U niadzielu, 7 červienia, na hałoŭnaj płoščy Bieraścia prajšło tradycyjnaje karmleńnie hałuboŭ u znak pratestu suprać akumulatarnaha zavoda, jaki pabudavany za niekalki kiłamietraŭ ad horada. Pavodle infarmacyi bresckaha pravaabaroncy Ramana Kiślaka, na płoščy sabrałasia bolš za 200 čałaviek, paviedamlaje «Bresckaja hazieta».
Akcyja ŭ hety raz prajšła emacyjna, bo na płošču vyjšli ŭłaśniki akumulatarnaha zavoda, jakija, miarkujučy pa videa, nie adrazu zrazumieli pryčynu burnaj reakcyi hramadzian na svaju prysutnaść.
«Vy ŭ kursie, kolki razoŭ presavali našych ludziej? Vy viedajecie, kolki my atrymali adpisak? A štrafaŭ?» — zadaŭ im šerah pytańniaŭ adzin z aktyvistaŭ, tym samym patłumačyŭšy, čamu ludzi nastrojeny niehatyŭna.
Havorka taksama zajšła pra toje, što aktyvistaŭ — Dziamjana Lepiasieviča i Dźmitryja Biekaluka — nie puścili na ekskursiju pa zavodzie. Nahadajem, arhanizavać takuju ekskursiju i źniać pytańni 2 listapada padčas sustrečy z haradžanami ŭ DK prafsajuzaŭ prapanavaŭ staršynia harvykankama Alaksandr Rahačuk. Inicyjatyŭnaja hrupa padała ŭ harvykankam śpis ludziej, jakija chočuć trapić na zavod, ale 20 listapada 2019 hoda stała viadoma, što aktyvistaŭ adtul vykraślili. Nie dapamahli i nataryjalna zavieranyja davieranaści, jakija na ich aformili inšyja siabry inicyjatyŭnaj hrupy, jakija byli ŭ śpisie vizicioraŭ. U vyniku aktyvisty zajavili, što ŭ takim vypadku na ekskursiju nie pojdzie nichto sa śpisu, i nieŭzabavie raźjechalisia.
Ułaśniki zavoda adkazali koratka: «My puścim. My ničoha nie baimsia. My sfarmujem hrafiki, vy budziecie prychodzić hrupami. Siońnia my hatovyja dać mahčymaść usim ludziam pryjści na zavod i ŭbačyć usio na svaje vočy».
Paśla akcyi pratestu prysutnyja pajšli pa centralnych vulicach Bresta da kinateatra «Biełaruś».
