AAT «Hrodzienski miasakambinat» pieršym u Biełarusi atrymała licenziju na vytvorčaść miedavuchi — dla restarana va ŭłasnym turystyčnym kompleksie «Haradzienski majontak» (Karobčycy, Hrodzienski rajon).
Jak paviedamiŭ žurnalistam hienieralny dyrektar pradpryjemstva Anatol Hryšuk, u miesiac płanujecca vypuskać 2-3 tony pradukcyi. Jana atrymlivajecca mietadam chałodnaha zbrodžvańnia miodu, vady i inhredyjentaŭ. U mieniu restarana taksama jość stravy ź dzikich žyvioł, zdabytych na palavańni.
Pavodle infarmacyi hiendyrektara, budaŭnictva ahrarna-turystyčnaha kompleksu było raspačata ŭ 2004 hodzie. Centr stylizavany pad panski majontak XVII st. z konnaspartyŭnym kłubam. Jon raźmieščany za 12 km ad centra Hrodna i zajmaje 18 ha ziamli ź vialikimi i małymi sažałkami, valjerami dla svojskich i dzikich žyvioł.
Pavodle słoŭ A.Hryšuka, miesca pryznačana dla siamiejnaha adpačynku. 1 červienia adbyłosia dabračynnaje śviata dla dziaciej, u jakim uziali ŭdzieł bolš jak 500 čałaviek. Na vychodnyja centr naviedvajuć 2.000 turystaŭ ź Biełarusi i zamiežža, štodzionnaja vyručka składaje kala 20 młn. rubloŭ. 4 červienia centr prymaje pasłoŭ jeŭrapiejskich krain, akredytavanych u Litvie.
U chutkim časie tut płanujecca pabudavać kafe ź dziciačym mieniu, dziciačuju hulniavuju placoŭku, šeść haściavych domikaŭ, kuźniu, kryty maniež dla praviadzieńnia konnych aŭkcyjonaŭ i spartyŭnych spabornictvaŭ.
