Situacyja na biełaruskim rynku kredytavańnia kupli (budaŭnictva) žylla ŭ cełym vyhladaje «pa‑raniejšamu biazradasnaj».
Da takoj vysnovy pryjšli ekśpierty interniet‑partała Infobank.by u sakavickim rejtynhu kredytaŭ na nieruchomaść.
Zaznačana, što kuplu (budaŭnictva) žylla ŭ Biełarusi kredytujuć usiaho piać z 31 dziejnaha banka. Pryčym try banki — «Biełarusbank», «BPS‑Bank» i «Bielinviestbank» — vydajuć kredyty tolki ŭ biełaruskich rublach, a «Biełrosbank» i «Pryjorbank», naadvarot, — u valucie.
Pavodle źviestak resursu Infobank.by, pracentnyja staŭki pa kredytach u apošni miesiac stabilizavalisia.
U biełaruskich rublach takija kredyty (na ahulnych padstavach) možna atrymać pad 25—26% hadavych.Bolš za toje, zaznačajuć ekśpierty, za minuły pieryjad «BPS‑Bank» źniziŭ pracentnuju staŭku z 28 da 25% u biełaruskich rublach.
«Biełarusbank», jaki jašče niadaŭna abmiažoŭvaŭ vydaču kredytaŭ tolki kredytami na budaŭnictva, ciapier pa takoj ža pracentnaj staŭcy (25%) kredytuje i nabyćcio žylla.
«Bielinviestbank» vydaje kredyty na žyllo pa staŭcy 26% hadavych, adnak prapanoŭvaje bolš praciahły termin — da 20 hadoŭ,u toj čas jak astatnija banki abmiažoŭvajucca terminam kredytavańnia ŭ 15 hadoŭ.
U «Biełrosbanka» i «Pryjorbanka», jakija vydajuć kredyty na žyllo ŭ valucie, pracentnyja staŭki adnolkavyja — 17% hadavych. Adnak, uličvajučy niepradkazalnaść situacyi z kursam valut, treba razumieć, što viartać valutnyja kredyty banku pryjdziecca taksama ŭ valucie. Tamu ekanomija na pracentnaj staŭcy pa valutnym kredycie moža abiarnucca vialikaj kursavoj roźnicaj u budučyni, padkreślivajuć ekśpierty partała.
Razhlad kredytnych zajavak u sakaviku adbyvajecca davoli chutka. Pavodle źviestak Infobank.by, najmienšyja terminy razhladu — u «BPS‑Banku» i «Biełarusbanku». U «Bielinviestbanku» termin razhladu vahajecca ŭ zaležnaści ad filijała ad dvuch da čatyroch tydniaŭ. Častku dakumientaŭ, nieabchodnych dla zaklučeńnia kredytnaha dahavora, dla papiaredniaha razhladu padavać u bank nie patrabujecca. U «Pryjorbanku» razhlad pakieta dakumientaŭ doŭžycca da dvuch tydniaŭ, u «Biełrosbanku» — da 20 kalandarnych dzion.
Ekśpierty zaznačajuć, što praktyčna ŭsie banki pierahledzieli svaje patrabavańni da dachodu kredytaatrymalnika i zabieśpiačeńnia pa kredycie. «Tendencyja całkam vidavočnaja — dla taho kab bank vydaŭ kredyt na žyllo, zarablać siońnia treba značna bolš, čym učora», — kanstatuje interniet‑resurs.