Fota vesti.rs
Cukrovy karol Mijadrah Kościč choča raspaŭsiudzić svoj biznes na Biełaruś.
Vydańnie Press online piša, što na kurort biełaruski kiraŭnik prybyŭ pa asabistym zaprašeńni ŭładalnika hatela «Hrand» biznesoŭca Mijadraha Kościča.
Mienavita ŭ hetym hateli spyniŭsia Łukašenka i jahonaja šmatlikaja śvita i siamiejniki.
Reputacyja ŭ «cukrovaha karala» Mijadraha Kościča, jaki vałodaje ahrarnaj kampanijaj «MK grupa», nieadnaznačnaja. Jaho padazrajuć u nie zusim karektnych, a časta i niezakonnych mietadach viadzieńnia biznesu.
U červieni 2004 hoda jon navat byŭ aryštavany ŭładami na toj momant adzinaj Sierbii i Čarnahoryi pa abvinavačvańni ŭ finansavych machinacyjach, u pryvatnaści, u machlarstvie z pastaŭkami cukru ŭ Jeŭrapiejski źviaz. Brusel śćviardžaŭ, što Kościč nabyvaŭ cukar pa nievialikich cenach u trecich krainach i pastaŭlaŭ jaho ŭ JEZ z parušeńniem ilhotnaha režymu.
Tym nie mienš, u 2005 hodzie Mijadrah Kościč z 300 młn jeŭra zamknuŭ sotniu najbahaciejšych biznesoŭcaŭ postsacyjalistyčnych krain pa viersii polskaha štotydniovika «Wprost».
Jość u Kościča interasy i va Ŭkrainie, dzie jon praz kijeŭskuju kampaniju «Ahrainviest» zajmajecca sielskaj haspadarkaj. U pryvatnaści, hadoŭlaj i prodažam zbožža. Tam ža Kościč maje namier pabudavać zavod pa vytvorčaści bijaetanołu z kukuruzy.
Jość u prycele «MK grupa» i Biełaruś.
U krasaviku minułaha hoda Mijadrah Kościč pryjazdžaŭ u našuju krainu i naviedaŭ Baranavicki i Babrujski rajony.Sierbski biznesmen chacieŭ by ŭziać u Biełarusi ŭ arendu da 50 tysiač hiektaraŭ sielhasuhodździaŭ. Ale ŭ Baranavičach, da prykładu, miascovaje kiraŭnictva było hatovaje vyklučyć z abaračeńnia pad sierbskija patreby tolki 10 tysiač ha.
Hatel «Hrand», dzie kvataruje Alaksandr Łukašenka, a taksama niekalki restaranaŭ i damoŭ na kurorcie «Kapaonika» Kościč nabyŭ letaś.Sierbskija ŚMI adznačali šmatlikija dzivactvy hetaj uhody. Tender kampanija «MK grupa» vyjhrała biez kankurencyi, pryčym košt nabytych aktyvaŭ byŭ ŭdvaja mienšy za pieršapačatkova zajaŭleny — 23 młn jeŭra suprać 45 młn.
U siabie ŭ krainie 48‑hadovy Kościč viadomy jašče i tym, što jahonaja byłaja žonka Marjana Kościč vyjšła zamuž za papularnaha niamieckaha futbalista Łotara Mateŭsa (ź jakim, zrešty, taksama raźviałasia), a svaju 50‑mietrovuju jachtu Kościč nazvaŭ «Aleksandr V» — u honar syna Alaksandra, jakomu na momant pakupki darahoj cacki było piać hod.
