Meryja Varšavy patłumačyła słovy pra «biełaruski duch», ad jakoha «treba pazbavić horad»
Na prezentacyi kancepcyi centra Varšava, mer polskaj stalicy Rafał Tšaskoŭski zajaviŭ, što nad horadam «staić biełaruski duch» i što prahnać jaho zdolnyja źmieny, jakija jon prapanuje. Pres-sakratar meryi patłumačyŭ Svabodzie, što mieŭ na ŭvazie Tšaskoŭski.
— Peŭnaja častka horadu była zaprajektavanaja našymi «savieckimi siabrami», tamu nad im staić saviecki i biełaruski duch. — skazaŭ mer Tšaskoŭski, pradstaŭlajučy kancepcyju «Uśmieška Varšavy», jakaja praduhledžvaje bolš pierachodaŭ dla minakoŭ, rovarnych ściežak i zielaniny.
Pavodle Tšaskoŭskaha, prapanavanyja im źmieny zmohuć prahnać z Varšavy «biełaruski duch».
Słovy pra «biełaruski duch» aburyli karystalnikaŭ sacyjalnych sietak, siarod jakich i biełarusy Varšavy. Zajavu Rafała Tšaskoŭskaha jany ŭspryniali jak prajavu vyšejšaści i abrazu. Svaboda skantaktavałasia z pres-sakratarom varšaŭskaj meryi Kamilam Dambrovam. Jon patłumačyŭ, što mieŭ na ŭvazie Tšaskoŭski.
— Kažučy pra «biełaruski duch», mer Tšaskoŭski mieŭ na ŭvazie architekturu i ŭrbanistyčnyja savieckija i postsavieckija rašeńni, jakija zakranuli taksama i harady BSSR. Havorka viałasia vyklučna pra architekturu. Mer Varšavy bačyć hetyja padabienstvy pamiž Varšavaj i Mienskam i choča źmianiać horad, kab ačyścić Varšavu ad sacrealizmu.
Kamil Dambrova zapeŭniŭ, što mer polskaj stalicy šanuje ŭsich žycharoŭ i haściej Varšavy, niezaležna ad nacyjanalnaści.
— Varšava pavinna być adkrytaj i horadam dla ŭsich. Usie, chto sumlenna pracuje i pavažaje zakon, majuć prava ličyć hety horad svaim. U tym liku i hości z Uschodniaj Eŭropy. U mera Tšaskoŭskaha vielmi sardečnaje staŭleńnie da biełarusaŭ, ukraincaŭ, rasiejcaŭ. Hetyja słovy byli nakiravanyja nia suprać ludziej, a suprać padychodu da architektury, jaki vykarystoŭvaŭsia ŭ Miensku abo Bieraści.
Rafał Tšaskoŭski ŭznačalvaje meryju Varšavy ad 2018 hodu. Jamu 47 hadoŭ. Pa adukacyi jon palitolah, doktar humanitarnych navuk. Na vybary išoŭ ad liberalnaj «Hramadzianskaj platformy» i pieramoh u pieršym tury, nabraŭšy 56% hałasoŭ.
Kamientary