Bloomberg: Kreml nie zacikaŭleny ŭ tym, kab padtrymlivać režym Łukašenki siłavymi mietadami, ličyć jaho «taksičnym»
Choć aficyjna Kreml praciahvaje padtrymlivać Alaksandra Łukašenku, u asiarodździ Uładzimira Pucina pačali analizavać mahčymyja nastupstvy źmieny lidara ŭ Biełarusi, pieradaje Bloomberg. Jaho cytuje RBK.
Krynicy, blizkija da asiarodka prezidenta Rasii, paviedamili ahienctvu, što ŭ Kramli nie zacikaŭlenyja ŭ tym, kab padtrymlivać režym Łukašenki siłavymi mietadami, u tym liku pramym uvodam vojskaŭ. Pa słovach surazmoŭcaŭ Bloomberg, u Kramli miarkujuć, što heta moža nastroić suprać Rasii šarahovych biełarusaŭ i pahražaje kanfliktam, jaki apyniecca bolš surjoznym, čym va Ukrainie.
Adnak i sproby biełaruskaj apazicyi — pa prykładzie Ukrainy - «šturchnuć krainu» ŭ bok ES dla Pucina buduć nieprymalnyja, zajaviŭ Bloomberg adzin ź blizkich da asiarodku rasijskaha lidara. Inšy surazmoŭca ahienctva patłumačyŭ, što, choć u Kramli niama ŭpeŭnienaści ŭ tym, što krach režymu Łukašenki budzie tak užo drenny dla Rasii, pra lidaraŭ pratestu tam pakul viadoma zanadta mała.
Prezident fondu «Pieciarburhskaja palityka» Michaił Vinahradaŭ adznačyŭ u razmovie z Bloomberg, što rasijskija ŭłady zdoleli naładzić dobryja adnosiny z palitykami, jakija skinuli ŭ 2018 hodzie prakramloŭskaha lidara Armienii. «Zachoŭvać status-kvo ŭ adnosinach ź Biełaruśsiu možna i biez Łukašenki», — skazaŭ Vinahradaŭ.
U Kramli nie vyklučajuć taho, što dla Rasii budzie bolš vyhadnym dasiahnuć pahadnieńnia z apazicyjaj u Biełarusi, čym, ryzykujučy sacyjalnym vybucham u hetaj krainie, umiešvacca ŭ jaje spravy dziela padtrymki režymu, jaki, mahčyma, sam užo nie ŭtrymajecca, paviedamili Bloomberg dźvie krynicy, jakija majuć dostup da bližejšaha atačeńnia Pucina.
Ułady Rasii nie buduć imknucca paskoryć padzieńnie režymu Łukašenki, ale i mała zacikaŭleny ŭ jaho padtrymcy, zajaviŭ ahienctvu čynoŭnik, znajomy z chodam palityčnych dyskusij u Kramli.
Jašče adzin surazmoŭca ahienctva dadaŭ, što Łukašenka — navat kali jon zdoleje ŭtrymacca va ŭładzie — užo nie budzie karystacca davieram u Maskvie, dzie jaho ciapier ličać «taksičnym».
Kamientary