarhiej Sierabro.
Taciana Sieviaryniec i Siarhiej Sierabro byli śviedkami taho, jak na aśviatlalnaj viežy kala amfiteatru byŭ uźniaty bieł-čyrvona-bieły ściah. Jon pravisieŭ tam kala paŭhadziny, pakul bajcy AMONu nia skinuli jaho ŭniz. Taciana Sieviaryniec padniała ściah ź ziamli, bo, jak jana kaža, nie mahła tryvać, kab histaryčny symbal lažaŭ u brudzie. Za heta milicyjanty jaje zatrymali i zavieźli ŭ pastarunak, skazaŭšy, što jana chacieła źniščyć važny rečavy dokaz. U Kastryčnickim rajadździele milicyi jaje dapytali, sfatahrafavali dla taho, kab pastavić na kamputarny ŭlik, i adpuścili dadomu.
Dla fotakarespandenta Siarhieja Sierabra zatrymańnie abiarnułasia horšymi nastupstvami.
(Sierabro: ) «Było dosyć šmat ludziej, jakija hladzieli na ściah. A ja heta ŭsio zdymaŭ. Padyšli dva milicyjanty, spytalisia, što ja rablu. Ja adkazaŭ, što vykonvaju svaje prafesijnyja abaviazki. Potym jany mianie paviali da mašyny, a kali pryvieźli ŭ RAUS, to tam mnie skazali, što ja zatrymany za drobnaje chulihanstva: nibyta ja pieraškadžaŭ pracy aperatyŭna-śledčaj hrupy, hučna kryčaŭ, machaŭ rukami... Ja zapisaŭ u pratakole, što ŭsio heta niapraŭda. Pavodle hetaha artykułu parušeńnie moža razhladać abo načalnik RAUSu, abo sud. Ale sudu, mnie skazali, daviadziecca noč čakać u śledčym izalatary. Ja pahadziŭsia, kab maju spravu razhladaŭ načalnik. I mnie dali štraf – pałovu bazavaj vieličyni, abo 16 tysiač.
Aproč taho, što fotakarespandenta aštrafavali, milicyjanty ścierli usie fatazdymki ŭ pamiaci jahonaha ličbavaha fotaaparata. Chronika padniaćcia ściaha viadomaj udzielnicaj namiotavaha haradka na Kastryčnickaj płoščy Kryścinaj Šacikavaj była stračanaja.
Miž tym Kryścina Šacikava sama nieŭzabavie apynułasia ŭ tym samym pastarunku: jaje hvałtam źniali z aśviatlalnaj viežy. Pra heta raskazvaje śviedka padziejaŭ:
(Dziaŭčyna: ) «Tudy da jaje zalez adzin milicyjant, pačaŭ bić Kryścinu pa hałavie, Kryścina vielmi mocna kryčała – tak, što kryk raznosiŭsia tut pa ŭsioj placoŭcy. Potym pryjechali try mašyny MNS, dva pažarnyja i try specnazaŭcy paleźli navierch, pačali jaje źviazvać – źviazali ruki, pryčapili niejkija kruki, ašyjnik niejki ŭ jaje byŭ... U toj čas, jak jaje zdymali, hetyja specnazaŭcy znoŭ bili jaje nahami pa hałavie».
U Kastryčnickim RAUSie, kudy zavieźli Kryścinu Šacikavu, joj stała drenna, i milicyjanty zmušanyja byli dastavić jaje spačatku ŭ špital chutkaje dapamohi, a potym u abłasny kliničny špital.
Kali stan zdaroŭja Kryściny budzie zdavalnialny, to siońnia jaje buduć sudzić. U viciebskim izalatary časovaha ŭtrymańnia sudu čakaje taksama moładzievy aktyvist Ivan Śpiryn, zatrymany ŭčora nibyta za niepadparadkavańnie milicyjantam.
Ciapier čytajuć
Rytu Dakotu abvinavacili, što jana terminova raspradała nieruchomaść u Rasii amal na $2 miljony. Jana adkazała4
Kamientary