Śmiarotnaść ad karanavirusa ŭ śviecie składaje 6%. Ci budzie ŭ Biełarusi toje samaje?

Ciapierašniaja ličba śmiarotnaści tłumačycca tym, što pierahružanyja sistemy achovy zdaroŭja ŭ mnohich rehijonach bolš nie teścirujuć usich ludziej ź simptomami, a tolki samych ciažkich pacyjentaŭ.

COVID-19 našmat bolš niebiaśpiečny za hryp. Śmiarotnaść ad jaho ŭ 20-30 razoŭ vyšejšaja, čym pry hrypie. Ale jana ŭsio ž składaje ŭsiaho tolki kala 1-2% pry ŭmovie jakasnaj miedyčnaj dapamohi chvorym. Heta vynikaje sa statystyki, sabranaj u roznych krainach.

Hruntoŭnuju infarmacyju pra COVID-19 daŭ epidemijołaham kruizny łajnier Diamond Princess. Paśla zaražeńnia častki jaho pasažyraŭ i ekipažu karabiel pryšvartavali ŭ Japonii i ŭsich, chto na im byŭ, pravieryli. Usiaho na sudnie vyjavili 712 vypadkaŭ karanavirusa. Prykładna ŭ pałovy ź ludziej nie było prykmiet infiekcyi. Pamierli ź liku pasažyraŭ 12 čałaviek. Jašče niekatoryja zastajucca ŭ ciažkim stanie dahetul, praz dva miesiacy paśla ŭspyški. Možna mierkavać, što nie ŭsie jany vyžyvuć.

Pacyjentam akazali jakasnuju miedycynskuju dapamohu: u Japonii adna z najlepšych miedycyn u śviecie.

Statystyka Diamond Princess i daje padstavy mierkavać, što śmiarotnaść moža składać 2%. Možna zrabić skidku na toje, što na sudnie padarožničali pieravažna niemaładyja ludzi, ale, z druhoha boku, chvorym była akazana dobraja dapamoha.

Čytajcie taksama: Karanavirus u BPS-Śbierbanku: 51-hadovy kiroŭca pamior, top-mieniedžary ŭ balnicy

Statystyka chvorych i pamierłych u Kitai (tam śmiarotnaść skłała kala 4%, pavodle aficyjnych źviestak) naŭrad ci padydzie dla analizu. Zanadta šmat jość padstaŭ dumać, što praŭdzivyja ličby kitajskija ŭłady chavali.

Ale jość krainy, dzie teściravańnie pacyjentaŭ viałosia vielmi šyroka, chvorych identyfikavali ledź nie pajmienna, a tradycyi falšavać infarmacyju niama. Heta takija roznyja krainy, jak Paŭdniovaja Kareja, Sinhapur, Niamieččyna, Narviehija, Estonija, Isłandyja.

U Paŭdniovaj Karei ź jaje vydatnaj miedyčnaj sistemaj na siońnia vyjavili trochi bolš za 10400 infikavanych, a pamierli 204 čałavieki. Jašče kala 50 zastajucca ŭ ciažkim stanie. Takim čynam, i tut śmiarotnaść składaje kala 2%.

U Niamieččynie zarehistravali 2349 śmierciaŭ pry 113 tysiačach vypadkaŭ (śmiarotnaść kala 2%). Ale pry takoj kolkaści zaražeńniaŭ niemcam naŭrad ci ŭdavałasia vyjavić usie łancužki.

U Sinhapury 6 śmierciaŭ i 29 krytyčnych vypadkaŭ pry 1600 vyjaŭlenych.

U Estonii 24 śmierci na 1200 vypadkaŭ. U Narviehii — 101 śmierć pry bolš čym 6000 vypadkach. U Isłandyi — 6 śmierciaŭ pry bolš jak 1600 vypadkach.

Čamu ž tady ŭ śviecie ŭ cełym zarehistravali ŭžo bolš za 89 000 śmierciaŭ pry 1,5 miljona zaražanych? Śmiarotnaść składaje amal 6%, a ŭ Italii, Brytanii, Bielhii, Niderłandach jana dasiahaje 10-13%!

Heta ŭsio tamu, što hetyja krainy zapuścili praces raspaŭsiudžvańnia zarazy na pieršym etapie, i chvorych tam stolki, što ludzi ź lohkimi prajavami prosta zastajucca doma, a balnicy zajmajucca tolki ciažkimi vypadkami. Tady ludziej ź lohkimi prajavami pierastajuć teściravać: miedykaŭ na heta nie chapaje. 

Ale pakul niama padstaŭ dumać, što ŭ Italii ci Bielhii cyrkuluje niejki asabliva niebiaśpiečny štam karanavirusa. Prosta tam infikavanych ludziej našmat bolš, čym viedaje statystyka.

Uvohule, statystyka ŭ takich ekstremalnych umovach — reč adnosnaja. Niekatoryja krainy pryznajuć, što nie zdolnyja źbirać źviestki pra pamierłych doma, a nie ŭ špitalach. Niekatoryja krainy Treciaha śvietu pravodziać nastolki mała testaŭ, što vyznačyć realnuju karcinu tam možna tolki ŭskosna.

Čytajcie taksama: Ci spyniać pandemiju paciapleńnie i sonca?

Z časam testy na antycieły vyjaviać, u kaho imunitet da COVID-19 užo sfarmiravaŭsia, a kamu daviadziecca prajści vakcynacyju. A moža być, vakcynacyju zrobiać usioachopnaj dla ekanomii srodkaŭ.

Jak bačym, karanavirus — heta nie prysud. Ale heta vielmi surjoznaja chvaroba, ad jakoj treba zaścierahacca. Jak miarkujecca, vakcyny i leki ad COVID-19 źjaviacca ŭ kancy 2020-ha abo na pačatku 2021 hoda. Da taho momantu čałaviectva moža nakryć adna, a moža, i dźvie chvali pandemii. 

• 0
• 0
• 0
• 0
• 0
• 0
• 0
• 0