«Našaj Nivie» stała viadoma jašče pra try śmierci ŭ Dokšycach. U dvuch vypadkach svajaki kažuć pra karanavirus. Usiaho nam viadoma pra minimum 12 śmierciaŭ ad «pnieŭmanij» u hetym rajonie.
Čytajcie. «I chto siadzieŭ kala jaje, źlahli ź pnieŭmanijami». Dokšycy sprabujuć zrazumieć, jak zaniośsia virus
17 krasavika ŭ Dokšycach pamierła 51-hadovaja Łarysa Mielnikava. Syn žančyny paviedamiŭ, što ŭ jaje byŭ karanavirus.
Łarysa žyła adna. Prastudziłasia, zabrali ŭ balnicu. Praz 11 dzion pamierła.
Pa słovach syna, pryčynaj śmierci zapisanyja karanavirus i sardečnaja niedastatkovaść.
Łarysa Mielnikava, fota z «Adnakłaśnikaŭ»
Mielnikava pracavała na dokšyckim chlebazavodzie. A na nastupny dzień, 18 krasavika, pamierła jaje kaleha, 59-hadovaja Kryścina Chacianovič.
Svajaki paćvierdzili: u žančyny byŭ karanavirus. Ale padrabiaźniej havaryć nichto ź ich nie zachacieŭ.
Kryścina Chacianovič, fota z «Adnakłaśnikaŭ»
«Naša Niva» źviazałasia z Alaksiejem Bajkovym, dyrektaram chlebazavoda. Jon raskazaŭ, što analizy jašče dźviuch rabotnic pakazali Covid-19. Ale, kaža dyrektar, adnu žančynu ŭžo vypisali z balnicy, druhuju chutka vypišuć.
Što tyčycca rabotnkaŭ, jakija vyjavilisia kantaktami pieršaha ŭzroŭniu, to ŭsie byli adpraŭlenyja na 14-dzionny karancin.
«Praca idzie ŭ adpaviednaści z sanitarnymi normami, navat bolš za toje. Try razy na sutki apracoŭvajem usie pamiaškańni, u kancy kožnaj źmieny ŭsio, navat dźviery, vokny i bytoŭki, dezynfikujecca», — zapeŭnivaje dyrektar.
U piatnicu, 17 krasavika, pamior taksama 73-hadovy piensijanier z Dokšyc Michaił Traščanka. U paśviedčańni ab śmierci mužčyny staić «vostraja reśpiratornaja niedastatkovaść» i «pnieŭmanija, uzbudžalnik jakoj nie vyznačany».
«Pra karanavirus ničoha nie viedaju. Mnie ničoha nie kazali. Mnie pravieryli lohkija na fluarahrafii, skazali, što ŭsio narmalna i kab ja mienš chadziła na vulicu. Muž vielmi chvory byŭ, mieŭ palicytemiju, heta surjoznaje zachvorvańnie kryvi. 10 hadoŭ tamu pieranios abšyrny infarkt, dva hady tamu lažaŭ u reanimacyi z aciokam lohkich, — kaža žonka Michaiła Traščanki.
— A ciapier iznoŭ lažaŭ u balnicy. Pakłali na dva tydni, paśla vypisali, a jon pajechaŭ na rybałku. Paśla rybałki stała kiepska, iznoŭ zabrali ŭ balnicu. Pravioŭ tam 10 dzion, kali stali razhružać balnicy, jaho vypisali. Ale doma jamu znoŭ stała kiepska, ja vyklikała chutkuju. U treci raz u balnicy muž pralažaŭ 11 dzion i pamior».
Ale, kaža žonka, chavali Traščanku ŭ zakrytaj trunie.
«Čamu? Nie viedaju, nam nichto ničoha nie kazaŭ. Ci možna było adkryvać, taksama nie skazali», — raskazała nam jahonaja žonka.
Čytajcie. Dokšyckaja plama. Za niekalki dzion u maleńkim haradku ad pnieŭmanii pamierli, jak minimum, troje
Usiaho «Našaj Nivie» viadoma pra jak minimum 12 śmierciaŭ ad «pnieŭmanij» u hetym rajonie.