27 červienia ź Miensku vyjdzie XVI piešaja pilihrymka ŭ nacyjanalny sanktuaryj Maci Božaj u Budsłavie
Sioletniaja ŭračystaść Najśviaciejšaj Panny Maryi ŭ Budsłavie adbudziecca, jak i štohod, 2 lipienia. U inšych kaściołach jana pieraniesienaja ź niadzieli na subotu, 1 lipienia 2006 h. 27 červienia ź Miensku vyjdzie XVI piešaja pilihrymka ŭ nacyjanalny sanktuaryj Maci Božaj u Budsłavie.
Pierad darohaju, jakaja pradoŭžycca piać dzion, usie ŭdzielniki pilihrymki źbiarucca ŭ mienskim archikatedralnym kaściole Imia Najśviaciejšaj Panny Maryi, dzie a 8-j hadzinie raspačniecca śviataja Imša ŭ intencyi pilihrymaŭ.
Čakajecca, što, akramia viernikaŭ ź mienskich parafij, u hetaj pilihrymcy buduć brać udzieł vierniki z Babrujsku, Mahilova, Sankt-Pieciarburhu i Maskvy. Arhanizacyjny schod udzielnikaŭ pilihrymki adbudziecca ŭ niadzielu 25 červienia ŭ archikatedralnym kaściole (pł. Svabody, 9) paśla śviatoj Imšy a 18.30.
Usie, chto žadaje pieški prajści ź Miensku da nacyjanalnaha sanktuaryja Maci Božaj Budsłaŭskaj, mohuć zapisacca ŭ pilihrymku ŭ svaich parafijach. Košt udziełu składaje 20 tysiač rubloŭ. Prymajucca taksama achviaravańni ŭ “fond salidarnaści”, kab pakryć vydatki za tych, chto nia moža ŭnieści hetuju sumu.
Što ŭziać z saboju ŭ pilihrymku? — Tolki samaje nieabchodnaje:
1. Śviatoje Pisańnie (prynamsi, Novy Zapaviet).
2. Ružaniec.
3. Malitoŭnik.
4. Dastatkovuju kolkaść bializny i pradmietaŭ asabistaj hihijeny.
5. Zručny lohki abutak, dobra raznošany (nie zaškodzić mieć zapasnuju paru).
6. Pieramienu vopratki na vypadak daždžu.
7. Parason abo niepramakalny płašč i kiepku abo chustačku na hałavu.
8. Spalnik z dyvankom.
9. Namiot (adzin na niekalki asobaŭ, pa damoŭlenaści ź siabrami).
10. Ciopłaje adzieńnie (nočču ŭ Budsłavie zvyčajna chałodna).
…a taksama dobry malitoŭny nastroj!
Pilihrymka — padarožža malitvy! Pilihrymu nie pasuje ŭžyvać alkaholnyja napoi i piva, palić, hulać u karty i inšyja padobnyja hulni, a taksama parušać ahulny dla ŭsich paradak, narakać i skardzicca.
Poŭnuju i padrabiaznuju infarmacyju pra ŭdzieł u pilihrymcy možna budzie atrymać na arhanizacyjnym schodzie.
Ciapier čytajuć
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki25
Kamientary