Źbirać možna kryški ad PET-butelek z-pad napojaŭ, bytavoj chimii i parfumieryi. Potym ich zdaduć na pierapracoŭku, a atrymanyja srodki pieradaduć na patreby dziaciej z zachvorvańniami CNS. Śpiecyjalnyja žoŭtyja kantejniery z prydumanymi hierojami — «kryšarykami» — možna znajści amal va ŭsich rehijonach krainy. Jak praviła, jany ŭstanoŭleny ŭ handlovych centrach, kramach, škołach i ŭniviersitetach.
U Minsku ich možna znajści ŭ HC «Halereja Minsk», «Hryn Sici», «Skała», «Aŭtleta», u niekalkich supiermarkietach «Susiedzi» i ŭ šmatlikich inšych miescach.
Sioleta pašyryć maštaby «kryškavaha» zboru dapamoža admysłovy hruzavik, jaki adpravicca ŭ 45 haradoŭ i inšych nasielenych punktaŭ Biełarusi. I prafinansuje hetuju ideju kampanija «Koka-Koła».
Usie atrymanyja srodki pojduć na reabilitacyju Mai i Cimafieja Hurskich — dvuch dzietak z Žodzina ź ciažkimi zachvorvańniami CNS. Mai 15 hadoŭ, heta vielmi žyćciaradasnaja dziaŭčynka, jakaja lubić muzyku i pryhožyja miaściny. Cimafieju — 10, heta viasioły i tavaryski chłopčyk. U abaich dzietak surjoznyja dyjahnazy, a vychoŭvaje ich adna mama. Ciapier jany majuć patrebu ŭ čatyroch kursach reabilitacyi: zaniatki lačebnaj fizkulturaj i masaž zamianiajuć im ruchomy ład žyćcia i nie dajuć ciahlicam atrafavacca. Reabilitacyju zapłanavali na kastryčnik — listapad, ale z-za vysokaha koštu prajści jaje za košt ułasnych srodkaŭ siamja nie moža. Tamu na dobruju spravu pojduć usie hrošy, jakija ŭdasca vyručyć ad sabranych kryšak.
Prajekt «Novaje žyćcio ŭ abmien na kryški» ŭžo dapamoh niekalkim padapiečnym ź Minska, Viciebska, Smarhoni i Rečycy. Ciapier ŭ dapamozie maje patrebu siamja Hurskich. Jašče adzin važny matyŭ — kłopat pra ekałohiju: płastyk nie zakopvajuć u ziamlu, a pierapracoŭvajuć.
Pryniać udzieł u dabračynnaj inicyjatyvie moža kožny. Dastatkova nie vykidvać kryški ŭ śmiećcievuju skryniu, a sabrać i prynieści da najbližejšaha žoŭtaha kantejniera z «kryšarykami». Kali kryšak sabrana šmat ci jość žadańnie pieradać ich asabista, to možna padać zajaŭku i abmierkavać miechaniku z rehijanalnym kaardynataram. Zajaŭki na ŭdzieł prymajucca pa telefonach + 375 29 515 23 22, + 375 25 918 66 83 (Natalla), +375 29 335 32 00 (Maryja) i ŭ aficyjnych hrupach prajekta ŭ sacyjalnych sietkach «UKantakcie», Instagram, «Adnakłaśniki». Kryški možna źbirać na karyść prajekta ŭ lubym horadzie krainy, navat kali jon nie akažacca na maršrucie hruzavika.
