Małajzijskaja kampaniija Karex Bhd vyrablaje kožny piaty kandom u śviecie. Za apošni tydzień jana nie vyrabiła nivodnaha, bo ŭrad hetaj paŭdniovaazijackaj krainy ŭvioŭ strohi karancin, kab spynić raspaŭsiud karanavirusa. U tym liku byli zakrytyja ŭsie pradpryjemstvy, nie źviazanyja z farmaceŭtyčnym i charčovym łancužkami.
Heta imhnienna pryviało da deficytu na suśvietnym rynku 100 miljonaŭ preziervatyvaŭ — mienavita stolki Karex Bhd vyrablaŭ za tydzień.
Tak što, mahčyma, tyja ludzi, jakija va ŭsim śviecie ažyjatažna raschoplivali tualetnuju papieru, pamylalisia z vybaram tavaru.
Siarod brendaŭ, jakija vykarystoŭvali małajzijskija preziervatyvy, byŭ, naprykład, prysutny na ŭschodniejeŭrapiejskim rynku Durex.
Ułady Małajzii dali Karex Bhd admysłovy dazvoł adnavić dziejnaść ź piatnicy, ale tolki z 50-pracentavaj zahruzkaj. Dziela hetaha kampanii nadali status «krytyčna važnaj vytvorčaści», paviedamlaje ahienctva Rojterz. 50-pracentavaje abmiežavańnie maje na mecie zabiaśpiečyć zachavańnie biaśpiečnaj dystancyi miž rabotnikami na vytvorčaściach.