Varona pieravodziła vožyka cieraz darohu? Nie, jana vybirała sabie abied VIDEA
Kiroŭca na adnoj z daroh Łatvii spyniŭsia i źniaŭ niezvyčajnaje videa: na im bačna, jak varona pieravodzić vožyka cieraz darohu, padšturchoŭvajučy dziubaj. Heta vyhladaje miła i humanna, a tamu videa imhnienna raźlaciełasia pa internecie, piša greenbelarus.info.
Zialony partał taksama jaho pahladzieŭ, a potym pacikaviŭsia ŭ śpiecyjalista: a takoje ŭvohule mahčyma? Tłumačyć Siamion Levy, śpiecyjalist pa pryrodaachoŭnych pytańniach hramadskaj arhanizacyi APB:
— Ludzi prajecyrujuć pavodziny varony na siabie, bačać, jak jana jaho padšturchoŭvaje dziubaj, nibyta padbadziorvaje i sprabuje dapamahčy pieravieści cieraz darohu, na jakoj vožyku niebiaśpiečna znachodzicca.
Nasamreč, varona bačyć u im patencyjnuju zdabyču, prosta sprabuje jaho niejak dziaŭbnuć u roznych miescach i sprabuje znajści ŭ im słabaje miesca, kab pieratvaryć vožyka ŭ svoj abied.
U jaje niama takich dumak, što vožyku pahražaje niebiaśpieka i treba chutčej dapamahčy jamu pierajści darohu.
Pa fakcie, dziejańni varony marnyja, vožyki nadziejna abaronieny ad varon, i jon prosta pierabiažyć darohu i niejki čas pieračakaje, pakul varona pierastanie dziaŭbci ihołki. Šancaŭ u jaje niama.
Jość inšyja ptuški, jakija siłkujucca vožykami, naprykład puhač ci vialiki padvorlik. Dziakujučy tamu, što ŭ takich ptušak dosyć vialikija kipciury, jany całkam zdolnyja prabić pokryva ihołak i, zrabiŭšy vožyku śmiarotnyja rany, mohuć adryvać kavałki miasa ad miortvaha cieła. Ale mnie asabista nie viadomy vypadak, kab varona zmahła pieramahčy žyvoha vožyka.
Kamientary