У Брэсце на традыцыйную акцыю кармлення галубоў прыйшлі новыя ўласнікі акумулятарнага завода
У нядзелю, 7 чэрвеня, на галоўнай плошчы Берасця прайшло традыцыйнае кармленне галубоў у знак пратэсту супраць акумулятарнага завода, які пабудаваны за некалькі кіламетраў ад горада. Паводле інфармацыі брэсцкага праваабаронцы Рамана Кісляка, на плошчы сабралася больш за 200 чалавек, паведамляе «Брэсцкая газета».
Акцыя ў гэты раз прайшла эмацыйна, бо на плошчу выйшлі ўласнікі акумулятарнага завода, якія, мяркуючы па відэа, не адразу зразумелі прычыну бурнай рэакцыі грамадзян на сваю прысутнасць.
«Вы ў курсе, колькі разоў прэсавалі нашых людзей? Вы ведаеце, колькі мы атрымалі адпісак? А штрафаў?» — задаў ім шэраг пытанняў адзін з актывістаў, тым самым патлумачыўшы, чаму людзі настроены негатыўна.
Гаворка таксама зайшла пра тое, што актывістаў — Дзям'яна Лепясевіча і Дзмітрыя Бекалюка — не пусцілі на экскурсію па заводзе. Нагадаем, арганізаваць такую экскурсію і зняць пытанні 2 лістапада падчас сустрэчы з гараджанамі ў ДК прафсаюзаў прапанаваў старшыня гарвыканкама Аляксандр Рагачук. Ініцыятыўная група падала ў гарвыканкам спіс людзей, якія хочуць трапіць на завод, але 20 лістапада 2019 года стала вядома, што актывістаў адтуль выкраслілі. Не дапамаглі і натарыяльна завераныя даверанасці, якія на іх аформілі іншыя сябры ініцыятыўнай групы, якія былі ў спісе візіцёраў. У выніку актывісты заявілі, што ў такім выпадку на экскурсію не пойдзе ніхто са спісу, і неўзабаве раз'ехаліся.
Уласнікі завода адказалі коратка: «Мы пусцім. Мы нічога не баімся. Мы сфармуем графікі, вы будзеце прыходзіць групамі. Сёння мы гатовыя даць магчымасць усім людзям прыйсці на завод і ўбачыць усё на свае вочы».
Пасля акцыі пратэсту прысутныя пайшлі па цэнтральных вуліцах Брэста да кінатэатра «Беларусь».
Цяпер чытаюць
«Соевыя экстрэмісты павінны адпрацаваць міску клубніц». Скардзіўся на ўмовы працы ў КДБ, а цяпер уцюхвае трэнінгі сілавікам — хто такі Антон Шабуневіч11
Каментары