37 krain ABSIE zaklikali łukašenkaŭcaŭ da dyjałohu pa ŭrehulavańni kryzisu. Rasii ŭ śpisie niama
Minsku varta padtrymać sproby ABSIE spryjać nacyjanalnamu dyjałohu z ulikam parušeńniaŭ pravoŭ čałavieka paśla prezidenckich vybaraŭ u Biełarusi. Pra heta havorycca ŭ sumiesnaj zajavie ad imia 37 dziaržaŭ-udzielnic ABSIE, jakoje na pasiadžeńni Rady ministraŭ zamiežnych spraŭ (RMZS) hetaj struktury ŭ piatnicu začytała pastajanny pradstaŭnik Finlandyi pry hetaj mižnarodnaj arhanizacyi Piajvi Łajvała de Raźjera. Rasii ŭ śpisie padpisantaŭ zajavy niama, adznačaje TASS.
«My hatovyja padtrymać i spryjać inkluziŭnamu nacyjanalnamu dyjałohu z metaj ustojlivaha ŭrehulavańnia ciapierašniaha kryzisu, zabiaśpiečyŭšy suvierenitet i niezaležnaść Biełarusi, a taksama jaje biaśpiečnuju, demakratyčnuju i kvitniejučuju budučyniu», — havorycca ŭ zajavie, jakuju pašyryła pradstaŭnictva Finlandyi pry ABSIE.
«Za apošnija niekalki miesiacaŭ my stali śviedkami surjoznych parušeńniaŭ pravoŭ čałavieka i asnoŭnych svabod u Biełarusi paśla sfalsifikavanych prezidenckich vybaraŭ 9 žniŭnia 2020 hoda. Spravazdača dakładčyka Maskoŭskaha miechanizmu [ABSIE], prafiesara Volfhanha Bieniedeka, dała nam vialikuju kolkaść dokazaŭ ab mirnych demanstrantach, jakija padvierhlisia žorstkim napadam i katavańniam z boku ŭładaŭ prosta za toje, što jany nastojvali na praviadzieńni svabodnych i spraviadlivych vybaraŭ, na lepšaj demakratyčnaj budučyni dla svajoj krainy», — adznačajecca ŭ dakumiencie.
37 dziaržaŭ ABSIE taksama paviedamili ab tym, što, «zhodna z vartymi davieru paviedamleńniami, paśla prezidenckich vybaraŭ kolkaść aryštaŭ mirnych demanstrantaŭ, žurnalistaŭ i pravaabaroncaŭ aceńvajecca ŭ 30 000». «Kolkaść palityčna matyvavanych kryminalnych spraŭ nabližajecca da 900. Śpis palitviaźniaŭ praciahvaje raści i naličvaje bolš za 100 proźviščaŭ. Niama nijakich ukazańniaŭ na toje, što ŭłady rasśledujuć tysiačy zadakumientavanych paviedamleńniaŭ ab žorstkaściach i katavańniach z boku palicyi, zafiksavanych ź siaredziny žniŭnia, abo ab zabojstvach pratestoŭcaŭ. My asudžajem prymianieńnie siły suprać biełarusaŭ, jakija vykarystoŭvajuć svaje pravy čałavieka i asnoŭnyja svabody», — skazana ŭ sumiesnaj zajavie.
Ciapier čytajuć
Dziaržaŭnyja sacyjołahi: Biełarusy najpierš źviazvajuć svaju dziaržaŭnaść ź Vialikim Kniastvam Litoŭskim7
Kamientary