Naprykancy lutaha adzin z najbujniejšych spartovych sajtaŭ Rasii sports.ru źmianiŭ ułaśnikaŭ. Usie 100% akcyj pierajšli va ŭładańnie zasnavalnika kampanii Faberlic Alaksieja Niačajeva (jon u centralnym štabie prapucinskaha «Ahulnarasijskaha narodnaha fronta», a ciapier stvaryŭ mini-partyju «Novyja ludzi»).
Siarod raniejšych ułaśnikaŭ biznesmien Hierman Tkačenka (67,75%), žurnalist biełaruskaha pachodžańnia Dźmitryj Navoša (23,75%), Dźmitryj Ściapanaŭ (8%) i Juryj Dudź (0,5%).
U adzin chołdynh z Sports.ru ŭvachodziŭ i biełaruski spartovy sajt «Trybuna», ale ŭ ździełku hety aktyŭ nie ŭvajšoŭ.
Pra budučyniu «Trybuny» «Naša Niva» parazmaŭlała z kiraŭnikom prajekta Maksimam Bierazinskim.
«Naša Niva»: Jakaja forma adnosin była dy niadaŭniaha času miž Sports.ru i «Trybuna» u Biełarusi? Jany vas finansavali, dapamahali raskucicca? Jak suadnosilisia asobnyja sajty ŭ miežach adnaho chołdynhu?
Maksim Bierazinski: «Trybuna» ŭ Biełarusi ŭvachodziła ŭ hrupu kampanij miedyjachołdynha. Ciapier Sports.ru pradadzieny i pakidaje hrupu kampanij. Takim čynam, rasijskaja častka biznesu sychodzić, ale zastajecca biełaruskaja, ukrainskaja i mižnarodnaja Trybuna, a taksama startap ab staŭkach Betting Insider.
Apošnija try hady «Trybuna» u Biełarusi była prybytkovaj. Navat 2020 hod udałosia skončyć sa stanoŭčymi ličbami, niahledziačy na błakavańnie. Rost vyručki skłaŭ 70 pracentaŭ — dyrektar pa prodažach Ihar Pietrulevič pravioŭ fantastyčnuju pracu. Zaroblenyja hrošy tracili na raźvićcio redakcyi i zapusk novych praduktaŭ.
Što tyčycca stasunkaŭ sa Sports.ru, to jany zaŭsiody byli partniorskimi. Pry hetym stupień aŭtanomii była maksimalnaj. Nie zhadaju vypadku, kali z Maskvy prychodziła chacia b niejkaje padabienstva na ŭkazańni. Kali i dapuskali niejkija kasiaki, to svaimi ŭłasnymi rukami.
«NN»: Što źmianiłasia ciapier dla Trybuny? Ci mocna heta adabjecca na pracy sajta?
MB: Z punktu hledžańnia redakcyjnaj palityki — nie źmienicca ničoha. Jak užo kazaŭ, biełaruskaja redakcyja praciahnie farmavać tuju kantentnuju palityku, jakuju ličyć patrebnaj, jak heta i było ŭsie papiarednija hady.
Z punktu hledžańnia technałohij źmieny buduć. My ciapier u stadyi abmierkavańnia niekalki varyjantaŭ taho, jakim mienavita čynam budzie adbyvacca padzieł prajektaŭ. Treba razumieć, što heta vialikaja zadača, i scenary mohuć być roznyja. Ale ŭ nas jość čas na pierachodny pieryjad. Naša meta składajecca ŭ tym, kab nie dapuścić padzieńnia ŭzroŭniu servisaŭ dla našych karystalnikaŭ, a taksama zachavać tyja fiški, jakija nas adroźnivajuć ad kankurentaŭ: kamjunici, błohi, kamientary, statystyka.
«NN»: Chto na siońnia źjaŭlajecca ŭłaśnikam «Trybuny»? Ci budziecie šukać novaha ŭłaśnika?
MB: Novaha ŭłaśnika šukać nie treba, bo ŭsio ŭ paradku sa starymi (uśmichajecca). Heta pa-pieršaje. A pa-druhoje, dumaju, ciapier budzie dosyć składana znajści inviestaraŭ dla kampanii, u jakoj hałoŭny aktyŭ — heta zabłakiravany resurs. Ale kali što — my adkrytyja da prapanoŭ.
U lik uładalnikaŭ uvachodziać niekalki ciapier užo byłych akcyjanieraŭ Sports.ru, a taksama my z hałoŭnym redaktaram Aleham Harunovičam.
«NN»: Va ŭmovach nieabhruntavanych represij, ź jakimi sutyknułasia «Trybuna» ŭ Biełarusi, ci ŭ stanie sajt vyžyć uvohule?
MB: Nu, voś pakul žyviom, jak bačycie. My praciahvajem pracavać i budavać płany. Zdoleli znajści mahčymaści zaprasić da supracoŭnictva niekalkich chłopcaŭ, jakija zvolnilisia abo byli zvolnienyja ź dziaržkampanij. U pryvatnaści, havorka pra Ułada Tatura, Jarasłava Pisarenku, Pašu Astravucha.
Zrazumieła, što situacyja ŭ krainie mocna ŭskładniaje žyćcio. Šmat času prychodzicca marnavać nie na raźvićcio, a na baraćbu — naprykład, na listavańnie ź Mininfarmam. Jaki, darečy, da hetaha času tak i nie dasłaŭ nam śpis parušeńniaŭ, niahledziačy na nieadnarazovyja zapyty. Ale čas vybraŭ nas. Tamu zmahajemsia.
Chacieŭ by adznačyć fantastyčnuju samaaddaču redakcyi na čale z Aleham Harunovičam. Tak, našy chłopcy nie traplali, dziakuj Bohu, pad kuli, Saša Ivulin abyšoŭsia tolki štrafam, a nie sutkami. Na fonie inšych redakcyj usio nie tak strašna. Ale taja praca, jakuju chłopcy robiać štodzień u hetych umovach, vyklikaje ŭ mianie i inšych akcyjanieraŭ honar.
«NN»: Nakolki ŭvohule siońnia moža być prybytkovym u Biełarusi rableńnie spartovaha sajta? Inšyja spartyŭnyja vydańni tak ci inakš znachodziacca na datacyjach dziaržavy.
MB: Tak, viadoma, naša kančatkovaja meta — budavać biznes. Absalutna ŭpeŭnieny, što ŭ Biełarusi miedyja mohuć być prybytkovymi. Užo kazaŭ, što rost vyručki ŭ 2020 hodzie, niahledziačy na kavid i 9 žniŭnia, skłaŭ 70 pracentaŭ. Kali b nie hetyja padziei, kali b Jeŭra i Alimpijada prajšli svoječasova, to ŭ nas byŭ by rost u 2-2,5 razu.
«NN»: Paśla błakavańnia sajta ci ŭpała naviedvalnaść? Kolki na siońnia pracentaŭ zachodaŭ prychodzicca na asnoŭnuju viersiju, kolki na lusterkavuju, kolki na mabilnuju viersiju?
MB: Padzieńnie było značnym. Kali ŭziać sajt, to kolkaść siesij źmienšyłasia ŭ 4 razy. Tamu adrazu paśla błakavańnia pačali šukać šlachi, jak dać mahčymaść ludziam atrymlivać infarmacyju.
I łajalnych karystalnikaŭ my viarnuli amal usich. Niechta zachodzić na sajt z dapamohaj VPN, chtości — praź lusterka, chtości vykarystoŭvaje dadatak. Akramia taho, zapuścili na sajcie Turba-staronki, jakija taksama dazvolili častcy karystalnikaŭ biez prablem spažyvać naš kantent.
Taksama maksimalna ŭzmacnili svaju prysutnaść u sacyjalnych sietkach. Instahram, naprykład, zdoleli vyraścić bolš čym u dva razy — ciapier tam bolš za 50 tysiač padpisčykaŭ.
Jašče adna važnaja kropka rostu — heta našy prajekty ŭ YouTube. Saša Ivulin sa svaim kanałam «ČiestnOK» pieradoleŭ płanku ŭ 60 tysiač padpisčykaŭ. Jość jašče niekalki prajektaŭ, pra jakija pakul raspaviadać nie budziem na ŭsialaki vypadak.
Kali viarnucca da sajta, to my stracili pošukavy trafik, choć za pieršuju pałovu 2020 hoda praviali vialikuju pracu ŭ hetym kirunku i damahlisia rostu. Tym bolš kryŭdna, što ciapier faktyčna pazbaŭlenyja hetaj častki biaspłatnaha trafiku. Upeŭnienyja, što ŭ chutkim časie situacyja narmalizujecca, tamu nie pieravodzim pošukavy trafik na lusterka, tak jak heta źviazana ź vialikimi ryzykami z punktu hledžańnia SEO.
Ciapier trafik pamiž lusterkam i asnoŭnym sajtam dzielicca ŭ suadnosinach prykładna 50/50. Kali ličyć u siesijach, to my zmahli viarnuć 85-90 pracentaŭ dažnivieńskaha trafiku i havorym, što miesiačnaja aŭdytoryja ŭsich našych placovak ciapier kala dvuch miljonaŭ karystalnikaŭ.
Lusterka nam, darečy, dapamahli zrabić «Reparciory bieź miežaŭ», jakija dapamahajuć zmahacca z abmiežavańniem svabody słova pa ŭsim śviecie. Za heta im asobny dziakuj. Ale za novymi damienami kyky.org uvažliva sočym.
