Alena Karahačava — byłaja pamočnica Viktara Babaryki ŭ Biełhazpramabanku i siabra jaho inicyjatyŭnaj hrupy. Jana była zatrymanaja 1 lipienia supracoŭnikami DFR KDK. Pavodle atrymanych źviestak, Karahačova abvinavačvajecca pa č. 2 art. 243 (Uchileńnie ad vypłaty sumy padatkaŭ i zboraŭ, što paciahnuła škodu ŭ asabliva bujnym pamiery). Jana źmieščanaja pad vartu ŭ SIZA KHB, paviedamlaje spring96.org.
Adzin z kaardynataraŭ inicyjatyŭnaj hrupy Dźmitryj Karaka byŭ zatrymany 18 červienia 2020 h. razam z Eduardam Babarykam pa darozie ŭ TVK dla zdačy sabranych podpisaŭ. Ad momantu zatrymańnia Karaka znachodzicca pad vartaj u SIZA KHB.
Uličvajučy dadzienyja akaličnaści, pravaabaroncy robiać vysnovu, što realnymi padstavami kryminalnaha pieraśledu Viktara Babaryki i siabraŭ jahonaj inicyjatyŭnaj hrupy źjaŭlajucca palityčnyja matyvy, skiravanyja na spynieńnie ich publičnaj dziejnaści pa vyłučeńni V. Babaryki ŭ jakaści kandydata ŭ prezidenty Respubliki Biełaruś i dalejšym udziele ŭ vybarach, havorycca ŭ zajavie pravaabaroncaŭ
Udzieł u kiravańni krainy praz praceduru pieryjadyčnych, svabodnych i demakratyčnych vybaraŭ źjaŭlajecca adnoj sa svabodaŭ, realizacyja jakoj harantavanaja hramadzianam Biełarusi jak Kanstytucyjaj, tak i mižnarodnymi normami ŭ halinie pravoŭ čałavieka, u pryvatnaści Mižnarodnym paktam ab hramadzianskich i palityčnych pravach.
U suviazi z hetym, pradstaŭniki biełaruskaj pravaabarončaj supolnaści, padćviardžajučy svaju pazicyju, vykładzienuju ŭ zajavie ab pryznańni V. Babaryki i zatrymanych siabraŭ jahonaj inicyjatyŭnaj hrupy ad 19 červienia 2020 h., zavili ab pryznańni Aleny Karahačovaj i Dźmitryja Karaka palityčnymi źniavolenymi i patrabujuć ich nieadkładnaha i biezumoŭnaha vyzvaleńnia.
Kolkaść palitviaźniaŭ u Biełarusi dasiahnuła 24.
