Lidery Partyi BNF ahučyli, jak idzie padrychtoŭka da Dnia Voli.
Zajaŭku na praviadzieńnie akcyi arhkamitet padaŭ jašče 4 lutaha, ale Minharvykankam pakul adkazu nie daŭ.
Staršynia partyi Lavon Barščeŭski zaznačyŭ, što partyja spadziajecca «na dobruju volu ŭłady», i akcyja budzie dazvolenaja. Jon taksama padkreśliŭ, što za 20 hod praviadzieńnia Dnia Voli nivodny čałaviek nie byŭ kranuty pa vinie Partyi BNF, usie pravakacyi byli vyklučna z boku ŭładaŭ.
Vincuk Viačorka dadaŭ pra toje, što 25 Sakavika «šmatlikija mižnarodnyja partniory» buduć adsočvać praviadzieńnie akcyi.
Na sustrečy z žurnalistami pradstaŭniki Partyi BNF padkreślivali, što praź miesiac (13 krasavika) skančajecca testavy termin dla biełaruskich uładaŭ, dadzieny Jeŭropaj.
«Na dadzieny momant situacyja na nuli, kali nie skazać, što ŭ minusie. U krainie piać palitviaźniaŭ, źjavilisia novyja formy represij: palityčnych aktyvistaŭ niezakonna pryzvali ŭ vojska, ludziej zvalniajuć z pracy, adličvajuć z univiersitetaŭ», — paviedamiŭ spadar namieśnik staršyni partyi Vincuk Viačorka.
Sioletniaja akcyja 25 Sakavika (uhodki abviaščeńnia niezaležnaści BNR), budzie nieści palityčny i sacyjalny charaktar: pratesty suprać sacyjalnaj palityki ŭradu i suprać źniavoleńnia palityčnych aktyvistaŭ. Łozunham hetaha hodu abrany «Za praŭdu, za spraviadlivaść, za svabodu!»
Namieśnik staršyni Partyi BNF Viktar Ivaškievič paviedamiŭ, što sioleta arhanizatary čakajuć bolš ludziej, čym u papiarednija hady.
«Źjavilisia novyja čyńniki, jakija pavinny paspryjać aktyŭnaści ludziej. Heta libieralizacyja ŭ palitycy ŭłady, a taksama paharšeńnie ekanamičnaj situacyi ŭ kožnaj biełaruskaj siamji»,— rastłumačyŭ jon.
U bližejšyja dni raspačniecca infarmacyjnaja kampanija pa praviadzieńni akcyi. Spadar Ivaškievič paviedamiŭ, što ŭ hetym hodzie akcent robicca na aktyŭnaść i asabistuju inicyjatyvu aktyvistaŭ partyi. «Raniej my mieli sotni tysiač nalepak, ale ludzi atrymlivali stabilny zarobak i nie razumieli, čamu im treba iści na Płošču.
U hetym hodzie my pazbaŭlenyja takich mahčymaściej, adnak ludziej mocna prycisnuła ekanamičnaja situacyja,tamu jany pavinny stać bolš aktyŭnymi. Naprykład, pracaŭniki MAZu atrymali zarobak na 30‑50% mienš, čym u papiaredni miesiac».
Ciapier arhkamitet čakaje aficyjnaha adkazu ad Minharvykankama.
Ale lidery partyi BNF adnaznačna śćviardžajuć, što ni ŭ jakim vypadku nie prymuć raniejšy varyjant ad uładaŭ:iści ad Akademii navuk u bok da płoščy Banhałor. «My navat u zajavie napisali: «Banhałor nie prapanoŭvać!», — kaža staršynia partyi.
Salidarnaść u arhanizacyi mierapryjemstva adkryta vykazali Abjadnanaja hramadzianskaja partyja, BCHD, inicyjatyva «Jeŭrapiejskaja Biełaruś», «Małady Front», «Narodnaja hramada».
«Ad kiraŭnictva Ruchu za Svabod» i jaho lidera Alaksandra Milinkieviča žadańniaŭ i zvarotaŭ na ŭdzieł u akcyi pakul nie pastupiła», — ukruciŭ Lavon Barščeŭski.
Nahadajem, što ŭ padadzienaj u Minharvykankam zajaŭcy kazałasia pra zbor a 18-j hadzinie 25 Sakavika na placoŭcy pierad budynkam Prezidyumu Akademii navuk, šeście praśpiektam da Kastryčnickaj płoščy.
