Cichanoŭski i Piatruchin raspaŭsiudzili novuju łabudu: što palitviazień Papoŭ atrymaŭ 16 hadoŭ turmy z-za publikacyi «NN»

«Ja viedaju vypadki, kali publikacyi «Našaj Nivy» fihuravali ŭ kryminalnych spravach jak dokazy abvinavačvańnia. Na maim sudzie takaja publikacyja vykarystoŭvałasia ŭ spravie Dźmitryja Papova, jakoha ŭ vyniku prysudzili da 16 hadoŭ», — napisaŭ Cichanoŭski ŭ fejsbuku.

A błohier Siarhiej Piatruchin uklučyŭ padčas svajho strymu hałasavoje paviedamleńnie, jakoje jamu adpraviŭ Cichanoŭski.

«Siadziać nievinavatyja ludzi, niedatyčnyja ludzi. Siadziać praź ich artykuły. U adnym jany napisali, što Papoŭ vioŭ sacsietki Cichanoŭskaha. Rasijanin taki. Heta niapraŭda, a čałaviek siadzić. A ŭ druhim, što Cichanoŭski z Rasijaj źviazany. Voś jany znajšli adzinaha rasijanina nie ŭ majoj kamandzie, a znajomy majho videaapieratara. Jon zaraz siadzić, jamu 16 hadoŭ. Heta z-za publikacyi hetaj infapamyjki», — prahučała ŭ strymie.

Hetaja infaśpiekulacyja raźličanaja na ludziej, jakija nie ŭmiejuć huhlić i supastaŭlać fakty. Palitviazień Dźmitryj Papoŭ — małaviadomy, tamu što ŭ Biełaruś jon pryjechaŭ z Rasii niezadoŭha da padziej 2020 hoda. Papoŭ byŭ viadomy ŭdziełam u rasijskich prajektach «Skanier» (pa deananimizacyi siłavikoŭ) i «Mužčynskaja dziaržava». Pra žyćcio Papova ŭ Rasii padrabiazna pisała «Miedyjazona». Kali jon pierajechaŭ u Biełaruś — nieviadoma.

Na sajcie «Naša Niva» Papoŭ zhadvaŭsia čatyry razy, usie čatyry razy heta pieradruki: adno paviedamleńnie «Radyjo Svaboda» i try karotkija infarmacyi pravaabarončaha centra «Viasna». Voś što pisałasia ŭ tych pieradrukach.

4 červienia 2020 hoda pra zatrymańnie Papova paviedamiŭ karespandentu «Radyjo Svaboda» mazyrski fiermier, da jakoha ŭ dom uvarvalisia siłaviki:

«Byli i na bieraściejskich, i na minskich numarach. Akazałasia, jany šukali Dzimu Papova — jon pracavaŭ apierataram u Siarhieja Cichanoŭskaha. Dzima, praŭda, byŭ u nas, ale jon źbieh. … Vypytvali, dzie Dzima Papoŭ. Pieraviarnuli ŭvieś dom moj, zabrali techniku».

«Naša Niva» pierastaviła toj tekst: «Nalacieli 18 milicyjantaŭ, dom dahary nahami!» Mazyrski fiermier raskazaŭ, jak u jaho šukali paplečnika Cichanoŭskaha.

Nastupnaja zhadka Papova na sajcie «Našaj Nivy» — 8 lipienia 2020 hoda. Tady ŭ pierastaŭlenym z «Viasny» pieraliku zatrymanych błohieraŭ i aktyvistaŭ nazyvajecca i rasijanin. Pravaabaroncy pradstavili jaho jak «maderatara sacsietak «Krainy dla žyćcia».

10 lipienia 2020 hoda viasnoŭcy daviedalisia pra toje, što na Papova zaviali kryminalnuju spravu, a 13 lipienia 2020 hoda jon byŭ pryznany palitviaźniem. U hetych navinach jon pa-raniejšamu fihuruje jak «maderatar sacsietak Cichanoŭskaha».

Ci možna pavieryć, što skrynšoty hetych pieradrukaŭ na sajcie «Našaj Nivy» byli asnovaj abvinavačvańnia na sudzie? Nie, heta duraść.

29 lipienia 2020 hoda ŭ efiry ANT pakazali častku pakazańniaŭ, jakija davaŭ Dźmitryj Papoŭ. Pamiaškańnie, u jakim adbyvałasia zdymka, padobnaje da kabinieta dla dopytaŭ SIZA №1 na Vaładarcy. Kamiera (chutčej za ŭsio, schavanaja) ci to ŭstanoŭlenaja na stale, ci to prymacavanaja da formy kahości sa śledčych.

U hetym videa Papoŭ raskazvaje pra supracoŭnictva z kamandaj Cichanoŭskaha. Mahčyma, pakazańni davalisia pad ciskam, ale ŭ lubym vypadku skazanyja im słovy dajšli da suda i lahli ŭ abvinavačvańnie. Navat kali b Papoŭ na pracesie i kazaŭ by advarotnaje.

Tak, u palityčnyja kryminalnyja spravy ŭ jakaści dadatkovych elemientaŭ mohuć padšyvać i materyjały niezaležnych ŚMI. Tam spravy absurdnyja, vysmaktanyja z palca. Ale heta nie značyć, što Papova pasadzili ŭ vyniku publikacyj ŚMI ci pravaabaroncaŭ.

«NN» zaklikaje Siarhieja Cichanoŭskaha spynić raspaŭsiud chłuślivaj infarmacyi.

* * *

Cichanoŭski i Piatruchin čaplajucca da słovaŭ žurnalistaŭ: tam nie toje słova, tam nie taki zahałovak — a sami raspaŭsiudžvajuć poŭnuju łabudu. Raźličvajuć, što nichto nie budzie ŭdumvacca, a im — porcyja ŭvahi. Mahutny ŭdar pa łukašyźmie naniesieny, kazki raskazanyja. I nie prydumali inšaha sposabu pryciahnuć da siabie ŭvahu jak raspačać vajnušku. Ale infaśpiekulacyja siońnia daje tabie paru klikaŭ, ale doŭhaterminova — dyskredytuje. U Piatruchina daŭno nie zastałosia reputacyi, Cichanoŭski hetymi apošnimi krokami źniščaje astatki svajoj. 

* * *

Možam my pamylacca? Byvaje. Možam my ŭžyć niedakładnaje, niekarektnaje słova? Byvaje. U kožnaha toje byvaje. Napišycie nam, papraŭcie, udakładnicie, patłumačcie, kali my niešta nie tak zrazumieli — my vypravim, raźmieścim vaš adkaz, vaša ŭdakładnieńnie. My dajom słova i tym, i tym.

«Naša Niva» maje ćviordyja pryncypy. Kali vy siadzieli, my vas baranili. Ale kali vy na svabodzie, a tym bolš prajšoŭ hod, i vy palityk — za dziejnaściu palitykaŭ luboha koleru my sačyli i budziem sačyć krytyčna.

Palityki nie dzieci, kab im u dupu dźmuchali.

Pisali i pisać my budziem zubasta, a časam i źjedliva, a časam ź ironijaj.

Tut musim zrabić adstupleńnie i patłumačyć čytačam — asabliva novym čytačam, jakija pačali čytać «Našu Nivu» paśla žniŭnia 2020-ha, jakija nie razumiejuć, čamu takaja šura-bura. Nasamreč, rachunki daŭniejšyja. U Siarhieja Cichanoŭskaha vialikaja kryŭda na «NN» jašče za artykuł 2019 hoda «Raniej fotkaŭsia z Sabčak, ciapier — ź Sieviaryncam. Chto taki palityčny błohier Siarhiej Cichanoŭski?». My viedajem pra heta, bo ŭ 2025‑m na samaj pieršaj paśla vyzvaleńnia sustrečy z žurnalistami ŭ Varšavie nam daviałosia ad Cichanoŭskaha vysłuchać šmat ciopłych słoŭ pra toj daŭni artykuł. Ale paŭtorymsia: my pisali i budziem pisać pra palitykaŭ krytyčna. Što było viadoma pra Cichanoŭskaha pa stanie na toj momant — toje i napisali.

«Naša Niva» viek pa sumleńni rabiła toje, što ličym svaim abaviazkam, što nam zdavałasia pravilnym. My i ŭ 2021‑m stajali na varcie da kanca. Jaki absurd dumać, što niechta svajoj łabudoj u fejsbuku zmusić nas absłuhoŭvać kahości; i jakaja niedalokaść u razumieńni miechanizma adnosin niezaležnych pryvatnych ŚMI i ich danacioraŭ, donaraŭ, fundataraŭ. 

Cichanoŭski svajoj biessensoŭnaj, nikomu nie patrebnaj vajnoj siabie dyskredytuje, a nie nas.

• 46
• 4
• 4
• 13
• 1
• 1
• 0
• 2