Navukoŭcy vyśvietlili, što samyja surjoznyja formy paškodžańniaŭ lohkich, pryčynaj jakich stanovicca karanavirusnaja infiekcyja, mohuć być źviazanyja z anamalna vysokaj aktyŭnaściu niejtrafiłaŭ — karotkačasovych imunnych kletak. Apisańnie daśledavańnia apublikavaŭ Journal of Experimental Medicine, piša tass.ru.
Niejtrafiły — heta samy pašyrany typ imunnych kletak, jany reahujuć na pieršyja prykmiety praniknieńnia infiekcyi ŭ arhanizm. Hetyja karotkačasovyja cielcy ruchajucca ŭ bok ačahoŭ zapaleńnia, zachoplivajuć i «pieravarvajuć» bakteryi, a taksama vypracoŭvajuć asablivy nabor rečyvaŭ, jakija zabivajuć i adpužvajuć mikrobaŭ.
Akramia hetaha niejtrafiły mohuć zmahacca ź infiekcyjaj inšymi šlachami: jany vypracoŭvajuć struktury, jakija miedyki nazyvajuć «niejtrafilnymi ekstrakletkavymi pastkami» (NEP). Hetyja struktury ŭjaŭlajuć saboj nabor z mnostva białkovych malekuł i ŭryŭkaŭ nitak DNK, jakija mohuć złučacca ź virusami i mikrobami i źniščać ich.
Vyvučajučy frahmienty lohkich troch pacyjentaŭ, jakija zahinuli ad COVID-19, navukoŭcy vyjavili pieršyja prykmiety taho, što NEP mohuć paharšać karanavirusnuju infiekcyju. Z-za ich mohuć źjaŭlacca samyja surjoznyja paškodžańni lohačnaj tkanki.
U hetych uzorach navukoŭcy zaŭvažyli charakternyja struktury i skapleńni niejtrafiłaŭ, ź jakimi jany sutykalisia ŭ minułym, analizujučy tkanki cieła ludziej, jakija zahinuli ad samych ciažkich formaŭ hrypu, a taksama zaražeńnia kryvi. Tady bijołahi pryjšli da vysnovy, što pryčynaj źjaŭleńnia hetych paškodžańniaŭ była praźmierna vysokaja aktyŭnaść niejtrafiłaŭ i źjaŭleńnie vialikaj kolkaści NEP u lohkich i inšych orhanach.
Jak miarkujuć aŭtary artykuła, niešta padobnaje adbyvałasia i ŭ arhaniźmie ludziej, jakija pieranieśli samyja ciažkija formy karanavirusnaj infiekcyi abo pamierli ad ich. Na karyść hetaha kaža toje, što ŭ ich kryvianosnaj sistemie miedyki vielmi časta znachodzili tromby i inšyja typy zhustkaŭ kryvi, u jakich byli ślady niejtrafiłaŭ. Niešta padobnaje adbyvajecca pry niekatorych formach raku i siepsisu, u raźvićci jakich zamiašanyja hetyja imunnyja kletki.
Kali heta sapraŭdy tak, to ciažkaść karanavirusnaj infiekcyi možna źnizić z dapamohaj preparataŭ, jakija źnižajuć aktyŭnaść niejtrafiłaŭ abo razburajuć NEP. U najbližejšy čas navukoŭcy pravierać hetuju teoryju, vyvučajučy novyja ŭzory tkanak cieła pacyjentaŭ i pravodziačy ekśpierymienty na kulturach ich kletak.
