Jak BT źviazała PandaDoc z «finansavańniem žanočych maršaŭ»

U efiry Biełteleradyjokampanii pakazali videa dopytaŭ fihurantaŭ pa «spravie PandaDoc». U siužecie taksama havorycca, što Centr pa abaronie pravoŭ žančyn, jaki ŭznačalvała žonka top-mieniedžara IT-kampanii, vykarystoŭvali dla finansavańnia žanočych maršaŭ, piša TUT.BY.

Pavialičyć

U siužecie zajaŭlajecca, što ŭ 2018 hodzie Dziarždep ZŠA sprabavaŭ pieravieści na rachunak Centra abarony pravoŭ žančyn, zarehistravany ŭ Minsku, amal 19 tysiač dalaraŭ. Ale hety tranš zabłakavaŭ Departamient pa humanitarnaj dziejnaści Biełarusi USP. Tady ŭ listapadzie 2019 hoda da dyrektara TAA «Pandadok» Dźmitryja Rabceviča źviarnuŭsia dyrektar pa finansach amierykanskaha ofisa Bibiek Bchatary i paprasiŭ akazać finansavuju dapamohu tamu ž «centru pa prasoŭvańni pravoŭ žančyn», spasłaŭšysia na toje, što ich kampanija raniej užo pieraličvała dabračynnyja achviaravańni hetaj arhanizacyi. Pieršy tranš ažyćciavili ŭ mai hetaha hoda, havorycca ŭ siužecie BT.

Zasnavalnikam Centra nazyvajecca Alaksandra Dzikan. Jana žonka adnaho sa strukturnych kiraŭnikoŭ PandaDoc Viktara Kuŭšynava, jaki zatrymany razam ź jašče tryma top-mieniedžarami kampanii. Dzikan nazyvajecca aktyŭnaj prychilnicaj ruchu «žanočaja siła», jakaja padtrymlivaje pratesty ŭ Biełarusi.

TUT.BY nieviadoma, ab jakich mienavita tranšach kaža dyrektar IT-kampanii i ci źviazany jany z «finansavańniem pratestaŭ».

Pavodle infarmacyi TUT.BY, Dzikan adyšła ad spraŭ Centra pa abaronie pravoŭ žančyn, jana pracuje ŭ inšaj IT-kampanii. Dyrektarka Centra Taćciana Stryžeŭskaja niadaŭna źjechała ź Biełarusi.

Advakat PandaDoc Anton Hašynski tak kamientuje siužet BT: «Kampanija PandaDoc zajmajecca dabračynnaściu i padtrymkaj roznych supolnaściaŭ: kovid, adukacyja i hetak dalej. U tym liku i hetaha niedziaržaŭnaha fondu. Upeŭnienyja, što dapamoha kampanii była vykarystana pa pryznačeńni ŭ adpaviednaści sa statutnymi metami fondu».

Nahadajem, u pačatku vieraśnia čatyry supracoŭniki PandaDoc — hałoŭny buchhałtar Julija Šardyka, dyrektar Dźmitryj Rabcevič, mieniedžar pa praduktu Viktar Kuŭšynaŭ i HR Uładzisłaŭ Michałap — byli aryštavanyja na dva miesiacy pa padazreńni ŭ kradziažy ŭ asabliva bujnym pamiery (107 tysiač biełaruskich rubloŭ) ź biudžetu. 11 vieraśnia ŭsim čaćviarym było pradjaŭlenaje abvinavačvańnie, jak paviedamiŭ advakat kampanii PandaDoc Anton Hašynski, u machlarstvie, ździejśnienym arhanizavanaj hrupaj albo ŭ asabliva bujnym pamiery (č.4 artykuła 209, choć raniej havorka išła ab č.4 art. 210). Supracoŭniki kampanii zajavili pra svaju nievinavataść i kateharyčna adchilili pradjaŭlenaje abvinavačvańnie.

U PandaDoc upeŭnienyja, što represii pravodziacca, kab akazać cisk i spynić inicyjatyvu jaje zasnavalnikaŭ. Suzasnavalnik PandaDoc Mikita Mikada raniej adkryta vykazvaŭsia pra padziei, jakija adbyvajucca ŭ krainie: u pryvatnaści, prapanoŭvaŭ varyjanty dapamohi, u tym liku materyjalnaj, siłavikam, jakija chočuć zvolnicca z pravaachoŭnych orhanaŭ.

• 0
• 0
• 0
• 0
• 0
• 0
• 0
• 0