Śviatłanu Kuprejevu padazrajuć va ŭčynieńni złačynstva adpaviedna častcy 2 artykuła 243 Kryminalnaha kodeksu: «uchileńnie ad vypłaty padatkaŭ u asabliva bujnym pamiery», paviedamlaje «Radyjo Svaboda».
Pra heta skazana ŭ pastanovie ab aryšcie majomaści i pieradačy na adkaznaje zachavańnie ad 12 červienia, paviedamiła karespandentu «Svabody» maci Śviatłany.
U dakumencie havorycca, što ŭ vytvorčaści Departamenta finansavych raśśledavańniaŭ KDK znachodzicca kryminalnaja sprava pa padazreńni Śviatłany Kuprejevaj i inšych asobaŭ va ŭčynieńni złačynstva pa častcy 2 artykuła 243 Kryminalnaha kodeksu, spałučanaha z naniasieńniem škody na ahulnuju sumu nia mienš za 8 miljonaŭ 950 tysiač rubloŭ, jaki dahetul nie kampensavany.
«U Śviatłany nikoli takich hrošaj nie było, i padatki jana spraŭna płaciła. Jana da hetaha jaŭna nia maje dačynieńnia, bo nia ŭ stanie takoje rabić», — kaža maci Śviatłany Taciana Mikałajeŭna.
Aryšt majomaści byŭ sankcyjanavany 15 červienia, i ŭ hety ž dzień pravaachoŭniki pryjšli na kvateru maci Śviatłany pad vyhladam rabotnikaŭ ŽESa.
Maci i muž raskazvajuć pra aryšt žančyny, jakaja źbirała podpisy za Viktara Babaryku
«Ja im adrazu skazała, što heta maja kvatera i ŭsie rečy maje, jaje tolki sukienki i abutak, — kaža Taciana Mikałajeŭna. — Tamu aryštavali lecišča, jakoje ja apisała na dačku. Heta špakoŭnia, a nie lecišča, 30 hadoŭ jamu, pierabudavanaje z matulinaj truchlavaj draŭlanaj chatki. Hety damok mnie braty zbudavali 30 hadoŭ tamu. I dva ŭčastki pa 4 sotki. U mianie jany spytali, u jakuju sumu ja acaniu lecišča, ja kažu, što ja nie specyjalist, mahčyma tysiač piać rubloŭ, bo ŭsio heta truchlavaje».
Čakajecca, što siońnia ŭ SIZA KDB budzie praviedzieny dopyt Śviatłany Kuprejevaj, na jakim budzie prysutničać advakat.
Maskoŭski sud Miensku ŭviečary 16 červienia adchiliŭ skarhi na zatrymańnie Śviatłany Kuprejevaj, siabra inicyjatyŭnaj hrupy Viktara Babaryki i kaardynatara pa adnym z rajonaŭ Miensku.
U štabie Babaryki pieraśled Kuprejevaj źviazvajuć z tym, što jana ŭvachodzić u skład inicyjatyŭnaj hrupy Viktara Babaryki, i patrabujuć spynić biespadstaŭny pieraśled svaich prychilnikaŭ.
Advakat skazaŭ karespandentu «Svabody», što pastanovu Maskoŭskaha sudu ŭžo abskardzili ŭ Mienski haradzki sud.
Dahetul naviedać Śviatłanu Kuprejevu ŭ izalatary KDB advakatu nie dazvolili z pryčyny karanavirusu.
Śviatłana Kuprejeva — dačka biełaruskaha paeta i piśmieńnika Mikoły Kuprejeva. Była blizkaj siabroŭkaj žonki Viktara Babaryki Maryny, jakaja zahinuła ŭ 2017 hodzie, chrosnaja maci jahonaj dački.
Pavodle štabu Viktara Babaryki, dačynieńnie Kuprejevaj da niejkich supraćzakonnych dziejańniaŭ vyklikaje vialikija sumnievy, bo jana nie pracavała ni ŭ Biełhazprambanku, ni ŭ choć jakoj ź firmaŭ, dzie prachodzili pieratrusy. Śviatłana tolki siabroŭka siamji Viktara Babaryki.
