Fota Vadzima Zamiroŭskaha
Siońnia ranicaj u Tut.by stali pastupać skarhi na chimičny pach vady ad minčan, jakija žyvuć u Sucharavie. «Pach padobny na jod — vielmi źjedliva i brydka», — kaža adna z žycharak vulicy Šaranhoviča. Na takuju ž prablemu paskardzilisia žychary Malinaŭki.
«U Sucharavie žudasna śmiardzić vada z-pad krana. Niemahčyma navat pačyścić zuby. Śmiardzić niejkaj mazutaj», — paviedamiła minčanka Hanna.
«Vadu nie toje što pić nielha, joj mycca niemahčyma. Kali heta niejkaja płanavaja čystka, to treba było pra heta papiaredžvać. Paśla duša ŭsio cieła śmiardzić i vočy ščyple», — paviedamiła Nasta, jakaja žyvie ŭ domie na vulicy Pančanki.
Žycharka doma na Šaranhoviča kaža, što paśla duša ŭsie pačuvajucca drenna.
U adnym z tavarystvaŭ ułaśnikaŭ doma na Akademika Karskaha žycharam patłumačyli, što nibyta na vodakanale zdaryłasia avaryja — štości trapiła ŭ vadu.
«Vyśviatlajuć, prymianiajuć miery pa likvidacyi. Pa terminach likvidacyi nieviadoma», — paviedamlajuć ludziam.
Žychary kažuć, što vadu im nie adklučali, raniej takoha nie było.
TUT.BY sprabuje atrymać kamientary ŭ kamunalnych słužbach, jak tolki stanie viadomaja pryčyna i terminy likvidacyi prablemy — materyjał budzie dapoŭnieny.
Z dastupnaj infarmacyi: na sajcie «Minskvodakanała» — vialiki śpis vulic, na jakich moža pahoršycca vodazabieśpiačeńnie ŭ rozny čas 24-26 červienia.
Naprykład, tam skazana, što z 9:00 24 červienia pa 9:00 26 červienia, «u suviazi z rehłamientnymi pracami, što pravodziacca UP «Minskvodakanał» (teł. 389-40-31), mahčyma paharšeńnie jakaści vodazabieśpiačeńnia ŭ m-nach Sucharava, Malinaŭka, Paŭdniovy Zachad u nazvany pieryjad i nastupnyja 3-je sutak».
Tam ža adznačajecca, što pa nieabchodnaści časova pitnuju vadu mohuć padvozić u cysternach pa nastupnych adrasach: Jankoŭskaha, 6, skryžavańnie vulic Sucharaŭskaja i Łabanka, skryžavańnie vulic Rafijeva i Lubimava, skryžavańnie vulic Rafijeva i Jasienina. Pakazany telefon: 389-40-31.