«Apranuŭsia ŭ adzieńnie, padobnaje da adzieńnia Cichanoŭskaha». Sudziać Furmanava, Knihu i Raźničenku, zatrymanych paśla pravakacyi ŭ Hrodnie suprać Cichanoŭskaha
29 maja ŭ Hrodnie padčas praviadzieńnia pikietu pa zbory podpisaŭ hramadzian u padtrymku vyłučeńnia ŭ jakaści kandydata ŭ prezidenty Śviatłany Cichanoŭskaj supracoŭnikami milicyi byŭ zatrymany kiraŭnik inicyjatyŭnaj hrupy, błohier papularnaha YouTube-kanała «Kraina dla žyćcia» Siarhiej Cichanoŭski, a taksama niekalki čałaviek ź jaho kamandy. Siońnia pačaŭsia praces pa spravie pieršych troch fihurantaŭ: Dźmitryja Furmanava, Uładzimira Knihi, Jaŭhiena Raźničenki.
Ich abvinavačvajuć va ŭdziele ŭ dziejańniach, jakija hruba parušajuć hramadski paradak, Knihu i Raźničenku — taksama ŭ hvałcie ŭ dačynieńni da supracoŭnikaŭ milicyi, pa spravie prachodziać čatyry paciarpiełyja.
Razhlad spravy ŭ sudzie Kastryčnickaha rajona Hrodna pačaŭsia sa spaźnieńnia. Dla pracesu vydzielili nievialikuju zału, dzie znachodziacca try nievialikija łaŭki dla słuchačoŭ. Na praces papiarednie paklikali studentaŭ pryvatnaha jurydyčnaha kaledža, jakija zaniali dźvie łaŭki. Ale paśla pierapynku na zapusk abvinavačanych volnyja miescy zmahli zaniać rodnyja abvinavačanych, ich siabry i presa.
Dźmitryj Furmanaŭ byŭ zatrymany 29 traŭnia padčas pikietu pa zbory podpisaŭ za vyłučeńnie ŭ kandydaty Śviatłany Cichanoŭskaj. Kali adbyŭsia incydent ź milicyjantam, paśla jakoha pačalisia zatrymańni ludziej z natoŭpu, Źmicier siadzieŭ za stałom i praciahvaŭ źbirać podpisy. Zatym da jaho prybiehli amapaŭcy, schapili pad ruki i paciahnuli praz skvier u mašynu na vačach u jaho baćkoŭ, jakija taksama byli na pikiecie.
Dźmitryju Furmanavu vystavili abvinavačvańnie pa č. 1 art. 342 KK RB (Arhanizacyja ci aktyŭny ŭdzieł u hrupavych dziejańniach, jakija hruba parušajuć hramadski paradak). Pravaabarončaja supolnaść Biełarusi pryznała jaho palityčnym źniavolenym, a mižnarodnaja pravaabarončaja arhanizacyja Amnesty International — viaźniem sumleńnia.
Svajaki palitviaźnia Dźmitryja Furmanava — maci Volha Furmanava i jaho dziaŭčyna Volha Karakina — abviaścili biesterminovuju haładoŭku kala budynka SIZA №1, što na vulicy Vaładarskaha ŭ Miensku.
Jaŭhien Raźničenka — siabra inicyjatyŭnaj hrupy Śviatłany Cichanoŭskaj, jaki byŭ zatrymany paśla pikietu pa zbory podpisaŭ, jaki prachodziŭ u Hrodnie 29 maja. U toj dzień jon prysutničaŭ u centry horada i ŭ momant zatrymańnia Siarhieja Cichanoŭskaha «pakłaŭ» na ziamlu adnaho z dvuch milicyjantaŭ. Hety momant trapiŭ na videa.
Paśla pikietu Raźničenka zapisaŭ kamientar, u jakim patłumačyŭ, što padchapiŭ milicyjanta ŭ toj momant, kali Cichanoŭskaha staŭ adciskać natoŭp, takim čynam źmiakčyŭšy padzieńnie. «Nijakaj bojki — ni z majho boku, ni z druhoha — tam nie było», — kazaŭ Raźničenka. U kamientary jon taksama vykazaŭ zdahadku, što ŭ suviazi z hetym mohuć zavieści kryminalnuju spravu. «Tamu, kali ja pierastanu vychodzić na suviaź, chłopcy, razumiejcie, što heta prosta pravakacyja z boku śpiecsłužbaŭ. Tamu maksimalna budu staracca być na suviazi, ale kali ja na suviaź nie vychodžu — pačynajcie bić tryvohu», — skazaŭ aktyvist. Paśla hetaha, u noč z 29 na 30 traŭnia, suviaź ź im źnikła, a paźniej stała viadoma, što jaho taksama zatrymali.
Raźničenka da viasny 2020 hoda pracavaŭ u Maskvie, adnak u kancy sakavika pryjechaŭ u Biełaruś na pachavańnie baćki. Z-za zakrytaj padčas epidemii karanavirusa miažy jon nie zmoh viarnucca ŭ Rasiju i pačaŭ šukać pracu ŭ rodnym horadzie, uładkavaŭsia zvarščykam i staŭ cikavicca palitykaj.
39-hadovaha haradzienca Uładzimiera Knihu zatrymali 4 červienia. U dačynieńni da Knihi taksama skłali administracyjny pratakoł za drobnaje chulihanstva. Zhodna z materyjałami spravy, Kniha 29 maja na pikiecie ŭ Hrodnie parušaŭ hramadski paradak, niecenzurna łajaŭsia, čaplaŭsia da minakoŭ, pieraškadžaŭ prajezdu aŭtatranspartu. Kniha tady svaju vinu nie pryznaŭ całkam. Jon zajaviŭ, što pryjšoŭ na płošču niezadoŭha da bojki, paśla jakoj upaŭ milicyjant, i tolki naziraŭ za padziejami, hramadski paradak nie parušaŭ.
Śviedkam pa spravie vystupiŭ supracoŭnik AMAP Dźmitryj Narbut. Jon śćviardžaŭ, što Kniha šturchaŭ ludziej, u tym liku supracoŭnika milicyi, hučna łajaŭsia matam na adras milicyjantaŭ, pieraškadžaŭ ruchu mikraaŭtobusa z zatrymanymi.
Prakuror začytvaje abvinavačvańnie. Pa viersii śledstva, Siarhiej Cichanoŭski i Dźmitryj Furmanaŭ zahadzia spłanavali niezakonny mitynh pad vyhladam pikieta dla zboru podpisaŭ, skarystaŭšysia farmalnaściu, što dla hetaha nie patrabujecca dazvoł miascovych uładaŭ. Adznačajecca, što infarmacyju pra płany Cichanoŭskaha i jaho paplečnikaŭ raspaŭsiudžvaŭ Statkievič.
Taksama prahučała proźvišča Aranoviča, jaki, pavodle abvinavačvańnia, naŭmysna apranuŭsia ŭ adzieńnie, padobnaje da taho, u jakim byŭ Cichanoŭski, kab zabiaśpiečyć jahonuju abaronu na mierapryjemstvie i ŭ budučyni dapamahčy jamu schavacca. Prakuror padkreślivaje, što mierapryjemstva mieła na mecie abvastreńnie palityčnaj situacyi ŭ krainie, stvareńnie palityčnaj i ideałahičnaj varožaści ŭ hramadstvie.
Toje, što mierapryjemstva zdymałasia na videa i tranślavałasia ŭ internecie, taksama prykmieta złačynstva, pa mierkavańni dziaržabvinavaŭcy, bo takim čynam paplečniki Cichanoŭskaha prapahandavali svaje niezakonnyja dziejańni. U abvinavačvańni adznačana, što Cichanoŭski mieŭ na mecie niepadparadkavańnie padtrabavańniam supracoŭnikam milicyi: učastkovy Kazłoŭski i Kavalenia padyšli da jaho, bo byŭ sihnał ad hramadzian, adnak Siarhiej Cichanoŭski admoviŭsia dać tłumačeńni, a kali jaho pasprabavali zatrymać, Kniha i Raźničenka pačali hetamu pieraškadžać, ciahnuli za adzieńnie amapaŭca, nanieśli im pa niekalki ŭdaraŭ, taksama byli paškodžanyja dźviery śpiectranspartu, abłasnaja milicyja acaniła ŭron amal u 230 rubloŭ.
Kamientary