Paštaljonku, jakaja pieradała ŭ čat źviestki siłavikoŭ, asudzili da troch miesiacaŭ aryštu

Dziaržaŭny abvinavaŭca paprasiŭ pakarać Łarysu Tankaškur aryštam na try miesiacy pavodle č. 1 art. 179. Jon paprasiŭ vyklučyć z abvinavačańnia skaz, što złačynstva zroblena žančynaj «z matyvaŭ idealahičnaj varožaści», bo heta nie paćvierdziłasia ŭ sudzie. Abciažarvalnaj akaličnaściu jon paličyŭ ździajśnieńnie złačynstva hrupaj asobaŭ z papiaredniaj zmovaj, z matyvaŭ palityčnaj varožaści i ŭ dačynieńni asobaŭ, jakija vykonvali słužbovyja abaviazki. Da ŭstupleńnia prysudu ŭ siłu jon prasiŭ pakinuć mieru strymańnia ŭ vyhladzie asabistaha paručalnictva, piša Radyjo Svaboda.

U čym abvinavacili paštaljonku?

Suprać 56-hadovaj žančyny zaviali kryminalnuju spravu pavodle č. 1 art. 179 («Niezakonnaje źbirańnie i raspaŭsiudžvańnie źviestak ab pryvatnym žyćci») i ŭžyli mieru strymańnia ŭ vyhladzie asabistaha paručalnictva.

Byłaja paštaljonka pieradała ŭ telehram-čat «Lebiažij 97%» imiony i adrasy supracoŭnikaŭ milicyi, jakija byli padpisčykami viedamasnaha vydańnia MUS «Na stražie».

Paciarpiełymi ŭ spravie pryznali 35 čałaviek, siarod jakich supracoŭniki Centralnaha RUUS, vykładčyki Akademii MUS, namieśnik načalnika rajonnaha DAI i byłyja milicyjanty.

U abvinavačańni havorycca, što Łarysa Tankaškur, jakaja vydała źviestki padpisčykaŭ-milicyjantaŭ z kartak dastaŭki vydańnia MUS «Na stražie», dziejničała z matyvaŭ «palityčnaj i idealahičnaj varožaści, źviazanaj z elektaralnaj kampanijaj».

U pieršy dzień sudu žančyna zajaviła, što častkova pryznaje svaju vinu. Nie pryznaje abvinavačańnia ŭ tym, što raspaŭsiudziła źviestki na hlebie «palityčnaj i idealahičnaj varožaści». Jana skazała, što paviedamiła źviestki «nia z metaj pahrozaŭ milicyjantam, a z metaj dyjalohu», kab ź imi pahutaryć, kab ludziej, jakija źbirajucca ŭ mikrarajonie, nia bili. «Dumała, što hetyja milicyjanty dapamohuć žycharam Lebiadzinaha», — skazała žančyna.

13 paciarpiełych dali pakazańni ŭ sudzie. Niekatoryja ź ich kazali, što im kidali ŭ paštovyja skrynki ŭlotki z artykułam 128 Kryminalnaha kodeksu (Złačynstvy suprać biaśpieki čałaviectva) albo z tłumačeńniem, što takoje katavańni. Paciarpiełyja kazali, što nia majuć materyjalnych pretenzij da žančyny, a pakarańnie pavinien vyznačyć sud.

• 0
• 0
• 0
• 0
• 0
• 0
• 0
• 0