«Sierp i mołat» ciapier i ŭ internecie

Homielščyna zajmieła pieršy ŭ krainie partał rehijanalnych ŚMI. Jak dekłarujuć jaho stvaralniki, tut jość miesca nia tolki dziaržaŭnaj presie.

Homielščyna pieršaja ŭ krainie zajmieła partał rehijanalnych ŚMI. Voś jak navinku prezientujuć jahonyja stvaralniki: «Homielskaja vobłaść — adzin z kulturna raźvitych rehijonaŭ Biełarusi, dzie dziejničaje 71 redakcyja drukavanych vydańniaŭ i 36 arhanizacyjaŭ telebačańnia i radyjoviaščańnia. Pa nasyčanaści drukavanaj pradukcyjaj na čałavieka vobłaść źjaŭlajecca adnym ź lideraŭ u respublicy. Dadzieny Internet-partał — heta čarhovy krok u pašyreńni infarmacyjnaj prastory jak Homielskaj vobłaści, tak i Respubliki Biełaruś u cełym».

Što ž saboj ujaŭlaje partał, čyje stvaralniki, akramia ŭsiaho dekłaravali, što na im znojdziecca miesca nia tolki dla dziaržpresy. Jon infarmuje pra zarehistravanyja ŭ vobłaści drukavanyja vydańni, radyjostancyi i telekanały, karpunkty rehijanalnych i ahulnarespublikanskich ŚMI (ź niedziaržaŭnych tut pradstaŭlenyja ahienctva BiełaPAN i «Komsomolskaja pravda v Biełarusi»), raździeł, pryśviečany aficyjnamu Biełaruskamu sajuzu žurnalistaŭ (infarmacyja pra BAŽ adsutničaje), a taksama raździeły «Anonsy», «Naviny», «Narmatyŭnyja akty», «Pres-słužby» (kantakty abłvykankamu, DAI, MUS i h.d.) i «Konkursy».

Cikavaść vyklikaje raździeł «Haziety i časopisy». Niedziaržaŭnyja vydańni ŭ hetym śpisie jość, ale hramadska-palityčnych haziet tut naŭrad ci nie znojdzieš — naprykład «Śvietłohorskij biźnies» drukuje vyklučna pryvatnyja abviestki i rekłamu, a mazyrskaja hazieta «Poleśje svoimi hłazami» piša pieravažna na pobytavuju tematyku. Nie kažučy ŭžo pra haziety teleprahramaŭ i skanvordaŭ.

Spasyłki na sajty bolšaści z pradstaŭlenych u śpisie vydańniaŭ, najpierš rajonnych haziet, dajuć cudoŭnuju mahčymaść čytačam ź inšych rehijonaŭ nie ŭstajučy z-za kamputara daviedacca pra što tyja haziety pišuć, jakoj movaj drukujucca. Niekalki faktaŭ.

Z bolš čym dvuch dziesiatkaŭ rajonnych haziet, uklučna z hazietami rajonaŭ Homiela, tolki niekalki vydańniaŭ prytrymlivajucca moŭnaha parytetu — na dźviuch dziaržaŭnych movach vykładzienyja materyjały na sajtach «Pietrykaŭskich navinaŭ», «Dobrušskaha kraju», brahinskaha «Majaka Paleśsia», chojnickaha «Leninskaha ściahu».

Mnohija z rajonak u 1991-1992 hh źmianili nazvy, ale nie ŭsie — jość jašče na Homielščynie svoj «Sierp i mołat». Što praŭda, čytajučy rajonki, i nia tolki Homielskija, ciažka pazbavicca ŭražańnia, źmiest ich pieravažna zastaŭsia raniejšym, nia hledziačy na źmienu nazvaŭ.

Sajty rajonnych haziet, raspracavanyja BIEŁTA, naturalna, padobnyja miž saboj dyzajnam i rubrykami, navat apytańni na mnohich ź ich adnolkavyja. Niekatoryja rubryki pakul nie napoŭnienyja źmiestam. Tak, na sajtach tych ža «Piertykaŭskich navinaŭ», ci «Śvietłaha žyćcia» ŭ rubrycy «Afiša» adsutničaje infarmacyja ŭ raździełach «Cyrk», «Teatr» dy «Vystavy».

Nie ŭsie drukavanyja ŚMI rehijonu majuć sajty. A niekatoryja ź ich pad vyhladam svajoj staronki prapanavali spasyłku na sajt ułaśnika — tak, za spasyłkaj na hazietu «Informobzor» nasamreč chavajecca sajt vydaviectva «Tiechničieskaja kniha», dzie ŭłasna haziecie adviedziena miesca ŭ katałohu pradukcyi, a spasyłki na hazietu «Nieftianik» i časopis «Nieftianik Poleśja» viaduć na aficyjnuju staronku RUP «Biełarusnafta».

Vopyt Homielskaj vobłaści cikavy najpierš tym, što ŭpieršyniu ŭ Biełarusi partał miascovych ŚMI byŭ stvorany centralizavana. Dahetul rajonnyja vydańni ŭ redkich vypadkach zavodzili ŭ siecivie ŭłasnyja sajty. Cikavy prykład dziatłaŭskaj «Pieramohi», jakoj miascovy niezaležny sajt dzyatlava.by z ułasnaj inicyjatyvy vyłučyŭ asobnuju staronku.

• 0
• 0
• 0
• 0
• 0
• 0
• 0
• 0