Administratar telehram-kanała «Biełaruś hałaŭnoha mozhu» i fryłansier-kansultant biełaruskaj słužby «Radyjo Svaboda» Ihar Łosik znachodzicca za kratami 193 dni. Jaho haładoŭka praciahvajecca ŭžo 21 dzień. Takim čynam Ihar pratestuje suprać novych abvinavačvańniaŭ u padrychtoŭcy da ŭdziełu ŭ masavych biesparadkach, paviedamlaje «Radyjo Svaboda».
4 studzienia Ihara ŭ SIZA Žodzina naviedaŭ advakat Dźmitryj Lepretar.
«Ihar pačuvajecca zdavalniajuča. Na surjoznyja prablemy sa zdaroŭjem pakul nie skardzicca. Kaža, što spyniać haładoŭku pakul nie maje namieru. Takim čynam jon vykazvaje svaju niazhodu z tym, što adbyvajecca. Jamu rabili miedycynski ahlad, jašče pierad Novym hodam. Uziali kroŭ na analizy. Pieryjadyčna jamu mierajuć cisk i tempieraturu. Sprabujuć sačyć za jaho zdaroŭjem, stanam».
Ihar Łosik taksama pieradaŭ z-za krataŭ nievialikaje paviedamleńnie. 4 studzienia spaŭniajecca dva hady jaho dačce Paŭlinie.
«Siońnia Dzień naradžeńnia majoj dački, — piša Ihar. — Joj spoŭniłasia dva hadki. Ale jana budzie śviatkavać jaho biez taty. Na žal, abjaŭleńnie «Hodu adzinstva» nijak nie paŭpłyvała na raźjadnańnie našaj siamji.
Pieršyja słovy, pieršyja malunki… Kolki ŭsiaho ja ŭžo prapuściŭ! I kolki jašče mahu prapuścić, kali ŭ hety čas ministry prostym tekstam na naradzie pryznajucca ŭ fabrykacyi kryminalnych spraŭ. Ale mienavita luboŭ da dački daje mnie zaraz siły trymacca. Dyj doktar u turmie zapeŭnivaje, što haładańnie navat karysna. Značyć, budziem praciahvać».
