U karjery i žyćci maładoha futbalista chapała dram, jakija ledź nie pieraškodzili jamu raskryć svoj talent. Raskazvajem historyju 88-ha numara «Šachciora».
Pra Vitala Lisakoviča pačali aktyŭna kazać uviesnu 2016 hoda paśla hulni za supierkubak. Tahačasny trenier «Šachciora» Siarhiej Nikifarenka ŭ druhim tajmie nie pabajaŭsia vypuścić u matčy suprać BATE 18-hadovaha junaka, jaki adrazu pačaŭ teraryzavać abaronu barysaŭcaŭ.
«Harniaki» toj matč prajhrali, ale Lisakoviča žurnalisty nazvali samym talenavitym hulcom «Šachciora» za apošniaje dziesiacihodździe, a sam forvard atrymaŭ zaprašeńnie ŭ moładzievuju zbornuju.
Charaktar, jaki zahartoŭvaŭsia na vulicy
Vital Lisakovič u matčy za supierkubak 2016 hoda.
Pra dziacinstva futbalista viadoma niašmat. Vital naradziŭsia ŭ Minsku, ale ŭ 4 hady razam z małodšymi bratami Dźmitryjem i Rusłanam pierajechaŭ va Uzdu da babuli ź dziadulem. Maci chłopcaŭ pamierła, a baćka časta traplaŭ za kraty.
Va Uździe Lisakovičy i pačali zajmacca futbołam, pajšoŭšy pa śladach baćki i dzieda, jakija hulali na amatarskim uzroŭni. Vital dniami źnikaŭ na vulicy, dzie zahartoŭvaŭsia jahony charaktar. Kab zarabić aŭtarytet u dvary, časam treba było puskać u chod i kułaki. Kažuć, što niejak chłopiec navat traplaŭ u milicyju.
U 2011 hodzie na turniry rajonnych DzJuSŠ uździenskich chłopcaŭ zaŭvažyli pradstaŭniki «Šachciora». Asabliva funkcyjanieraŭ uraziła hulnia starejšaha z bratoŭ, jakoha adrazu zaprasili ŭ Salihorsk. Praź niekatory čas ŭ škołu «harniakoŭ» pierabralisia i małodšyja.
Vychavańnie darosłym futbołam
Charaktar junaka nikudy nie padzieŭsia i paśla pierachodu ŭ darosły futboł. Padčas trenirovak z asnovaj Vital moh pasłać na try litary hulca, starejšaha za siabie.
Za pieravychavańnie Lisakoviča sprabavali bracca daśviedčanyja futbalisty, ale praź niekatory čas kidali, bo ničoha nie atrymlivałasia.
Paśla jaskravaha debiutu junak praciahvaŭ hulać u asnoŭnym składzie «Šachciora», a zaŭziatary kamandy try razy zapar pryznavali Lisakoviča najlepšym hulcom miesiaca.
Ale ŭ mai 2016-ha ŭ futbalista pačalisia prablemy z kalenam, praź jakija jon prapuściŭ try miesiacy i nie zhulaŭ u moładzievaj zbornaj.
Ź lačeńnia pačaŭsia i druhi siezon napadajučaha ŭ darosłym futbole: u sakaviku 2017-ha jamu zrabili apieracyju na pachvinnych kolcach. U stroj Vital zmoh viarnucca praz dva miesiacy i staŭ najmaładziejšym aŭtaram hoła ŭ finałach kubka Biełarusi. Ale heta nie dapamahło «Šachcioru» ŭziać trafiej.
Pryhody z «maładziožkaj»
Lisakovič atrymlivaŭ stabilnuju praktyku ŭ kłubie, ale z vyklikami ŭ zbornuju pastajanna zdaralisia pryhody. Debiutavaŭšy za «maładziožku» u kastryčniku 2016-ha, nastupnuju hulniu za zbornuju forvard pravioŭ tolki praz dva hady.
Vital pryjazdžaŭ na zbory, ale banalna nie moh hulać. Pra situacyju z napadajučym «Šachciora» vykazaŭsia trenier «maładziožki» Ludas Rumbucis: «Kali čałaviek nie moža, kali ŭ jaho niešta balić, ty ž jaho nie prymusiš hulać. … Jon nas nie razumieje, i my jaho nie razumiejem u hetym płanie. Zbornaja — heta zbornaja. Usie hulcy imknucca vystupać za nacyjanalnuju kamandu. I ŭhavorvać my nikoha nie budziem. Čałaviek sam sabie haspadar. Kali jon choča raści jak futbalist, jon pavinien hulać za zbornuju. Kali jon choča čahości inšaha, to heta jaho prablemy».
Časam zdaralisia kamičnyja situacyi. U vieraśni 2017-ha Lisakovič nie zmoh pryjechać na matčy «maładziožki» z-za traŭmy ruki. Akazałasia, što paśla prajhranaj hulni suprać BATE forvard byŭ nastolki złym, što pačaŭ łamać meblu i atrymaŭ pierałom kiści.
Charvackija siezony
Zrazumieła, što talent biełarusa nie moh zastacca nie zaŭvažanym jeŭrapiejskimi kamandami. Lisakoviča svatali ŭ bielhijski «Standard», ale ŭ studzieni 2018-ha forvard apynuŭsia ŭ zahrabskim «Dynama».
Mierkavałasia, što charvacki top-kłub, jaki vielmi dobra ŭmieje pracavać z maładymi hulcami, zmoža raskryć i talent biełarusa. Ale z-za prablem sa zdaroŭjem jon nie zmoh siabie prajavić u Zahrabie: tolki 11 matčaŭ u dublujučaj kamandzie «Dynama», jakaja hulała ŭ druhoj charvackaj lizie.
Viadoma, pra praciah arendy nie mahło iści havorki. Lisakovič viarnuŭsia ŭ Salihorsk, dalečvaŭ svaje balački i rychtavaŭsia da viartańnia na pole pad kiraŭnictvam Siarhieja Tašujeva.
Rasijski trenier «Šachciora» sprabavaŭ znajści padychod da składanaha charaktaru forvarda, ale tak i nie zdoleŭ zrabić hetaha. U vyniku ŭ čempijanacie-2018 Lisakovič pravioŭ usiaho 23 chviliny ŭ dvuch matčach.
U nastupnuju mižsiezonku maładoha forvarda nie ŭziali na zamiežnyja zbory z asnovaj «Šachciora», pakinuŭšy treniravacca z dublem. Tašujeŭ prapanavaŭ hulcu razabracca ŭ sabie i pačać hladzieć na futboł bolš surjozna. Taksama źjavilisia razmovy pra pierachod u bresckaje «Dynama».
Ale ŭ vyniku Lisakovič znoŭ apynuŭsia ŭ Charvatyi — biełarusa na paŭhoda arandavaŭ aŭtsajdar «Rudzieš». U hetaj kamandzie forvard pravioŭ 14 matčaŭ i zabiŭ čatyry miačy.
Kali ŭ lipieni Lisakovič viarnuŭsia ŭ Salihorsk, tam na jaho nie raźličvali. Tamu jon znoŭ adpraviŭsia pa viadomym maršrucie — na hety raz u kamandu «Varaždzin».
Forvard zbornaj na biazrybji
U apošni čas biełaruski futboł vostra adčuvaje deficyt zabiŭnych napadajučych. Z 2008 pa 2019 hod u čempijanacie najlepšy bambardzir nie moh zabić bolš za 15 miačoŭ.
Letaś uzyšła zorka Illi Škuryna, jaki zmoh adznačycca 19 hałami ŭ vyšejšaj lizie. Ale praz kanflikt z hałoŭnym trenieram «nacyjanałki» Michaiłam Marchielem forvard «Enierhietyka» pryncypova nie vyklikaŭsia ŭ zbornuju.
Zamiest adnaho napadajučaha sa składanym charaktaram Marchiel vyklikaŭ u hałoŭnuju kamandu krainy inšaha — Vitala Lisakoviča, ź jakim byŭ dobra znajomy pa pracy va junijorskaj i moładzievaj zbornych. Hulec «Varaždzina» debiutavaŭ u zbornaj 10 kastryčnika 2019 hoda, vyjšaŭšy na zamienu ŭ matčy suprać Estonii.
Paśla Lisakovič źjaŭlaŭsia ŭ formie zbornaj u adboračnym matčy z Hiermanijaj, a taksama ŭ sparynhach z Čarnahoryjaj, Uźbiekistanam i Bałharyjaj.
Źjaŭleńnie ŭ «nacyjanałcy» hulca, jakoha zaŭziatary amal zhubili z radaraŭ, vyklikała ŭ ich šmat pytańniaŭ. Tym bolš statystyka forvarda ŭ Charvatyi była niezajzdrosnaj. Ale stan spraŭ u našym futbole taki, što i Lisakovič atrymaŭ svoj šaniec u hałoŭnaj kamandzie krainy.
Na rachunku napadajučaha pakul niama hałoŭ, ale dziakujučy technicy Lisakoviča składana nie zaŭvažyć. Časam składvałasia ŭražańnie, što jon na pole ledź nie adziny, kamu niešta treba. Pakul astatnija hulcy zbornaj Biełarusi pavolna pierasoŭvalisia pa hazonie, Lisakovič šturchaŭsia z abaroncami sapiernika, sprabujučy adabrać miač.
Treci raz na ščaście
Minułaj vosieńniu ŭ «Šachcior» zamiest Siarhieja Tašujeva pryjšoŭ Juryj Viernidub. Forvard daterminova viarnuŭsia z arendy ŭ Charvatyi, jakaja musiła skončycca tolki sioleta.
Zimoj pisali, što Lisakovič sprabavaŭ svaje siły ŭ rasijskim «Urale» i što byŭ blizki da pierachodu ŭ «Astanu», ale ŭ vyniku vyrašyŭ pasprabavać u treci raz zahulać u rodnym kłubie.
Ukrainski trenier «Šachciora» adznačyŭ, što ŭsio ŭ rukach maładoha hulca i što pry naležnym staŭleńni da trenirovak i da siabie jon moža stać mocnym futbalistam.
Zimoj skład «Šachciora» pakinuli kankurenty Lisakoviča pa pazicyi: Mikałaj Januš, Uładzimir Chvaščynski i Ion Nikałajesku, tamu nie dziŭna, što Vital źjaviŭsia na poli ŭžo ŭ pieršaj hulni ŭ siezonie — suprać bresckaha «Dynama» za supierkubak.
U pieršych matčach Viernidub vykarystoŭvaŭ maładoha futbalista ŭ jakaści hulca łaŭki. Ale niezdavalniajučyja vyniki «Šachciora» zapatrabavali źmien, i ŭ pieršaj ža hulni ŭ startavym składzie Lisakovič adznačyŭsia hołam u varoty «Dynama-Brest».
Praz try dni «harniaki» znoŭ hulali ź bieraściejcami, ale ciapier u kubku. «Šachcioru» treba było adhulacca ź liku 0:2.
Lisakovič u hetym matčy znoŭ vyjšaŭ u starcie i adznačyŭsia dvojčy: spačatku zrabiŭ lik 2:2, a potym vyvieŭ «Šachcior» napierad ź pienalci. U vyniku salihorcy zmahli pieramahčy, ale sastupili pucioŭku ŭ finał z-za praviła haściavych hałoŭ — 4:2.
U nastupnym matčy suprać «Isłačy» Lisakovič znoŭ adznačyŭsia dublem. U vyniku «Šachcior» pieramoh ź likam 4:0.
Druhi hoł atrymaŭsia asabliva pryhožym:
U apošniaj hulni suprać «Słavii» napadajučy taksama adznačyŭsia pryhožym zabitym miačom:
Ciapier ataku salihorcaŭ składana ŭjavić siabie bieź Lisakoviča, a 22-hadovy napadajučy staŭ samym jaskravym biełaruskim forvardam, jaki nie baicca brać hulniu na siabie i zhulać niestandartna. Pośpiech svajho padnačalenaha Juryj Viernidub analizuje prosta: nie naviazvać jamu toje, što nie treba naviazvać. Pahladzim, što z hetaha atrymajecca.
