Były viadučy Fox News uznačaliŭ Pientahon. Sienat ź ciažkaściu zaćvierdziŭ jaho kandydaturu

Jon źjaŭlajecca ŭdzielnikam bajavych dziejańniaŭ, byłym televiadučym i addanym prychilnikam Donalda Trampa, piša Bi-bi-si.

Pasiadžeńnie było dramatyčnym. Hałasy padzialilisia paroŭnu: 50 na 50. Svaim kanstytucyjnym pravam pryjšłosia skarystacca vice-prezidentu ZŠA Džejmsu Devidu Vensu. Jon prybyŭ u Kapitolij i dadaŭ kandydatu Trampa nieabchodny hołas.

Były viadučy Fox News i vieteran armii, jaki słužyŭ u Afhanistanie i Iraku, 44-hadovy Chiehset abiacaje ŭnieści surjoznyja źmieny ŭ pracu Pientahona.

Adnak jaho kiraŭnictva budzie znachodzicca pad pilnaj uvahaj, padkreślivaje Reuters, adznačajučy žorstkaje supraciŭleńnie demakrataŭ i navat niekatorych respublikancaŭ hetaj sprečnaj kandydatury. U ich jość sumnievy jak nakont jahonaj kvalifikacyi, tak i jahonaha charaktaru.

«U nas raniej nie było takoha ministra abarony, jak Chiehsiet», — zajaviŭ Reuters Džeremi Sury, prafiesar historyi i ekśpiert pa prezidenckaj palitycy Techaskaha ŭniviersiteta ŭ Ościnie.

Pasada kiraŭnika Pientahona histaryčna dastavałasia kandydatam ź vialikim dośviedam kiravańnia bujnymi arhanizacyjami, jakija karystajucca šyrokaj dvuchpartyjnaj padtrymkaj. U hety raz kandydatu spatrebiłasia dadatkovaja pieravaha ŭ hałasach dla zaćviardžeńnia.

Try sienatary-respublikancy hałasavali suprać Chiehseta, u tym liku Mitč Mak-koneł. Pavodle jaho słoŭ, Chiehsiet nie zmoh prademanstravać, što zdolny efiektyŭna kiravać takoj vialikaj i składanaj arhanizacyjaj, jak Pientahon.

«Prostaha žadańnia być «ahientam pieramien» niedastatkova, kab zaniać hetuju pasadu», — skazaŭ Mak-koneł.

Biudžet Pientahona składaje 1 tryljon dalaraŭ. Chiehset paviedamiŭ zakanadaŭcam, što samaja vialikaja hrupa, jakoj jon kiravaŭ, naličvała 100 čałaviek, a samy vialiki biudžet skłaŭ 16 miljonaŭ dołaraŭ.

Akramia taho, što Chiehset biezvynikova bałatavaŭsia na pasadu sienatara ad Respublikanskaj partyi ŭ Miniesocie, u jaho abmiežavany palityčny dośvied.

Jaho vyłučeńnie taksama było azmročana sieryjaj abvinavačańniaŭ, u tym liku z boku byłoj niaviestki, jakaja śćviardžała, što jon ździekavaŭsia sa svajoj druhoj žonki nastolki, što jana chavałasia ŭ šafie i mieła kodavyja słovy dla siabroŭ, kali patrabavałasia dapamoha. Chiehset kateharyčna admaŭlaje hetyja abvinavačańni, i jaho žonka taksama admaŭlała lubyja fakty fizičnaha hvałtu.

Chiehset — major zapasu, jaki ŭdzielničaŭ u apieracyjach ZŠA ŭ Iraku i Afhanistanie, a taksama słužyŭ na bazie Huantanama. Paźniej jon uznačalvaŭ arhanizacyju pa abaronie pravoŭ vieteranaŭ. Jon nikoli nie pracavaŭ u dziaržaŭnych strukturach.

Vystupajučy na kanale Fox News, Chiehset časta krytykavaŭ sajuźnikaŭ pa NATO, zajaŭlajučy, što Kitaj stvaraje armiju, «śpiecyjalna pryznačanuju dla pieramohi nad ZŠA».

• 1
• 0
• 2
• 12
• 0
• 0
• 2
• 0