«Jaho dziaŭčynaj była niejkaja ŭpłyvovaja łukašenkaŭka». Ihar Tur raniej rekłamavaŭ «Honar», a ciapier staŭ prapahandystam
Na hetym tydni na ANT pačaŭsia prapahandyscki sieryjał «Chłuśnia źbiehłych». Viadzie jaho karespandent Ihar Tur. Usia infarmacyja ŭ jaho «rasśledavańni» — prasłuchoŭvańnie telefonnych razmoŭ aktyvistaŭ i ŭzłamanyja akaŭnty ŭ sacyjalnych sietkach.
«Naša Niva» raskazvaje pra asobu karespandenta z puła Łukašenki, jaki za svaju pracu atrymaŭ miedal Francyska Skaryny.
Vučyŭsia ŭ sielskaj škole, maryŭ stać futbalistam
Ihar Tur rodam z Hrodna, ale dziacinstva pravioŭ u pasiołku Pieršamajski, heta kala 10 kiłamietraŭ ad Lidy. Baćka — inžynier u Lidskich elektryčnych sietkach, maci — dyrektarka haradskoha Pałaca kultury.
«Ja zajmaŭsia ŭ Lidskaj DIUSŠ pa futbole i maryŭ stać futbalistam. Ale svoječasova zrazumieŭ, što zorak ź nieba ŭ sporcie chapać nie budu, i tady zadumaŭsia: kim być? Było pryniata rašeńnie, što ja budu spartovym žurnalistam. I pieršyja hady ŭ ciapierašniaj prafiesii sapraŭdy pravioŭ u adździele sportu», — raspaviadaŭ jon «Lidskaj haziecie».
Tur pastupiŭ na fakultet žurnalistyki BDU na śpiecyjalnaść «drukavanyja ŚMI».
«Vielmi kampaniejski chłopiec. Jon nie byŭ skvapny. Vučyŭsia narmalna, nikoli nie traplaŭ u drennyja situacyi. Nie pamiataju, kab jon niehatyŭna vykazvaŭsia nakont apazicyi ci Łukašenku adkryta padtrymlivaŭ. Jaho pieraŭvasableńnie było vielmi niečakanym. Jość studenty, pa jakich vidać, što jany addanyja brsmaŭcy, a za im ja takoha nie zaŭvažaŭ», — dzielicca adnakurśnik.
Tur udzielničaŭ u konkursie «Mistar žurfak» — u pryncypie, mužčynskija konkursy pryhažości vabili jaho ź dziacinstva, jašče ź letnich łahieraŭ.
«U Ihara dobraje pačućcio humaru, jakoje zaŭsiody da miesca było. Taki ekstraviert, jaki lubiŭ być u centry ŭvahi», — tłumačyć univiersiteckaja znajomaja.
Tur siabravaŭ z nacyjanalna-aryjentavanymi adnakurśnikami, zdymaŭsia u rekłamie adzieńnia ŭ nacyjanalnym styli Honar.
Na palityčnyja pohlady paŭpłyvała dziaŭčyna?
Padčas vučoby Ihar supracoŭničaŭ ź Pieršym nacyjanalnym kanałam Biełaruskaha radyjo. Paśla było radyjo «Bi-Ej», budaŭničy partał Stroyka.by.
Na ANT Tur pryjšoŭ u 2014 hodzie. Apošnim časam Ihar pracuje ŭ prezidenckim pule.
Jak svoj chłopiec staŭ prapahandystam? Dla jaho byłych pryjacielaŭ heta zahadka.
«Dumaju, što jon prosta vielmi chacieŭ słavy, a chłopcu z pravincyi treba ci šmat pracavać, ci pajści pa bolš prostym dy intensiŭnym šlachu dasiahnieńnia hetaj mety. Voś u niejki momant jon i vybraŭ hetuju ściežku. U jaho ŭ toj čas jašče źjaviłasia niejkaja ŭpłyvovaja dziaŭčyna z prałukašenkaŭskimi pohladami, dumaju, jana dapamahła jamu zrabić vybar», — miarkuje adzin sa znajomych.
Kali pačalisia hetyja adnosiny, kantakt sa starymi siabrami źnik.
Byłyja kalehi z telebačańnia ŭspaminajuć, što kali Tur pačaŭ pracavać u pule, jon staŭ bolš zakrytym.
«Jon ličyć, što puł — dobraja praca, hanarycca hetym. Bo ty prysutničaješ na hałoŭnych padziejach, bačyš usio na ŭłasnyja vočy».
Tur rychtavaŭ taksama siužety pra siłavikoŭ. Naprykład, pra śpiecpadraździaleńnie «Strała», słužbu biaśpieki prezidenta, akademiju MUS.
Cikava, što siarod hałoŭnych jakaściaŭ svajho charaktaru karespandent nazyvaje abvostranaje pačućcio spraviadlivaści.
Televizijnaja słava
Paznavalnym tvaram prapahandy Tur staŭ u hetu vybarčuju kampaniju. Niechta z raniejšych viadučych zvolniŭsia, niechta dalnabačna adyšoŭ u bok — i jon zabraŭsia na vyzvalenaje miesca.
Hod tamu na ANT zapuskali prajekt «Tur pa Biełarusi» — za pajezdkami Ihara pa krainie. Ale palityčnyja batalii adsunuli hetu ideju na druhi płan.
Ciapier hałoŭny jaho zaniatak — rubryka «Budzie dapoŭniena» z manałohami pra apazicyju. Žest abjadnanaha štaba Tur tłumačyŭ jak «kachać, bić, rezać», pratesty ŭ Minsku nazyvaŭ «revalucyjaj repostaŭ».
Aproč taho, Tur praciahvaje supravadžać Alaksandra Łukašenku. Jamu pryjemna, što kiraŭnik krainy paznaje jaho ŭ tvar — padčas pajezdki na Niaśvižski zavod dziciačaha charčavańnia Łukašenka asabista zaprasiŭ karespandenta da stała dehustacyi. Toj zasaromieŭsia, ale dałučyŭsia da abiedu.
-
Šlacham Cichanoŭskaha: redaktarka rajonki i łukašenkaŭski błohier tak zachapilisia prablemami Barysava, što pryjšli da kramolnych vysnovaŭ
-
Dzie ciapier Kirył Kazakoŭ — były kiraŭnik STB, «chrosny baćka» Azaronka i inšych prapahandystaŭ?
-
Biełaruskamoŭny dziciačy časopis «Matulina soniejka» prypyniŭ svoj vychad
Restaŭracyi ŭ Biełarusi zastałosia na try dni. Hałoŭnamu pradpryjemstvu krainy faktyčna padpisali śmiarotny prysud2
Kamientary