Kolki tydniaŭ tamu ŭ svajoj našaniŭskaj publikacyi ja vykłaŭ prapanovu dla ŭładaŭ sioleta zakončyć navučalny hod paśla treciaj čverci, atestavać vučniaŭ pa vynikach troch čverciaŭ za hod, vypusknyja ekzamieny (z vyniatkam eksternata) admianić, a dziela naboru ŭ VNU i SSNU zamiest Centralizavanaha testavańnia pravieści zvyčajnyja ŭstupnyja ekzamieny pa materyjałach, raspracavanych samimi ŭstanovami na asnovie prahram siaredniaj škoły, i, jak heta rabiłasia apošnija bolš za dvaccać hadoŭ, brać pad uvahu pry vyrašeńni pytańnia ab zaličeńni abituryjentaŭ taksama siaredni bał atestata.
Pry praviadzieńni vusnych ustupnych ekzamienaŭ VNU zmohuć lahčej vykonvać epidemijałahičnyja zaściarohi. Naprykład, abituryjenty mahli b zachodzić u budynak pa adnym u dakładna vyznačany čas (hadziny, chviliny), rychtavacca na biaśpiečnaj dystancyi ad inšych, što zajšli raniej, i pa adnym zdavać ustupnyja ispyty vykładčykam, jakija mohuć siadzieć u roznych kutach aŭdytoryi. Piśmovyja ŭstupnyja ispyty (možna i ŭ vyhladzie vykanańnia zadańniaŭ dla CT) pravodzić małymi hrupami ŭ najbolšych, patokavych aŭdytoryjach abo čytalnych załach.
Zdajecca, hetyja prapanovy ćviarozyja i realistyčnyja, i ich tak ci inakš ministerstvu vymušana daviadziecca realizoŭvać. U dačynieńni da atestacyi za try čverci heta pačynaje ździajśniacca!
Ale «NN» napačatku dała ŭ svaim padzahałoŭku da materyjału niedakładnaje tłumačeńnie: maŭlaŭ, Barščeŭski prapanoŭvaje zaličvać u VNU i SSNU na padstavie siaredniaha bała atestata. Paśla hetaha chto tolki nie pačaŭ, nie ŭčytaŭšysia ŭ maje prapanovy jak śled, pieramyvać maje kostki! Dalej — bolš. «Naša Niva» piša, što Lavon Barščeŭski prapanavaŭ zaličvać u VNU znoŭ-taki «pavodle siaredniaha bała atestata», i piedahoh i były čynoŭnik Siarhiej Alšeŭski ŭščent raźbivaje toje, čaho ja zusim nie prapanoŭvaŭ!
Čytajcie taksama: Jak pravodzić CT va ŭmovach pandemii? Piedahohi prapanujuć roznyja varyjanty
