«Chacieli, kab zdała inšych». Adna z najlepšych studentak VDMU — pra svaje 17 sutak, adličeńnie i toje, čamu maładym nielha być «pa-za palitykaj»
Palina Nitčanka — studentka-druhakurśnica viciebskaha «mieda». Chutčej za ŭsio, byłaja: 1 lutaha, kali Palina vyjšła na volu paśla 17 sutak aryštu, jana ad maci daviedałasia, što jaje adličyli z VNU. Dziaŭčyna ŭpeŭnienaja, što z palityčnych matyvaŭ, bo navat samym drennym studentam u ich zaŭsiody dajuć šaniec. Palina ž była vydatnicaj. Ale adnačasova z hetym stała vielmi prablemnaj i niazručnaj dla administracyi: paśla vybaraŭ jaje paśpieli čatyry razy asudzić pa sumna viadomym artykule 23.34.
U hutarcy z «NN» dziaŭčyna raspaviała, jak z absalutna apalityčnaj pieratvaryłasia ŭ aktyvistku i jakimi byli jaje 17 sutak.
Palinie — 18. Jana rodam z Žodzina. Jašče ŭ žniŭni 2020-ha jana absalutna nie cikaviłasia palitykaj. «Mnie było ŭsio roŭna, chto pieramoža na vybarach», — ščyra pryznajecca dziaŭčyna. «Ale kali ja ŭbačyła biesčałaviečnaje staŭleńnie da ludziej 9 žniŭnia i ŭ nastupnyja dni… Ludzi ŭ poŭnaj abmundziroŭcy dazvalali sabie stralać u zusim biezabaronnych, u adnych šortach i majcy — na jakoje licha? Heta mianie mocna aburyła, tamu ja vyjšła [pratestavać]. Maci vychavała mianie tak, što ja nie mahu prosta ŭziać i źmirycca ź niespraviadlivaściu».
Pieršy raz Palinu asudzili jašče ŭ vieraśni: za ŭdzieł u vuličnym šeści. Paśla hetaha — za akcyju salidarnaści studentaŭ, praviedzienuju ŭ Dzień narodnaha ŭltymatumu 26 kastryčnika. Tady ŭsio abyšłosia štrafami: ahułam na 44 bazavyja vieličyni.
Ale ŭžo ŭ studzieni pajšli aryšty: pieršyja 7 sutak Palina atrymała za zdymki ŭ videazvarocie, dzie studenty ź Viciebska vykazalisia suprać hvałtu. A paśla, nie vyzvalajučy dziaŭčynu ź izalatara, joj dali jašče 10 sutak źvierchu za ŭdzieł u łancuhu salidarnaści ŭ padtrymku palitźniavolenych studentaŭ.
«Štrafami ja nie «vychoŭvałasia», tamu mnie, dumaju, i vyrašyli davać sutki. Ale było i jašče adno nazirańnie. Kali ja pryjšła padpisvać užo druhi pratakoł za łancuh salidarnaści, supracoŭnik, jaki vioŭ maju spravu, vielmi chacieŭ, kab ja zdała inšych ludziej, što stajali sa mnoj pobač na fota. Ja navat pamiataju, jak jon paabiacaŭ: «Kali skažaš, što tam za dziaŭčynki, nie budzieš siadzieć», — razvažaje Palina.
U kamiery ź dziaŭčynaj siadzieła jašče 6 čałaviek (łožkaŭ było vosiem). Z palityčnym artykułam była tolki sama Palina i viciebski błohier Alena Januškoŭskaja.
«Siarod supracoŭnikaŭ izalatara byli tyja, chto škadavaŭ nas. Pa praviłach možna było raz na tydzień chadzić u duš, a nas zvadzili dva. U chałady dniom dazvalali karystacca koŭdrami. Ale znachodzilisia i tyja, chto adrazu kryčaŭ, kali ty aśmielvaŭsia prylehčy na łožak da adboju».
Z hałoŭnych minusaŭ dziaŭčyna nazyvaje adsutnaść haračaj vady i choład:
«U vialikija marazy ja siadzieła kala samaj batarei i navat u troch švedrach nie mahła sahrecca».
Ad turemnaj ježy dziaŭčyna adrazu admoviłasia.
«Ja ŭžo acaniła miascovaje mieniu raniej, kali apynułasia ŭ izalatary da suda na troje sutak. Nie mahła heta jeści. Nu, i navošta tady karmić unitaz, a paśla jašče i płacić za heta niemałyja hrošy? Ja napisała zajavu, što admaŭlajusia ad charčavańnia. Pieršyja dni jeła chleb, jakoha na ŭsich davali vielmi šmat, zapivała harbataj. Paśla sukamiernicy dzialilisia sa mnoj svaimi pieradačami. Ježu ad maich svajakoŭ mnie pieradali tolki praz 7 sutak: u pieršaj pieradačy pryniali vyklučna adzieńnie i srodki hihijeny. Skazali, što charčavańnie mnie «nie pałožana».
20 studzienia ŭ Paliny pavinien byŭ adbycca ekzamien pa histałohii. Navat u turmie jana sprabavała da jaho rychtavacca: chacieła atrymać dobry bał, kab nie psavać siaredni za siemiestr (za papiarednija dziaŭčynie pastavili 9 i 10).
«Skancentravacca było vielmi ciažka, bo amal usia kamiera kuryła. A jašče pastajanna kryčała radyjo», — pryznajecca dziaŭčyna.
Palina nakiravała ŭ VNU list z prośbaj pieranieści ekzamien u suviazi ź jaje aryštam, ale za propusk jaje ŭsio ž vyrašyli adličyć.
«Ja, kaniečnie, pajedu jašče da administracyi, vyśvietlu ŭsie abstaviny majho adličeńnia. Pry mahčymaści chaču adnavicca. U miedycynski ja išła metanakiravana: nie prosta lubiła chimiju i bijałohiju, a chacieła dapamahać ludziam. Ja znachodžu hetuju prafiesiju vysakarodnaj. U mianie i maci — doktarka», — kaža dziaŭčyna.
Zapužać dziaŭčynu sutkami dakładna nie atrymałasia. Jana kaža, što adčuvaje siabie dobra, i čakała ad turmy kudy horšaha. Ale kali ŭ kamiery z taboj akazvajucca dobryja ludzi, to ź imi nie prapadzieš.
«Ciapier, ubačyŭšy ŭsio, što adbyvajecca navokał, ja ŭpeŭnienaja, što studenty nie mohuć zastavacca pa-za palitykaj. Być pa-za palitykaj dla mianie — heta, pierš za ŭsio, nie viedać svaje pravy. A kali my ich nie viedajem, hetym karystajecca i administracyja VNU, i dziaržava».
Kali adnavicca ŭ Biełarusi nie atrymajecca, dziaŭčyna budzie vymušanaja pastupać va ŭniviersitet za miažoj.
-
Dźmitryj Kruty ŭznačaliŭ kamisiju pa farmavańni novaha ŭrada
-
Paźniak pra 1990-ja: «Nichto nie zrabiŭ bolšaj škody dla nacyjanalnych intaresaŭ Biełarusi, čym heta istota». Pra kaho jon?
-
Cichanoŭskaja sustrełasia z adzinym kandydatam ad apazicyi Vieniesueły, jaki, imavierna, vyjhraŭ vybary, ale Madura nie addaŭ uładu
Kamientary