Ściapan Brasko žyŭ u pasiołku Roś Vaŭkavyskaha rajona, a na pracu ŭ sielsaviet jeździŭ u Subačy, što za 20 kiłamietraŭ.
Prastudnyja prykmiety ŭ mužčyny źjavilisia 29 krasavika. Stan vielmi rezka paharšaŭsia, tamu vyklikali chutkuju, pra heta «NN» raskazała jahonaja žonka Łarysa.
«Jaho amal adrazu ŭ reanimacyju zabrali — 60% lohkich było paškodžana. Mocnaja tempieratura trymałasia», — raskazvaje ŭdava.
Pa jaje słovach, test na karanavirus u Ściapana Brasko byŭ stanoŭčy. U samoj žančyny taksama byŭ dyjahnastavany COVID-19, jana taksama lažała ŭ vaŭkavyskaj balnicy.
«U mianie lahčej było, tolki 20% lohkich byli paškodžanyja. Mianie vypisali ŭ dzień pachavańnia Ściapana — 15 maja», — kaža spadarynia Łarysa. Na raźvitańni z mužčynam trunu nie adčyniali.
Adkul siamiejnaja para mahła zarazicca karanavirusam? «Nie viedajem, ci ja jamu pryniesła, ci jon mnie. U nas u škole, dzie ja pracuju, jość chvoraja na karanavirus. A ŭ jaho ŭ Subačach učastkovy bieśsimptomna zachvareŭ, i ŭsia siamja jahonaja. Adkul zaŭhodna mahło być. Nie skazać, što ŭ nas u Rosi šmat chvorych, ale jość», — havoryć Łarysa Hieorhijeŭna.
