Sotni čałaviek vyjšli pratestavać u centr horada ŭviečary 9 žniŭnia. Niedaloka ad vykankama ich sustreła milicyja, piša Intex-Press.
Praktyčna adrazu paśla zakryćcia vybarčych učastkaŭ supracoŭniki MUS u kaskach i achoŭnych kaściumach pierakryli centr Baranavič i stali vyciaśniać ludziej z płoščy. Mašyny sihnalili ŭ znak pratestu. Haradžanie paviedamlali Intex-press pra zatrymańni la Viečnaha ahniu. Da prysutnych tam ludziam padjechaŭ aŭtazak, niekalki čałaviek byli zatrymanyja, astatnija raźbiehlisia za HDK.
Prykładna a 21.30 supracoŭniki MUS padyšli da skryžavańnia Lenina i Bresckaj. Vulica Lenina była pierakrytaja — prapuskali tolki haradskija aŭtobusy. Pa słovach adnaho z aktyvistaŭ, na vulicy stajali prykładna dziesiać siłavikoŭ i nie prapuskali kala sta čałaviek u centr. Lichtary ŭ centry horada byli vyklučanyja. Pa słovach vidavočcy, na jaho vačach zatrymali mužčynu, jaki išoŭ razam z žonkaj i maleńkim dziciem. Jaho žonka prasiła milicyju adpuścić muža, havaryła, što jany prosta vyjšli pahulać. Ale mužčynu adviali ŭ padjechaŭ aŭtazak.
U hety ž čas vialikaja kolkaść supracoŭnikaŭ MUS u kaskach, broniekamizelkach i achoŭnych kaściumach raźmiaścilisia la harvykankama. Krychu paźniej sotni ludziej sa ściahami sabralisia kala drukarni. Pa słovach vidavočcaŭ, niečakana ŭ natoŭp palacieli śvietłašumavyja hranaty z boku siłavikoŭ. Adnak heta tolki razzłavała prysutnych. Pačalisia sutyknieńni. U centry horada byli čutnyja hučnyja vybuchi ad hranat, stajaŭ dym ad ślozatačyvaha hazu. Paśla vybuchu adnoj z hranat chłopiec straciŭ prytomnaść. Jaho zabrała chutkaja dapamoha.
Supracoŭniki MUS adciskali ludziej da vulicy Haharyna, ale potym adstupali. Tak praciahvałasia šmat razoŭ. U niejki momant suprać pratestoŭcaŭ byŭ vykarystany vadamiot. Adnak ludzi nie razychodzilisia. Praź niekatory čas vadamiot čamuści źjechaŭ. Kolkaść pratestoŭcaŭ praciahvała raści. Ludzi kryčali «Sychodź», «Hańba».
Paśla paŭnočy supracoŭniki MUS stali stralać humavymi kulami pa mitynhoŭcaŭ. Da hadziny nočy, pa słovach vidavočcaŭ, jak minimum šaści pratestoŭcam spatrebiłasia miedycynskaja dapamoha. Adnamu z chłopcaŭ kula raźbiła hubu.
Prykładna ŭ 2.10 da siłavikoŭ prybyło padmacavańnie i z dapamohaj śvietłašumavych hranataŭ, hazu i abstrełu humavymi kulami pratestujučych vycisnuli ad kramy «Padarunki» i raśsiejali.
Z-za pratestaŭ i šumu ad vybuchaŭ hranat haradskaja vybarčaja kamisija spyniła padlik hałasoŭ, paprasiła žurnalistaŭ Intex-press syści i paviedamiła, što źbiarecca ranicaj 10 žniŭnia, kab praciahnuć svaju pracu.
Bondarava abrynułasia na muziej Janki Kupały i mastaka Sušu23
Kamientary