8 červienia
Bieraściejski abłasny sud admianiŭ pastanovu sudu Leninskaha rajonu Bieraścia pra pakarańnie na 1 bazavuju vieličyniu za niecenzurnuju łajanku Źmitra Šymanskaha, jaki kiravaŭ abłasnym štabam Milinkieviča na prezydenckich vybarach. Sprava nakiravanaja na paŭtorny razhlad.
Karespandentku niedziaržaŭnaj hazety «Viečiernij Homiel» Tacianu Jakimienku nie puścili na kirmaš vakansij dla moładzi i studentaŭ na čas letnich vakacyj, jakuju ładziŭ Homielski rehijanalny centar zaniataści nasielnictva.
11 červienia
U Miensku paśla fłeš-mobu ŭ pamiać namiotavaha miastečka zatrymanyja Alaksiej Kazulin i Ivan Burykin, a taksama Siarhiej Pulša.
12 červienia
Na staršaha ŭčastkovaha inspektara milicyi Pieršamajskaha RUUS Viciebsku I.Šabłova pačali dyscyplinarnuju spravu za niezakonnaje zatrymańnie padčas vybarčaj kampanii Valerja Ščukina.
15 rabotnikaŭ mahiloŭskaha TAA SP «Biełvijał», čalcoŭ prafsajuzu REP, vyjhrali praces u administracyi pradpryjemstva za zatrymku zarobku: im zapłaciać bolš za 10 młn rub.
13 červienia
Homielski sud Centralnaha rajonu vynies papiaredžańnie Źmitru Žaleźničenku, studentu ŭniversytetu imia Skaryny, za karystańnie nacyjanalnym ściaham padčas futbolnaha matču 16 traŭnia.
Moładzievamu aktyvistu Eduardu Zielankovu z Žłobina vystavili kryminalnaje abvinavačańnie: jaho źvinavacili ŭ dziejnaści ad imia niezarehistravanaj arhanizacyi «Małady front». Z chłopca ŭziali padpisku pra niavyjezd.
Palitviazień Alaksandar Kazulin źviarnuŭsia z adkrytym listom da hienprakurora Piatra Mikłaševiča, dzie havoryć, što na jaho zaviali spravu na zahad «źvierchu» j raśśledujuć nieabjektyŭna.
14 červienia
Stała viadoma, što aktyvistku «Moładzi BNF» Śviatłanu Ściehancavu, pieramožcu Respublikanskaha konkursu duchavych i ŭdarnych instrumentaŭ, stypendyjatku specyjalnaha Fondu pa padtrymcy talenavitaj moładzi pry prezydentu Biełarusi, vyklučajuć z kaledžu imia Achremčyka za aktyŭnuju palityčnuju dziejnaść.
Były hałoŭny redaktar vaŭkavyskaj «Miestnoj haziety» Andrej Šantarovič paprasiŭ u Charkaŭskaj abłasnoj administracyi palityčnaha prytułku va Ŭkrainie.
U Salihorsku padčas performansu «Nabudź sol – pamažy «Biełkaliju» 14 červienia zatrymali moładzievych aktyvistaŭ Alaksieja Vałabujeva i niepaŭnaletnich Ivana i Illu Šyłaŭ. Niepaŭnaletnich nieŭzabavie adpuścili, a Vałabujeva źvinavacili ŭ chulihanstvie j nastupnaha dnia asudzili na 30 b.v. štrafu. 15 červienia niepaŭnaletnija Ivan Šyła i Jaŭhien Miadźviedzieŭ stali nasuprać sudu ź plakatam «Svabodu Vałabujevu»: pry zatrymańni ich źbili tak, što Miadźviedzieva daviałosia vieźci ŭ bolnicu. Na I.Šyłu skłali pratakoł za arhanizacyju niesankcyjavanaha mierapryjemstva.
15 červienia
Artura Fińkieviča, asudžanaha na 2 hady «chimii», vyklikali ŭ adździeł vykanańnia pakarańniaŭ Zavodzkaha rajonu Miensku j zahadali pryjści jašče raz 22 červienia: jamu musiać nazvać miesca adbyvańnia pakarańnia.
Palitviaźnia Siarhieja Skrabca ŭ papraŭčaj kalonii «Vićba-3» upieršyniu naviedali svajaki.
U Mahiloŭskim habrejskim dziciačym sadku prybrali judejskuju symboliku (menoru i zorku Davida) paśla taho, jak prakuror źvinavaciŭ vychavacielku Ludmiłu Izakson-Bałatoŭskuju ŭ parušeńni relihijnaha zakanadaŭstva krainy.
U Bieraści za raspaŭsiud brašury «Sudova-pravavaja reforma. Biełaruś: daroha ŭ budučyniu» zatrymany aktyvist AHP Ściapan Navasialčan, na jaho skłali pratakoł za raspaŭsiud litaratury «antydziaržaŭnaha źmiestu». U hety ž dzień Navasialčana i aktyvistku BSDP(H) Hannu Kanius nie puścili na sesiju Bieraściejskaha harsavietu, dzie abmiarkoŭvałasia praca miascovaha «Vodakanału».
Učastkovy milicyjant Piatro Zavadzki j supracoŭnik KDB Stanisłaŭ Harškoŭ praviali «razmovu» z supracoŭnikami niezarehistravanaj hazety «Volny horad» Siarhiejem Niaroŭnym i Mikałajem Hierdzijem: žurnalisty źbirali ŭ v.Vieraniejki (Čerykaŭski rajon) materyjał dla artykułu pra ahraharadki.
Niedziaržaŭnaja hazeta «Viciebski kurjer-M» atrymała list ad namieśnicy ministra infarmacyi Lilii Ananič: čynoŭnica patrabuje «dać tłumačeńni nakont padstavaŭ» dla publikacyi artykuła «Viciaź» mima kasy» pra karupcyju va UP «Viciaź». Vyjaviłasia, što kiraŭnictva zavodu napisała list u Mininfarmacyi, dzie paćvierdziła praŭdzivaść pryviedzienych źviestak, ale zacikaviłasia krynicaj infarmacyi hazety.
Pradprymalnika Mikałaja Aŭtuchoviča nie pryvieźli z turmy na praciah sudu ni 15, ni 16 červienia: u jaho paniziŭsia cisk, i jamu pastavili kropielnicu.
U Miensku zatrymali kala 20 udzielnikaŭ fłeš-mobu «Idealnyja hramadzianie». Siarod zatrymanych fatohraf «NN» Andrej Lankievič, Dziehciaroŭ, Bachun, Čaban, Hruzina, Vitko, Citova, Maryna Vaškievič, Alena Skrypnik, Julija Bałonkina.
Prakuratura i sud Homielskaj vobłaści pakinuli biaź źmienaŭ pastanovu sudu Čyhunačnaha rajonu Homielu, pavodle jakoj Uładzimiera Kacoru ŭ krasaviku aryštavali na 10 sutak pierad Čarnobylskim šlacham.
HA «Mahiloŭski pravaabarončy centar» atrymała list ad Mahiloŭskaha abłasnoha ŭpraŭleńnia justycyi: čynoŭniki patrabujuć, kab sa statutu arhanizacyi prybrali punkt, što abjadnańnie zabiaśpiečvaje abaronu pravoŭ hramadzianaŭ u sudach, orhanach dziaržaŭnaj ułady j hramadzkich arhanizacyjach.
Kanstancin Siŭčyk, brat Viačasłava Siŭčyka, atrymaŭ aficyjny adkaz na skarhu ŭ prakuraturu nakont niezakonnaha zatrymańnia ich maci, 70-hadovaj pensijanerki Haliny Siŭčyk 23 sakavika padčas sporby pranieści ježu ŭ namiotavaje miastečka. Adkaz pryjšoŭ z HUUS Mienharvykankamu za podpisam v.a. kamandzira PMSN padpałkoŭnika milicyi V.Surnova: milicyjant paviedamiŭ, što jahonyja padnačalenyja dziejničali pravamierna.
16 červienia
Vyvučeńnie spravy aktyvistaŭ arhanizacyi niezaležnych naziralnikaŭ «Partnerstva» Eniry Branickaj, Mikałaja Astrejki, Cimocha Drančuka, Alaksandra Šałajki praciahnutaje jašče na 1 miesiac.
U Žodzinie padčas fłeš-mobu «Pramień Svabody» (soniečnyja zajčyki ŭ vokny harvykankamu) zatrymanyja moładzievyja aktyvisty Siaržuk Hudzilin, Pavał Karaniuchin i Dzianis Čerkas. Milicyjanty nia viedali, jak aformić zatrymanych, i praz 20 chvilinaŭ adpuścili z pastarunku.
Padčas žorstka razahnanaj akcyi kala rasiejskaha pasolstva zatrymanyja Michaił Kandrašoŭ, Volha Kustava, Siarhiej Łasy, Alaksiej Laŭkovič, Natalla Vuško, Andrej Kuźminski, Rusłan Maćviejeŭ, Ivan Burykin, Źmicier Chviedaruk, Pavał Davidovič, Arsień Cedryk, A.Alfiarovič, S.Barysievič, V.Łokaŭ, Źmicier Kučynski, Luboŭ Kučynskaja, Źmicier Barodka, Kiryła Paponaŭ, V.Sałaruk, Michaił Šubač, Iryna Zavadzkaja, Valer Jankoŭski, Kryścina Šacikava, Raman Šarfanovič, V.Hryhorjeŭ, Aleś Kalita, Andrej Čapialevič, Alaksandar Kurbacki, Michaił Šuciankoŭ, Julija Haračka, Nastaśsia Čarankova, Ludmiła Majorava, Aleś Ułasienka, Ivan Šablinski, Pavał Varabjoŭ, Andrej Babicki, Daniła Barysievič, Ivan Šutko, Uładź Pietrušenka, Uładzimier Michalkoŭ, Alaksandar Saŭrycki, Aleh Ubožanka, Hanna Kamkar, Jullan Hajduk, Cina Pałynskaja, Pavał Juchnievič, Vika Sacharuk, Alaksandar Turko. Da źbitaj pry zatrymańni Ł.Kučynskaj supracoŭniki Centralnaha RUUS Miensku admovilisia vyklikać «chutkuju».
U Mahilovie padčas fłeš-mobu ŭ Dzień salidarnaści zatrymanyja aktyvist PBNF Ryhor Kastusioŭ, aktyvisty AHP Siarhiej Stralcoŭ i Iryna Kačarova, a taksama moładzievyja aktyvisty Kaciaryna Illina j Natalla Padolskaja, paśla akcyi – aktyvist BSDP(H) Pavał Vusaŭ i Maryna Ćviatkova. Na ŭsich skłali pratakoły za zaśmiečvańnie hramadzkaha miesca.
Kanstancin Dzienisienia ź Biełaaziorsku atrymaŭ poštaj paviedamleńnie, što 6 červienia jamu prysudzili štraf u 5 b.v. za raspaŭsiud «drukavanych vydańniaŭ, vyrablenych z parušeńniem vyznačanaha paradku» 10 sakavika.
Učastkovy Alaksandar Bojka naviedaŭ u Kobryni aktyvista PBNF Alesia Miecha z rospytami, kštałtu jakoje toj maje dačynieńnie da raspaŭsiudu ŭlotak «Ruchu za Svabodu»: maŭlaŭ, 25 traŭnia za raspaŭsiud hetych ulotak zatrymali 2 čałavieki, jakija na dopycie ŭ KDB skazali, što ich daŭ A.Miech.
19 červienia
Žurnalist hazety «Komsomolskaja pravda v Biełarusi» Aleh Ulevič abskardziŭ u zvarocie da prakurora Miensku rašeńnie hałoŭnaha ŭpraŭleńnia papiaredniaha raśśledavańnia HUUS Mienharvykankamu pra spynieńnie kryminalnaj spravy pa fakcie jahonaha źbićcia 2 sakavika. U jakaści śviedkaŭ Ulevič prapanavaŭ pryciahnuć kala 30 milicyjantaŭ, ź jakich 3 viali zdymki na videakamery, i 20 hramadzian, jakija znachodzilisia kala miesca incydentu.
AŠ
❏
Hladzi jašče:
Bieł-čyrvona-bieły ściah nad salihorskim vykankamam
Akcyja suprać rasiejskich vajskovych bazaŭ
Kamientary