Kredyt Biełarusi ŭ 500 młn. dalaraŭ moža być vydzieleny sa srodkaŭ antykryzisnaha fondu JeŭrAzES, zajaviŭ u aŭtorak Alaksiej Kudryn.
Kredyt Biełarusi ŭ pamiery 500 młn. dalaraŭ moža być vydzieleny sa srodkaŭ antykryzisnaha fondu JeŭrAzES.
Ab hetym 9 červienia zajaviŭ žurnalistam u Maskvie vice‑premjer, ministr finansaŭ Rasii Alaksiej Kudryn, paviedamlaje RIA Novosti.
Adkazvajučy na pytańnie ab mahčymaści pradastaŭleńnia Minsku takoha kredytu, jon skazaŭ:
«Usie varyjanty razhladajucca».
Pavodle słoŭ Kudryna, antykryzisny fond JeŭrAzES budzie stvorany na praciahu najbližejšych dvuch miesiacaŭ. «Jak tolki ŭsie krainy ratyfikujuć hetaje rašeńnie, fond pačnie svaju pracu», — zajaviŭ jon.
9 červienia na pasiadžeńni Miždziaržsavieta JeŭrAzES u Maskvie płanujecca padpisać dahavor ab zasnavańni antykryzisnaha fondu, a taksama pahadnieńnie ab kiravańni srodkami fondu ź Jeŭrazijskim bankam raźvićcia, paviedamiła pres‑słužba rasijskaha ŭrada.
Srodki fondu buduć vykarystanyja dla vydzialeńnia suvierennych pazykaŭ i stabilizacyjnych kredytaŭ dziaržavam‑udzielnicam, a taksama finansavańnia miždziaržaŭnych inviestycyjnych prajektaŭ. Dola Rasii składaje bolšuju častku statutnaha kapitału stvaranaha fondu — 7,5 młrd. dalaraŭ z 10 młrd. dalaraŭ.
U skład JeŭrAzES uvachodziać Biełaruś, Kazachstan, Kirhizija, Rasija i Tadžykistan. Status naziralnika pry arhanizacyi majuć Małdova i Ukraina.
Kamientary