Što viadoma pra siamju i baćkoŭ novaha ministra ekanomiki Alaksandra Čarviakova
Alaksandr Łukašenka 4 studzienia pryznačyŭ ministram ekanomiki 53-hadovaha Alaksandra Čarviakova. Apošnija try hady jon pracavaŭ pieršym namieśnikam ministra ekanomiki.
U suchoj bijahrafii Alaksandra Viktaraviča paznačana, što
naradziŭsia jon u vioscy Babiničy Aršanskaha rajona ŭ 1966 hodzie. Heta dastatkova vialiki ahraharadok za dzieviać kiłamietraŭ ad Oršy. Skončyŭ Horackuju sielskahaspadarčuju akademiju, a taksama aśpiranturu pry joj. Krychu papracavaŭ inžynieram u Aršanskim rajonie.
Ad 1994 da 2010 hadoŭ pracavaŭ vykładčykam u Horkach. U 2010 staŭ dyrektaram u Navukova-daśledčym ekanamičnym instytucie Ministerstva ekanomiki Biełarusi. U studzieni 2017 staŭ pieršym namieśnikam ministra ekanomiki.
«NN» zmahła daviedacca niekatoryja cikavyja źviestki pra asabistaje žyćcio i siamju novaha ministra ekanomiki.
U Babiničach usie dobrym słovam zhadvajuć Alaksandra Viktaraviča. «Nichto pra jaho nie toje, što admoŭnaha, ale navat niejtralnaha słova nie skaža», — havoryć dyrektar miascovaj škoły Juryj Łukjanaŭ.
Baćka novaha ministra pamior maładym — zabiŭ infarkt.
Jon pracavaŭ kinamiechanikam. I paśla kalehi muža časta prychodzili da ŭdavy Raisy Nikifaraŭny, kab spytać, jakaja dapamoha patrebnaja pa haspadarcy, što zrabić.
Sama Raisa Nikifaraŭna pracavała buchhałtaram na miascovaj sielhaschimii. Mama Čarviakova pamierła letam 2018 hoda. Joj było 82 hady, da apošnich dzion pražyła ŭ Babiničach.
Sacyjalny piedahoh miascovaj škoły Hanna Zahorskaja zhadvaje: «U 1987 hodzie trapiła pa raźmierkavańni ŭ Babiničy. Sama ja ź Lepielskaha rajona, skončyła fiłfak BDU. Žyllom nas nie zabiaśpiečvali, tamu raźmiaščalisia pa kvaterach. Tak ja i trapiła ŭ siamju Čarviakovych». Na toj momant Alaksandr byŭ studentam Horackaj akademii. «Pryjazdžaŭ amal kožnyja vychadnyja. Adkazny vielmi chłopiec, dapamahaŭ maci pa haspadarcy, dabradušny. Jon nikoli mima biez uśmieški nie projdzie», — kaža Hanna Viačasłavaŭna.
Padčas vučoby Alaksandr znajšoŭ sabie žonku. «Jana mo i sama z Horak była, ale baćki pracavali na sielekcyjna-hibrydnym centry «Zadniaproŭski» ŭ Aršanskim rajonie.
Ja i na viasielli ŭ ich była, hulali ŭ restaranie. Dobryja adnosiny ŭ nas byli. Kali pryjazdžaŭ dadomu, to šmat havaryli, to jon raskaža niešta pra vučobu, to ja pra pracu. Šmat śmiajalisia», — zhadvaje spadarynia Zahorskaja.
Alaksandr — nie adzinaje dzicia ŭ siamji. U jaho jašče jość starejšaja siastra Łarysa. Joj ciapier 62 hady. Łarysa taksama vučyłasia ŭ Horkach. Tam pabrałasia šlubam z Stanisłavam Koškinym. Doŭhi čas pracavali ŭ Mahiloŭskaj vobłaści, a potym viarnulisia ŭ Babiničy.
Stanisłaŭ staŭ dyrektaram Aršanskaj ptuškafabryki, jakaja raźmiaščajecca jakraz na radzimie žonki. Ciapier spadar Koškin staršynia rajonnaj Aršanskaj arhanizacyi prafsajuza rabotnikaŭ ahrapramysłovaha kompleksu. Žyvie siamja ŭ Babiničach.
Ciapier Alaksandr Čarviakoŭ kali i naviedvaje rodnyja miaściny, to litaralna na paru hadzin. Najpierš — kab praviedać siastru. Byŭ jon niadaŭna taksama i ŭ rodnaj škole. Juryj Łukjanaŭ kaža, što partret Čarviakova visić u škole siarod najlepšych vypusknikoŭ ustanovy.
Žonka Alaksandra Čarviakova Śviatłana na siońnia pracuje namieśnikam hałoŭnaha inžyniera pa navucy ŭ Prajektnym instytucie Biełhipraziem. U pary dźvie dački — Jaŭhienija i Lizavieta.
Jaŭhienija pajšła pa baćkavaj ściažynie.
Na siońnia pracuje ŭ NDEI Ministerstva ekanomiki. Jana źjaŭlajecca suiskalnicaj adździeła płanavańnia i rehulavańnia raźvićcia sielskaj i lasnoj haspadarak.
U internecie možna znajści niekatoryja pracy Čarviakovaj. Naprykład, joj napisany artykuł «Kankurentnyja pazicyi biełaruskaha APK na suśvietnych rynkach», a taksama «Prahnazavańnie raźvićcia biełaruskaha ahrapramysłovaha kompleksu da 2030 hoda na fonie hłabalnych ahratrendaŭ». Pracy napisanyja razam z prafiesaram Michaiłam Kavalovym z BDU.
U bazie patentaŭ Biełarusi jość niekalki vynachodnictvaŭ Jaŭhienii Čarviakovaj. Naprykład, jana raspracavała pryładu dla dražavańnia nasieńniaŭ, pryładu dla pieradpasiaŭnoha stymulavańnia nasieńnia, pryładu dla padrychtoŭki vadkich karmoŭ. Niekatoryja vynachodnictvy byli zapatentavanyja razam z baćkam.
Małodšaja dačka Lizavieta ŭ 2016 hodzie skončyła Instytut kiravańnia i sacyjalnych technałohij pry BDU. Jaje dypłomnaj pracaj było «Kadastravaja acenka ziemlaŭ horada Mahiloŭ».
Ekanamist, dyrektar daśledčaha centra IPM Alaksandr Čubryk adhukajecca pra Alaksandra Čarviakova jak pra čałavieka, jaki ŭmieje słuchać i prysłuchoŭvacca.
«Čałaviek nievypadkova zajmaje hetuju pasadu. I jahonaja daśledčaja praca ŭ NDEI Ministerstva i praca pieršaha namieśnika ministra pra heta śviedčyć. Jon kuryravaŭ rehijanalnaje raźvićcio. Dyk voś, vielmi ciažka było zaprasić Alaksandra Viktaraviča na roznyja mierapryjemstvy, bo
jon uvieś čas byŭ u raźjezdach. I heta pra mnohaje kaža: adna sprava, kali čałaviek kiruje rehijanalnym raźvićciom z ułasnaha kabinieta, a zusim inšaja — kali ŭvieś čas na miescach», — kaža Čubryk.
«Navat kali pohlady nie vielmi supadajuć, to jon nadzvyčaj adkryty i hatovy vysłuchvać advarotnyja pazicyi. Čarviakoŭ z tych ludziej, jakija ščyra žadajuć palepšyć situacyju ŭ našaj krainie. Jon byŭ adnym ź pieršych, chto atrymlivaŭ dapamohu ź Biełaruskaha inviestycyjnaha fondu», — raskazaŭ pra novaha ministra ekanomiki Alaksandr Čubryk.
«Skazaŭ: ja tut ničoha prasić nie budu». Žonka raskazała, jak Vieramiejčyka pryznali pahrozaj u Litvie6
Kamientary